Jesukristo anaa sa Sentro sa Atong Kinabuhi

Samtang kita nagbaton og kasinatian latas sa mortalidad, kita adunay panahon nga magsagubang og mga pagsulay: sa tumang kasakit sa pagkawala sa mga minahal, sa malisod nga pakigbatok sa balatian, ang ikos sa kawalay hustisya, sa makalilisang nga mga kasinatian sa pagsamok o pag-abuso, ang kasub-anan sa kawalay trabaho, ang mapanunod nga mga kalisdanan, ang tumang kasakit sa pag-inusara, o ang makapasubo sa kasingkasing nga mga sangpotanan sa armadong kasungian.¹ Sa maong mga higayon, atong mga kalag nangindahay alang sa kadangpan.² Matinguhaon kita nga masayod: Kon asa kaha kita makakaplag og banyos sa kalinaw?³ Kang kinsa nato ikahatag ang atong pagsalig sa pagtabang kanato uban sa kamasaligon ug kalig-on sa pagbuntog niining mga hagit?⁴ Kinsa ang nanag-iya sa pailob, sa malukpanon nga gugma, ug sa gamhanan nga kamot sa pagbayaw ug pagsustener kanato?

Ang ligdong nga mga pangutana sa kalag, kadto nga motunga diha sa atong labing lisod nga mga takna ug labing grabe nga mga pagsulay, matubag pinaagi sa walay pagpaling-paling nga gugma ni Jesukristo.⁵ Diha Kaniya, ug pinaagi sa gisaad nga mga panalangin sa Iyang gipahiuli nga ebanghelyo,⁶ atong makaplagan ang mga tubag nga atong gipangita. Pinaagi kini sa Iyang walay kinutoban nga Pag-ula nga kita gitanyagan og usa ka gasa nga dili masukod—usa ang paglaom, pagkaayo, ug ang kasiguroan sa Iyang makanunayon, molahutay nga presensya sa atong mga kinabuhi.⁷ Kini nga gasa magamit sa tanan kinsa maningkamot uban sa hugot nga pagtuo, mohangop sa kalinaw ug katubsanan nga gawasnon kaayo Niyang gitanyag.

Ang Ginoo mituyhad sa Iyang kamot ngari sa matag usa kanato, usa ka pag-agda nga mao ang labing mahinungdanon sa Iyang balaan nga gugma ug kalumo. Ang iyang imbitasyon ngari kanato molapas pa sa usa ka yano nga tawag; kini usa ka balaan nga panumpa, gipalig-on pinaagi sa molahutay nga gahom sa Iyang kaluoy. Sa mga kasulatan, Siya mahigugmaon nga mipasalig kanato:

“Duol kanako, kamong tanan nga nagbudlay ug nabug-atan ug papahulayon ko kamo.

“Isangon ang akong yugo ug sunda ninyo ako kay malumo ako ug mapaubsanon sa espiritu ug makapahulay kamo.

“Sayon ang yugo nga akong isangon kaninyo ug gaan ang ipapas-an ko kaninyo.”⁸

Ang kaklaro sa Iyang imbitasyon nga “duol kanako” ug “isangon ang akong yugo” nagmatuod sa kalawom sa Iyang saad—usa ka sa saad nga hilabihan ka dako ug kompleto nga kini naglangkob sa Iyang gugma, nagtanyag kanato og usa ka solemne nga garantiya: “Makapahulay kamo.”

Samtang kita magmakugihon sa pagpangita og espirituhanong giya,⁹ atong gisugdan ang proseso sa personal nga paglambo nga mopalig-on sa atong mga pagpamatuod. Samtang atong gisabot ang kadako sa hingpit nga gugma sa atong Langitnong Amahan ug ni Jesukristo,¹⁰ ang atong mga kasingkasing mapuno sa pagkamapasalamaton, pagkamapainubsanon,¹¹ ug usa ka gibag-o nga tinguha sa pagpakigbugtaw sa dalan sa pagkadisipulo.¹²

Si Presidente Russell M. Nelson mitudlo nga, “kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabot gikan ug tungod Kaniya.”¹³

Si Alma, namulong ngadto sa iyang anak nga si Helaman, namayahag: “Ug karon, O Helaman akong anak, tan-awa, ikaw anaa sa imong kabatan-on, ug busa, mangamuyo ako kanimo nga pamation nimo ang akong mga pulong ug magkat-on kanako; kay nasayod ako nga si bisan kinsa nga mosalig sa Dios pagasuportahan sa ilang mga pagsulay ug sa ilang mga kasamok, ug sa ilang mga kasakit, ug pagabayawon sa kataposang adlaw.”¹⁴

Si Helaman, namulong ngadto sa iyang anak nga mga lalaki, nagtudlo kanila niining mahangtoron nga baroganan sa pagbutang sa Manluluwas diha sa sentro sa ilang mga kinabuhi: “Hinumdomi, hinumdomi nga kini diha sa lig-on nga sukaranan sa atong Manunubos nga mao si Kristo, ang Anak sa Dios, nga kamo kinahanglan gayod motukod sa inyong tukoranan.”¹⁵

Sa Mateo 14 nahibaloan nato nga human sa pagkadungog sa kamatayon ni Juan Bautista, si Jesus nagtinguha nga mag-inusara. Apan, usa ka dakong panon sa katawhan misunod Kaniya. Natandog sa kaluoy ug gugma, ug wala mitugot sa Iyang pagbangotan nga mobalda Kaniya gikan sa Iyang misyon, si Jesus midawat kanila, giayo ang masakiton taliwala kanila. Samtang nagsingabot ang kagabhion, ang mga disipulo nag-atubang og usa ka makaugtas nga hagit: usa ka panon sa katawhan nga adunay nihit nga pagkaon. Sila misugyot nga abogon ni Jesus ang panon sa katawhan aron makapamalit og pagkaon, apan si Jesus, uban sa dakong gugma ug taas nga mga gilaoman, mihangyo sa mga disipulo sa pagpakaon hinuon kanila.

Samtang ang mga disipulo nagkapuliki sa dinalian nga hagit, si Jesus mipakita sa Iyang pagsalig ug gugma sa Iyang Amahan, inubanan sa walay pagpaling-paling nga gugma alang sa katawhan. Siya misugo sa katawhan sa pagpanglingkod sa kasagbotan, ug nagkuha lang og lima ka hulma nga pan ug duha ka isda, mipili Siya sa pagpasalamat ngadto sa Iyang Amahan, giila ang paghatag sa Dios ibabaw sa Iyang awtoridad ug gahom.

Human Siya mihatag og pasalamat, si Jesus mipikas-pikas sa pan, ug ang mga disipulo miapod-apod niini ngadto sa katawhan. Sa milagroso nga paagi, ang pagkaon dili lang nakapaigo apan abunda, nga adunay 12 ka bukag nga salin. Ang grupo nga napakaon naglakip sa lima ka libo ka mga kalalakin-an, uban sa kababayen-an ug kabataan.¹⁶

Kini nga milagro nagtudlo og usa ka lawom nga leksiyon: Kon atubangon og mga hagit, sayon ra kaayo nga mahimong magpalabi og tutok sa atong mga kalisdanan. Apan, gipakita ni Jesukristo ang gahom sa pagtutok diha sa Iyang Amahan, nagtanyag og pasalamat, ug giila nga ang mga solusyon sa atong mga pagsulay dili kanunay nga anaa sa atong kaugalingon apan anaa sa Dios.¹⁷

Kon kita makasugat og mga kalisdanan, natural lang nga kita lagmit motutok sa mga babag nga atong giatubang. Ang atong mga hagit tinuod ug molukop sa atong pagtagad, apan ang baroganan sa pagbuntog niini mao ang atong tutokan. Pinaagi sa pagbutang ni Kristo diha sa kinauyokan sa atong mga hunahuna ug mga buhat, atong gipahiuyon ang atong kaugalingon ngadto sa Iyang panglantaw ug kalig-on.¹⁸ Kini nga pagpahaom wala nagbaliwala sa atong mga panglimbasog; hinuon, kini makatabang kanato sa pagmaniobra latas niini ubos sa balaan nga giya.¹⁹ Isip usa ka resulta, kita makadiskobre og mga solusyon ug suporta nga motumaw gikan sa mas taas nga kaalam. Ang pag-sagop niining nakasentro ni Kristo nga panglantaw makapagahom kanato og kalig-on ug salabotan sa paghimo sa atong mga pagsulay ngadto sa mga kadaogan,²⁰ magpahinumdom kanato nga uban sa Manluluwas, ang unsay ingon og sama ka dakong problema mahimong usa ka dalan ngadto sa mas dakong espirituhanong pag-uswag.

Ang istorya ni Alma nga Batan-on diha sa Basahon ni Mormon nagpresentar og usa ka madanihon nga asoy sa matubsanon ug lawom nga epekto sa pagsentro sa kinabuhi sa tawo libot ni Kristo. Sa sinugdanan, si Alma supak sa Simbahan sa Ginoo, mipahisalaag sa daghang tawo gikan sa dalan sa pagkamatarong. Apan, usa ka balaan nga interbensiyon, nga girepresentar pinaagi sa pagbisita sa anghel, mipukaw kaniya gikan sa iyang sayop nga mga binuhatan.

Sa iyang labing mahagiton nga mga takna, gisakit tungod sa pagkasad-an ug desperado sa pagpangita og kalingkawasan gikan sa iyang espirituhanong kasakit, nahinumdom si Alma sa mga pagtulon-an sa iyang amahan mahitungod ni Jesukristo ug sa gahom sa Iyang Pag-ula. Uban sa kasingkasing nga nangandoy sa katubsanan, siya bug-os nga naghinulsol ug tim-os nga nangamuyo sa kaluoy sa Ginoo. Kining importante nga higayon sa hingpit nga pagtugyan, nagdala ni Kristo sa labing una sa iyang mga hunahuna samtang si Alma matinguhaon nga nangita sa Iyang kaluoy, nagpahinabo sa usa ka talagsaon nga pagbag-o. Ang bug-at nga mga kadena sa pagkasad-an ug kawalay paglaom nahanaw ug napulihan sa makasanap nga pagbati sa hingpit nga kalipay ug kalinaw.²¹

Si Jesukristo mao ang atong paglaom ug ang tubag sa labing dakong mga kasakit sa kinabuhi. Pinaagi sa Iyang sakripisyo, Siya nagbayad sa atong mga sala ug gidala diha Kaniya ang tanan natong pag-antos—kasakit, kawalay hustisya, kasubo, ug kahadlok—ug Siya mopasaylo ug moayo kanato kon kita mosalig Kaniya ug magtinguha sa pag-usab sa atong mga kinabuhi alang sa mas maayo. Siya ang atong Tig-ayo,²² maghupay ug mag-ayo sa atong mga kasingkasing pinaagi sa Iyang gugma ug gahom, sama nga Iyang giayo ang daghang tawo atol sa Iyang panahon sa yuta.²³ Siya ang buhi nga tubig, nagtuman sa labing lawom nga mga panginahanglan sa atong mga kalag gamit ang Iyang makanunayon nga gugma ug kamabination. Sama kini sa saad nga Iyang gihimo ngadto sa babaye sa Samaria diha sa tabay, nagtanyag og usa ka tabay sa tubig nga nagtubod ngadto sa kinabuhing walay kataposan.”²⁴

Ako mohatag sa akong solemne nga pagsaksi nga si Jesukristo buhi, nga Siya nagdumala niining, Iyang sagrado nga Simbahan, Ang Simbahan ni Jesuskristo sa mga Santos sa Ulahing mga Adlaw.²⁵ Ako mopamatuod nga siya mao ang Manluluwas sa kalibotan, ang Prinsipe sa Kalinaw,²⁶ ang Hari sa mga hari, ang Ginoo sa mga ginoo,²⁷ ang Manunubos sa kalibotan. Ako momatuod uban sa kasiguroan nga kita anaa gayod kanunay sa Iyang hunahuna ug kasingkasing. Isip usa ka testamento niini, Siya mipahiuli sa Iyang Simbahan niining ulahing mga adlaw ug mitawag ni Presidente Russell M. Nelson isip Iyang propeta ug ang Presidente sa Simbahan niining panahona.²⁸ Ako nasayod nga si Jesukristo mihatag sa Iyang kinabuhi aron nga kita makabaton og kinabuhing dayon.

Samtang kita maningkamot sa pagbutang Kaniya nga masentro sa atong mga kinabuhi, ang mga pagpadayag ibutyag ngari kanato, ang Iyang hingpit nga kalinaw mopalibot kanato, ug ang Iyang walay kinutoban nga Pag-ula mopahinabo sa atong kapasayloan ug pagkaayo.²⁹ Kini diha Kaniya nga atong madiskobrehan ang kalig-on sa pagbuntog, ang kaisog sa pagsugakod, ug ang kalinaw nga molapas sa tanang panabot. Hinaot nga kita maningkamot sa matag adlaw nga mas magpaduol ngadto Kaniya,³⁰ ang tinubdan sa tanan nga maayo, ang kahayag sa paglaom sa atong panaw balik ngadto sa presensiya sa atong Langitnong Amahan. Sa sagradong ngalan ni Jesukristo, amen.