Ang Gamhanan, Balik-balik nga Pagkamahiyason sa Doktrina ni Kristo

Katuigan ang milabay, ang akong asawa, si Ruth; ang among anak nga babaye, si Ashley; ug ako miapil sa mga turista nga mag-kayak didto sa Hawaii sa Estados Unidos. Ang kayak usa ka naglutaw sa tubig, nga murag sakayan nga ang tigbugsay maglingkod nga mag-atubang sa unahan ug mogamit og bugsay nga may duha ka blade nga mobira gikan sa atubangan paluyo ug unya sa pikas bahin usab. Ang plano mao ang pagbugsay paingon sa duha ka gamayng isla unahan sa baybayon sa Oahu ug mobalik na usab. Kompyansa ra ko, kay sa batan-on pa ko, nakabugsay na ko og mga kayak tabok sa mga sapa sa kabukiran. Ang pagkompyansa dili gayod maayo, dili ba?

Ang among tiggiya mihatag namo og mga instruksiyon ug mipakita namo sa mga kayak sa dagat nga among gamiton. Lahi kini kaysa akong gigamit kaniadto. Kinahanglan diay ko nga molingkod sa ibabaw sa kayak, imbes sa ubos sa sulod niini. Pagsakay nako sa kayak, ang sentro nakong gibug-aton mas taas kaysa akong naandan, ug wala kaayo ko mahimutang diha sa tubig.

Sa dihang nagsugod na kami, mas paspas ko nga mibugsay kaysa ni Ruth ug ni Ashley. Wala madugay, nag-una na ko nila. Bisan og mapagarbohon sa akong bayanihong gilay-on, mihunong ko ug naghulat aron makaapas sila. Usa ka dakong balod—mga 13 ka sentimetro¹—miigo sa kilid sa akong kayak ug nabalintuwad ko ngadto sa tubig. Sa dihang akong gitarong ang akong kayak ug naningkamot nga makasakay og balik sa ibabaw, nalabyan ko ni Ruth ug ni Ashley, apan gikapoy na kaayo ko aron mopadayon sa pagbugsay. Wala pa gani ko makaginhawa, lain na pod nga balod, kining usa dako gayod kaayo—labing menos mga 20 ka sentimetro²—miigo sa akong kayak ug nabalintuwad na usab ko. Dihang gitarong nako ang kayak, nahutdan na ko sa akong gininhawa nga nahadlok ko nga dili na ko makakatkat sa ibabaw.

Nakakita sa akong sitwasyon, ang tiggiya mibugsay ug gikuptan ang akong kayak, nga nakapahimong mas sayon na lang nako ang pagkatkat sa ibabaw. Sa dihang nakita niya nga naghangos pa gayod ko nga mobugsay nga ako ra, gihigtan niya og pisi ang akong kayak ug misugod sa pagbugsay, nagbitad nako kuyog niya. Wala madugay nakaginhawa na ko og tarong ug misugod sa pagbugsay nga ako ra. Gitangtang niya ang pisi, ug naabot ko sa unang isla nga walay dugang nga tabang. Sa pag-abot, mihigda ko sa balas, gikapoy og maayo.

Human nga nakapahulay na ang grupo, ang tiggiya hinay nga misulti nako, “Mr. Renlund, kon magpadayon lang ka sa pagbugsay, magpabilin sa sakto nimong gikusgon, sa akong hunahuna makahimo ra ka.” Gisunod nako ang iyang tambag samtang nagbugsay kami paingon sa ikaduhang isla ug dayon balik ngadto sa among gigikanan. Duha ka higayon nga ang tiggiya mibugsay duol nako ug giingnan ko nga maayo ang akong gihimo. Bisan og ang mas dagko nga mga balod miigo sa akong kayak sa kilid, apan wala ko mabalintuwad.

Pinaagi sa makanunayon nga pagbugsay sa kayak, napabilin nako ang saktong gikusgon ug nagpadayon sa unahan, nagpahinay sa epekto sa mga balod nga miigo nako sa kilid. Ang samang baroganan magamit sa atong espirituhanong mga kinabuhi. Kita mahimong mas maigo kon kita mopahinay ug labi na kon kita mohunong.³ Kon atong ipabilin ang kadasig sa espirituhanong paglambo pinaagi sa padayon nga “pagbugsay” paingon sa Manluluwas, kita mas luwas ug mas segurado tungod kay ang atong kinabuhing dayon nagdepende sa atong hugot nga pagtuo diha Kaniya.⁴

Ang kadasig sa espirituhanong paglambo mahitabo “sa tibuok kinabuhi samtang kita balik-balik nga modawat sa doktrina ni Kristo.”⁵ Ang pagbuhat niini, si Presidente Russell M. Nelson mitudlo, makahatag og “gamhanan, balik-balik nga pagkamahiyason.”⁶ Gani, ang mga elemento sa doktrina ni Kristo—sama sa hugot nga pagtuo diha ni Ginoong Jesukristo, paghinulsol, pagsulod sa relasyon sa pakigsaad ngadto sa Ginoo pinaagi sa bunyag, pagdawat sa gasa sa Espiritu Santo, ug paglahutay ngadto sa kataposan⁷——wala gitumong nga masinati sa usa lamang ka higayon, tsekan kon nahuman na ug dili na hinumdoman pa. Sa partikular, ang “paglahutay ngadto sa kataposan” dili usa ka buwag nga lakang sa doktrina ni Kristo—nga daw atong gikompleto ang unang upat ka elemento ug dayon mopahulay sa luwas nga kahimtang, molahutay og lisod nga butang, ug magpaabot nga mamatay. Dili, ang paglahutay ngadto sa kataposan mao ang pabalik-balik ug pagbalik-balik nga paggamit sa ubang mga elemento sa doktrina ni Kristo, magmugna og “ gamhanan, balik-balik nga pagkamahiyason” nga gihulagway ni Presidente Nelson.⁸

Ang pabalik-balik nagpasabot nga atong isinati ang mga elemento sa doktrina ni Kristo sa makadaghan sa tibuok natong kinabuhi. Ang pagbalik-balik nagpasabot nga kita naglig-on ug naglambo sa matag pagbalik-balik. Bisan kon gibalik-balik nato ang mga elemento, wala lang kita nagtuyok-tuyok nga walay tumong sa pagpadayon sa unahan. Hinuon, mapaduol kita kang Jesukristo sa matag higayon pinaagi sa pabalik-balik nga proseso.

Ang pagbuylo naglangkob sa gikusgon ug sa padulngan.⁹ Kon nagbugsay ko sa kayak og paspas kaayo sa sayop nga padulngan, nakahimo tingali ko og igong pagbuylo, apan dili ko moabot sa gitumong nga padulngan. Sa samang paagi, sa kinabuhi, kita kinahanglang “mobugsay” paingon sa Manluluwas aron moduol ngadto Kaniya.¹⁰

Ang atong hugot nga pagtuo diha ni Jesukristo kinahanglan nga maamumahan matag adlaw.¹¹ Kini maamumahan kon kita mag-ampo matag adlaw, magtuon sa mga kasulatan kada adlaw, mamalandong sa kaayo sa Dios matag adlaw, maghinulsol matag adlaw, ug mosunod sa mga pag-aghat sa Espiritu Santo matag adlaw. Sama nga dili makaayo sa kahimsog nga unya na lang kaonon ang tanan natong pagkaon inig Dominggo ug dayon hutdon og kaon sa usa lang ka higayon ang nutrisyon nga sinemana nga gitagana, dili makaayo sa espirituhanong kahimsog ang pagpugong sa kinaiya nga makapalambo sa pagpamatuod sa usa lamang ka adlaw sa semana.¹²

Kon kita moako sa responsibilidad alang sa atong kaugalingong pagpamatuod,¹³ kita makabaton og kadasig sa espirituhanong paglambo ug sa hinayhinay makaugmad og sukaranan nga pagtuo diha ni Jesukristo, ug ang doktrina ni Kristo mahimong sentro sa katuyoan sa kinabuhi.¹⁴ Ang kadasig sa paglambo sa samang paagi molig-on samtang maningkamot kita sa pagsunod sa mga sugo sa Dios ug maghinulsol. Ang paghinulsol makapalipay ug magtugot nato nga makat-on gikan sa atong mga sayop, diin kini mao ang paagi nga kita mahangtorong mouswag. Kita sa walay pagduhaduha adunay mga panahon nga kita mabalintuwad sa atong mga pag-kayak ug makita ang atong kaugalingon nga anaa sa ilawom sa tubig. Pinaagi sa paghinulsol, makabalik kita sa ibabaw ug makapadayon, bisan kapila pa kita mahulog.¹⁵ Ang importante nga bahin mao nga kita dili mohunong.

Ang sunod nga elemento sa doktrina ni Kristo mao ang bunyag, nga naglakip sa bunyag sa tubig ug, pinaagi sa pagkompirma, ang bunyag sa Espiritu Santo.¹⁶ Bisan kon ang bunyag kausa ra mahitabo, kita balik-balik nga magbag-o sa atong pakigsaad sa bunyag sa higayon nga kita moambit sa sakramento. Ang sakramento dili mopuli sa bunyag, apan nagsumpay kini sa nag-unang mga elemento sa doktrina ni Kristo—hugot nga pagtuo ug paghinulsol—uban sa pagdawat sa Espiritu Santo.¹⁷ Kon kita mahunahunaong moambit sa sakramento,¹⁸ kita nagdapit sa Espiritu sa pagsulod sa atong kinabuhi, sama sa higayon nga kita gibunyagan ug gikompirmahan.¹⁹ Kon kita motuman sa pakigsaad nga gihulagway diha sa mga pag-ampo sa sakramento, ang Espiritu mahimo natong kauban.

Samtang ang Espiritu mohatag og mas dakong impluwensiya sa atong mga kinabuhi, kita sa mauswagon ug sa pabalik-balik nga paagi makapalambo og Kristohanon nga mga kinaiya. Ang atong mga kasingkasing mausab. Ang atong tinguha sa pagbuhat og daotan mokunhod. Ang atong tinguha sa pagbuhat og maayo molambo hangtod nga kita magtinguha lamang “sa pagbuhat og maayo kanunay.”²⁰ Ug kita sa ingon makagamit sa langitnong gahom nga gikinahanglan aron makalahutay ngadto sa kataposan.²¹ Ang atong pagtuo nadugangan, ug andam na usab kita nga mosubli sa gamhanan, balik-balik nga pagkamahiyason.

Ang nag-uswag nga kadasig sa espirituhanong paglambo makapaikag usab nato sa paghimo og dugang nga mga pakigsaad ngadto sa Dios diha sa balay sa Ginoo. Ang daghang pakigsaad makapaduol nato ngadto ni Kristo ug mas lig-ong mokonektar nato ngadto Kaniya. Pinaagi niini nga mga pakigsaad, kita mas makagamit sa Iyang gahom. Sa pagklaro, ang mga pakigsaad sa bunyag ug sa templo dili, mismo, ang tinubdan sa gahom. Ang tinubdan sa gahom mao si Ginoong Jesukristo ug ang atong Langitnong Amahan. Ang paghimo ug pagtuman sa mga pakigsaad nagmugna og agianan alang sa Ilang gahom ngari sa atong mga kinabuhi. Samtang kita magpakabuhi sumala niini nga mga pakigsaad, sa kataposan mamahimo kitang mga manununod sa tanan nga gipanag-iya sa Langitnong Amahan.²² Ang madasigong paglambo nga moresulta sa pagsunod sa doktrina ni Kristo wala lang maghatag og gahom sa kausaban sa atong balaanong kinaiya ngadto sa atong mahangtorong padulngan, apan nagdasig usab nato sa pagtabang sa uban sa tukmang mga paagi.

Hunahunaa kon giunsa ko pagtabang sa tiggiya sa biyahe human nga nabalintuwad ko sa kayak. Wala siya mosiyagit gikan sa layo og dili makatabang nga pangutana, sama sa, “Mr. Renlund, unsay gibuhat nimo diha sa tubig?” Wala siya mobugsay paduol ug mangasaba nako, nga mag-ingon, “Mr. Renlund, dili unta ka maingon niana kon piskay pa ang imong panglawas.” Wala niya guyora ang akong kayak samtang naningkamot ko sa pagsakay niini. Ug wala ko niya korehii sa atubangan sa grupo. Hinuon, gitabangan ko niya sa higayon nga nagkinahanglan ko niini. Gitambagan ko niya sa dihang andam na ako nga maminaw. Ug mihimo siya og talagsaong paningkamot aron sa pagdasig nako.

Kon kita mangalagad sa uban, dili kinahanglan nga kita mangutana og dili makatabang nga mga pangutana o mosulti sa klaro na kaayo. Kadaghanan sa mga tawo nga nagkalisod nahibalo nga sila nagkalisod. Kinahanglan nga dili kita maghukom; ang atong paghukom dili makatabang ni kinahanglanon, ug sa kanunay dili mao.

Ang pagtandi sa atong kaugalingon ngadto sa uban modala nato ngadto sa grabe nga mga sayop, labi na kon kita mohukom nga kita mas matarong kaysa niadtong nagkalisod. Ang ingon niana nga pagtandi susama sa walay paglaom nga pagkaunlod og tulo ka metros²³ sa tubig, nagtan-aw sa imong kauban nga nalunod sa upat ka metros²⁴ sa tubig, naghukom kaniya nga mas makasasala, ug mibati og kaanindot sa imong kaugalingon. Human sa tanan, kitang tanan nagkalisod sa atong kaugalingong paagi. Walay usa kanato nga makahimo og butang nga ikabayad sa kaluwasan.²⁵ Kita dili gayod makahimo niana. Si Jacob, sa Basahon ni Mormon, mitudlo, “Hinumdomi, human [kita] makig-uli ngadto sa Dios, nga pinaagi lamang sa grasya sa Dios nga [kita] maluwas.”²⁶ Kitang tanan nagkinahanglan sa walay kinutoban nga Pag-ula sa Manluluwas, dili lang ang tipik niini.

Kitang tanan nagkinahanglan gayod sa atong kaluoy, empatiya, ug gugma samtang kita makighinabi niadtong anaa sa atong palibot.²⁷ Kadtong nagkalisod “kinahanglan nga makasinati sa tiunay nga gugma ni Jesukristo nga makita sa [atong] mga pulong ug mga aksiyon.”²⁸ Kon kita mangalagad, kita modasig sa uban kanunay ug motanyag og tabang. Bisan kon ang usa ka tawo dili modawat, mopadayon kita sa pagpangalagad kon sila motugot. Ang Manluluwas mitudlo nga “ngadto kanila kamo magpadayon sa pag-alagad; kay kamo wala masayod kanus-a sila mobalik ug mohinulsol, ug moduol ngari kanako uban sa hingpit nga katuyoan sa kasingkasing, ug ako moayo kanila; ug kamo mao ang hinungdan sa pagdala og kaluwasan ngadto kanila.”²⁹ Ang trabaho sa Manluluwas mao ang pag-ayo. Ang atong trabaho mao ang paghigugma—paghigugma ug pagpangalagad sa paagi nga ang uban mapaduol ngadto ni Jesukristo. Kini ang usa sa mga bunga sa gamhanan, balik-balik nga pagkamahiyason sa doktrina ni Kristo.

Ako modapit ninyo nga mosunod sa doktrina ni Kristo sa balik-balik, pagbalik-balik, ug intensiyonal nga paagi ug motabang sa uban sa ilang pagpadayon. Ako mopamatuod nga ang doktrina ni Kristo mao ang sentro sa plano sa Langitnong Amahan; kay kini, human sa tanan, Iya man nga doktrina. Kon kita mopakita sa atong hugot nga pagtuo diha ni Jesukristo ug sa Iyang Pag-ula, kita mas makapadayon diha sa dalan sa pakigsaad ug madasig sa pagtabang sa uban nga mahimong matinud-anon nga mga disipulo ni Jesukristo. Kita mamahimong mga manununod sa gingharian sa Langitnong Amahan, nga mao ang kataposang paingnan sa matinud-anong pagsunod sa doktrina ni Kristo. Sa ngalan ni Jesukristo, amen.