Himoa ang Ginoong Jesukristo nga Inyong Tigpanalipod

Samtang ang akong duha ka kamanghorang anak nagtubo, nakadiskobre ko og mga libro nga makalingaw ug makapadani apan naggamit usab og simbolismo sa ilang mga istorya. Samtang dungan kami nga magbasa magabii, ganahan ko nga motabang sa akong mga anak nga makasabot sa simbolismo nga gigamit sa tigsulat aron sa pagtudlo og mas lawom nga mga baroganan, gani mga baroganan sa ebanghelyo.

Ako nakahibalo nga nasabtan kini og maayo sa usa ka adlaw dihang ang mas manghod nakong anak nga lalaki tin-edyer pa. Siya nagsugod og bag-o nga basahon ug ganahan lang nga malingaw sa istorya, apan ang iyang hunahuna nagpadayon sa pagpangita og mas lawom nga kahulogan sa tanang butang nga iyang gibasa. Siya nadismaya, apan ako hilom nga nagpahiyom.

Si Jesus nagtudlo pinaagi sa mga istorya ug mga simbolo¹—usa ka liso sa mustasa aron sa pagtudlo sa gahom sa hugot nga pagtuo,² usa ka nawala nga karnero aron sa pagtudlo sa bili sa mga kalag,³ usa ka usikan nga anak nga lalaki aron sa pagtudlo sa kinaiyahan sa Dios.⁴ Ang Iyang mga sambingay mga simbolo diin Siya makatudlo og mas lawom nga mga leksiyon niadtong kinsa adunay “mga dalunggan nga mamati.”⁵ Apan kadtong wala mangita sa mas lawom nga kahulogan dili makasabot,⁶ sama sa daghan nga nagbasa niadtong sama nga mga basahon nga akong gibasa ngadto sa akong mga anak nga wala makahibalo nga adunay mas lawom nga mga kahulogan ug daghan pa nga makuha niadto nga mga istorya.

Sa dihang ang Dios nga Amahan mihalad sa Iyang Bugtong nga Anak isip sakripisyo alang kanato, si Jesukristo Mismo nahimong labing taas nga simbolo sa walay kamatayon nga gugma sa Amahan sa Langit alang sa matag usa kanato.⁷ Si Jesukristo nahimong Kordero sa Dios.⁸

Kita adunay pribilehiyo ug panalangin nga madapit ngadto sa usa ka relasyon sa pakigsaad uban sa Dios, diin ang atong kaugalingon nga kinabuhi mahimong usa ka simbolo niana nga pakigsaad. Ang mga pakigsaad magmugna sa klase sa relasyon nga magtugot sa Dios nga mogiya ug moimpluwensiya kanato sa dali nga higayon ug mobayaw kanato aron mahimong mas mahisama sa atong Manluluwas, mas mopaduol kanato ngadto Kaniya ug sa atong Amahan⁹ ug sa kataposan moandam kanato aron makasulod sa Ilang presensiya.

Ang matag tawo sa kalibotan usa ka hinigugmang anak nga lalaki ug babaye sa Dios.¹⁰ Kon kita mopili nga mahimong kabahin sa usa ka pakigsaad, kini mopalambo ug mopalawom sa atong relasyon uban Kaniya. Si Presidente Russell M. Nelson nagtudlo nga kon kita mopili sa paghimo og mga pakigsaad sa Dios, ang atong relasyon Kaniya mahimong mas suod kay sa kaniadto sa wala pa ang atong pakigsaad, ug kini nakapahimo Niya nga mopanalangin kanato og sobra sa Iyang kaluoy ug gugma, usa ka pakigsaad sa gugma nga gitawag og hesed sa Hebreo nga pinulongan.¹¹ Ang dalan sa pakigsaad mahitungod gayod sa atong relasyon uban sa Dios—ang atong hesed nga relasyon diha Kaniya.¹²

Ang atong Amahan gusto og mas lawom nga relasyon sa tanan Niyang mga anak nga lalaki ug babaye,¹³ apan kini atong pagpili. Kon kita mopili nga mas magpaduol ngadto Kaniya pinaagi sa usa ka relasyon sa pakigsaad, kini motugot Kaniya nga mas mopaduol nganhi kanato¹⁴ ug mas mopanalangin kanato.

Ang Dios nagtakda sa mga kondisyon ug mga obligasyon sa pakigsaad nga atong gihimo.¹⁵ Kon kita mopili sa pagsulod niana nga relasyon, kita mosaksi ngadto Kaniya pinaagi sa simbolikanhong mga lihok sa matag pakigsaad, nga kita andam nga mosunod sa mga kondisyon nga Iyang gitakda.¹⁶ Pinaagi sa pagtahod sa atong mga pakigsaad, atong gitugotan ang Dios nga mobu-bo sa daghang gisaad nga mga panalangin nga may kalabotan niadto nga mga pakigsaad,¹⁷ lakip na ang magkadako nga gahom nga mag-usab ug mahimong mas mahisama sa atong Manluluwas. Si Jesukristo mao ang sentro sa tanang pakigsaad nga atong gihimo, ug ang mga panalangin sa pakigsaad nahimong posible tungod sa Iyang maulaong sakripisyo.¹⁸

Ang bunyag pinaagi sa pagpaunlod mao ang simbolikanhong ganghaan diin kita mosulod ngadto sa usa ka relasyon sa pakigsaad uban sa Dios. Ang pagpaunlod sa tubig ug paghaw-as og usab usa ka simbolo sa kamatayon ug Pagkabanhaw sa Manluluwas alang sa bag-ong kinabuhi.¹⁹ Samtang kita gibunyagan, kita simbolikanhong namatay ug natawo pag-usab ngadto sa pamilya ni Kristo ug nagpakita nga kita andam sa pagdala sa Iyang ngalan ngari kanato.²⁰ Kita mismo sa atong kaugalingon nagrepresentar niana nga simbolismo sa pakigsaad. Sa Bag-ong Tugon atong mabasa, “Gibunyagan kamo aron mahiusa kang Kristo busa nakaambit kamo sa kinaiya ni Kristo.”²¹ Sa atong pagpabunyag kita simbolikanhon nga miambit sa kinaiya ni Kristo.

Ang ordinansa sa sakramento nagpunting usab ngadto sa Manluluwas. Ang pan ug tubig nagsimbolo sa lawas ug dugo ni Kristo nga gipaagas alang kanato.²² Ang gasa sa Iyang Pag-ula simbolikanhong gihalad ngadto kanato matag semana samtang ang naghupot sa pagkapari, nga nagrepresentar sa Manluluwas Mismo, nagtanyag kanato sa pan ug tubig. Samtang kita mihimo sa aksiyon sa pagkaon ug pag-inom sa mga simbolo sa Iyang lawas ug dugo, si Kristo sa simbolikanhong paagi nahimong kabahin nato.²³ Ato usab nga giambit ang kinaiya ni Kristo samtang kita maghimo og bag-o nga pakigsaad matag semana.²⁴

Samtang kita naghimo og pakigsaad sa Dios diha sa balay sa Ginoo, mas gipalawman nato ang atong relasyon uban Kaniya.²⁵ Tanan nga atong gibuhat diha sa templo nagpunting kanato ngadto sa plano sa atong Amahan alang kanato, diin ang sentro mao ang Manluluwas ug ang Iyang maulaong sakripisyo.²⁶ Ang Ginoo magtudlo kanato pagtulon-an human sa usa ka pagtulon-an²⁷ pinaagi sa simbolismo sa mga ordinansa ug mga pakigsaad samtang atong ablihan ang atong mga kasingkasing ug mainampoon nga magtinguha nga makasabot sa mas lawom nga mga kahulogan.

Isip kabahin sa pagtuga sa templo, kita gitugotan nga mosul-ob sa garment sa balaan nga pagkapari. Kini usa ka sagrado nga obligasyon ug usa ka sagrado nga pribilehiyo.

Sa daghang relihiyosong mga tradisyon, usa ka espesyal nga panggawas nga bisti ang isul-ob isip simbolo sa mga gituohan ug pasalig sa usa ka tawo ngadto sa Dios,²⁸ ug usa ka bisti nga pangseremonya ang kasagaran nga isul-ob niadtong mangulo sa mga serbisyo sa pagsimba. Kadtong sagrado nga mga sotana nagdala og lawom nga kahulogan alang niadtong nagsul-ob niini. Atong mabasa sa kasulatan nga sa karaang mga panahon, ang sagradong pangseremonya nga mga bisti ang gisul-ob usab nga gipahiangay sa mga ritwal sa templo.²⁹

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kadtong sama kanato nga mipili sa paghimo og mga pakigsaad uban sa Dios diha sa balay sa Ginoo magsul-ob og pangseremonya nga panggawas nga bisti atol sa pagsimba sa templo, nga nagsimbolo sa bisti nga gisul-ob sa mga ritwal sa templo sa karaang panahon. Kita usab magsul-ob sa garment sa balaang pagkapari, atol sa pagsimba diha sa templo ug sa atong inadlaw-adlaw nga kinabuhi.³⁰

Ang garment sa balaan nga pagkapari lawom og kahulogan ug nagpunting usab ngadto sa Manluluwas. Sa dihang si Adan ug Eva mikaon sa prutas ug kinahanglan nga mobiya sa Tanaman sa Eden, sila gihatagan og mga sapot nga panit aron itabon nila.³¹ Adunay kalagmitan nga may hayop nga gisakripisyo aron mahimo kadtong mga sapot nga panit—nagsimbolo sa kaugalingon nga sakripisyo sa Manluluwas alang kanato. Ang Kaphar usa ka sukaranang Hebreo nga pulong alang sa pag-ula, ug usa sa mga kahulogan niini mao “ang pagtabon.”³² Ang atong garment sa templo nagpahinumdom kanato nga ang Manluluwas ug ang mga panalangin sa Iyang Pag-ula magtabon kanato sa tibuok natong kinabuhi. Samtang atong gisul-ob ang garment sa balaan nga pagkapari matag adlaw, kanang maanindot nga simbolo mahimong kabahin nato.

Diha sa Bag-ong Tugon sa basahon sa Mga Taga-Roma, atong mabasa: “Hapit na matapos ang kagabhion ug duol na ang kabuntagon: busa isalikway nato ang mga buhat nga iya sa kangitngit ug isul-ob nato ang panalipod sa mga iya sa kahayag. … Himoa ang Ginoong Jesukristo nga inyong tigpanalipod.”³³

Ako mapasalamaton kaayo sa pribilehiyo nga makasul-ob sa garment sa balaan nga pagkapari aron sa pagpahinumdom kanako nga ang Manluluwas ug ang mga panalangin sa Iyang walay kinutoban nga Pag-ula kanunay nga nagtabon nako sa tibuok nakong mortal nga panaw. Kini usab nagpahinumdom kanako nga kon akong tumanon ang mga pakigsaad nga akong gihimo uban sa Dios diha sa balay sa Ginoo, ako simbolikanhong mihimo ni Kristo nga akong tigpanalipod, kinsa Siya Mismo usa ka taming sa kahayag. Siya mopanalipod nako gikan sa daotan,³⁴ mohatag kanako og gahom ug dugang nga kapasidad,³⁵ ug mahimong akong kahayag ug giya³⁶ latas sa kangitngit ug mga kalisod niini nga kalibotan.

Adunay lawom ug nindot nga simbolikanhong kahulogan diha sa garment sa balaang pagkapari ug ang relasyon niini ngadto ni Kristo. Ako nagtuo nga ang akong kaandam³⁷ sa pagsul-ob sa balaan nga garment mahimong akong simbolo ngadto Kaniya.³⁸ Kini mao ang akong personal nga timailhan ngadto sa Dios, ug dili timailhan ngadto sa uban.³⁹

Mapasalamaton kaayo ko sa akong Manluluwas, si Jesukristo.⁴⁰ Ang Iyang maulaong sakripisyo alang kanato nahimong ang labing dako nga simbolo sa walay kataposang gugma Niya ug sa atong Amahan sa Langit alang sa matag usa kanato,⁴¹ uban sa makita nga mga simbolo niana nga gugma ug sakripisyo—ang mga timaan diha sa mga kamot, mga tiil, ug kilid sa Manluluwas—nagpabilin bisan human sa Iyang Pagkabanhaw.⁴²

Samtang ako magtuman sa akong mga pakigsaad ug mga obligasyon sa Dios, lakip na ang pagsul-ob sa garment sa balaan nga pagkapari, ang akong kinabuhi mismo mahimong usa ka personal nga simbolo sa akong gugma ug lawom nga pagpasalamat sa akong Manluluwas, si Jesukristo, ug sa akong tinguha nga makauban Siya nako kanunay.

Kon wala pa ninyo kini mabuhat, ako modapit kaninyo sa pagpili og mas lawom nga relasyon uban sa Dios pinaagi sa paghimo og mga pakigsaad uban Kaniya diha sa balay sa Ginoo. Tun-i ang mga pakigpulong sa atong propeta (lakip na ang mga nindot nga pagtulon-an diha sa mga footnote sa iyang pakigpulong, nga anaa sa kasagaran sa mga pakigpulong sa komperensiya). Siya balik-balik nga namulong mahitungod sa mga pakigsaad sa daghan nang katuigan ug labi na sukad nahimong Presidente sa Simbahan. Pagkat-on gikan sa iyang mga pagtulon-an mahitungod sa maanindot nga mga panalangin ug dugang nga gahom ug kapasidad nga mainyoha pinaagi sa paghimo ug pagtuman sa mga pakigsaad uban sa Dios.⁴³

Ang Kinatibuk-ang Tamdanan nga Basahon nag-ingon nga wala kinahanglana nga anaay tawag sa misyon o kaslonon aron mohimo og mga pakigsaad sa templo.⁴⁴ Ang usa ka tawo kinahanglan dili mominos sa 18 anyos, wala na mag-eskwela sa high school o ang katugbang niini, ug miyembro sa Simbahan sa dili mominos usa ka tuig. Aduna usab gikinahanglan nga mga sumbanan sa personal nga pagkabalaan.⁴⁵ Kon kamo adunay tinguha sa pagpalawom sa inyong relasyon kauban sa inyong Amahan sa Langit ug ni Jesukristo pinaagi sa paghimo og sagradong mga pakigsaad diha sa balay sa Ginoo, ako modapit kaninyo sa pagpakig-istorya sa inyong bishop o presidente sa branch ug pahibaloa siya sa inyong mga tinguha. Siya motabang kaninyo kon unsaon sa pagpangandam aron makadawat ug makatahod niadto nga mga pakigsaad.

Pinaagi sa relasyon sa pakigsaad uban sa Dios, ang atong kaugalingon nga mga kinabuhi mahimong usa ka buhi nga simbolo sa atong pasalig ug lawom nga gugma alang sa atong Amahan sa Langit, ang atong hesed alang Kaniya,⁴⁶ ug ang atong tinguha sa pag-uswag ug sa kataposan mahisama sa atong Manluluwas, mahimong andam aron usa ka adlaw makasulod sa Ilang presensiya. Ako mopamatuod nga ang dako nga mga panalangin niana nga relasyon sa pakigsaad tukma gayod kaayo sa kantidad sa pagkadisipulo. Sa ngalan ni Jesukristo, amen.