Usa ka Talaan sa Unsay Akong Nakita ug Nadungog

Human sa akong paggradwar sa pagtuon sa pamalaod, ang akong asawa, si Marcia, ug ako mipili nga moapil sa usa ka kompaniya sa pamalaod nga nakasentro sa pamalaod sa paghusay. Samtang nagsugod ko sa akong pagbansay sa trabaho, sagad sa akong panahon gigahin sa pag-andam og mga saksi aron motestigo sa husay. Dali nakong nahibaloan nga ang mga katinuoran gitino sulod sa usa ka lawak sa korte sa hukmanan samtang ang mga saksi, ubos sa panumpa, nagpamatuod sa kamatuoran sa unsay ilang nakita ug nadungog. Samtang ang mga saksi mipamatuod, ang ilang mga pulong girekord ug gitipigan. Ang importansiya sa masaligan nga mga saksi kanunay nga mauna sa akong pagpangandam.

Dili dugay ang akong pagkaamgo nga ang mao mismong mga pulong nga akong gigamit kada adlaw isip usa ka abogado mao usab ang mga pulong nga akong gigamit sa akong mga pagpakighinabi mahitungod sa ebanghelyo. Ang “saksi” ug “pagpamatuod” mao ang mga pulong nga atong gamiton kon mopakigbahin kita sa atong kahibalo ug mga pagbati mahitungod sa pagkatinuod sa ebanghelyo ni Jesukristo.

Samtang gipaluyohan ko isip bag-ong Area Seventy, akong giablihan ang mga kasulatan aron magkat-on sa akong mga katungdanan ug mibasa sa Doktrina ug mga Pakigsaad 107:25, nga nag-ingon, “Ang Kapitoan gitawag … nga mamahimong linain nga mga saksi ngadto sa mga Hentil ug sa tibuok nga kalibotan.” Sama sa inyong mahunahuna, ang akong mga mata nakatutok sa mga pulong nga “linain nga mga saksi.” Naklaro nako nga ako adunay katungdanan sa paghatag sa akong pagsaksi—sa pagpamatuod sa ngalan ni Jesukristo—bisan asa ako mobiyahe sa kalibotan.

Dunay daghang ehemplo diha sa mga kasulatan bahin niadtong mga saksi nga nakakita mismo ug kinsa mipamatuod sa ilang nakita ug nadungog.

Samtang ang karaang propeta nga si Mormon nagsugod sa iyang talaan, gisulat niya, “Ug karon ako, si Mormon, mihimo og usa ka talaan sa mga butang diin ako nakakita ug nakadungog, ug motawag niini og Basahon ni Mormon.”¹

Ang Apostoles sa Manluluwas nga si Pedro ug si Juan miayo sa usa ka tawo pinaagi sa ngalan ni Jesukristo sa Nazaret.² Sa dihang gisugo nga dili mamulong sa ngalan ni Jesukristo, mitubag sila:

“Kon matarong ba atubangan sa Dios nga kamo na hinoon mao ang patalinghogan inay ang Dios, kamo lay mag-igo niini.

“Kay alang kanamo dili kami makapugong sa pagsulti mahitungod sa among nakita ug nadungog.”³

Ang laing madanihon nga pagpamatuod nagagikan sa mga Santos diha sa Basahon ni Mormon kinsa nakasaksi sa pagbisita sa Manunubos nga si Jesukristo. Paminawa kining paghulagway sa ilang pagsaksi: “Ug sa ingon niini nga paagi sila nagpamatuod: Ang mata wala pa makatan-aw, ni ang dunggan makadungog, kaniadto, sa mahinungdanon ug kahibulongan nga mga butang [nga among nakita ug nadungog nga gisulti ni Jesus] ngadto sa Amahan.”⁴

Mga kaigsoonan, karong adlawa akong ipahayag ang akong pagsaksi ug mohimo og talaan sa unsay akong nakita ug nadungog atol sa akong sagrado nga pagpangalagad isip usa ka Seventy ni Ginoong Jesukristo. Sa pagbuhat niini, ako mopamatuod kaninyo sa usa ka mahigugmaong Langitnong Amahan ug sa Iyang matinabangong Anak, si Jesukristo, kinsa nag-antos, namatay, ug mibangon pag-usab aron motanyag og kinabuhing dayon ngadto sa mga anak sa Dios. Ako mopamatuod bahin sa “katingalahan ug kahibulongan nga buhat”⁵ ug nga ang Ginoo migamit na usab sa Iyang gahom aron ipahiuli ang Iyang ebanghelyo sa kalibotan pinaagi sa Iyang buhing mga propeta ug apostoles.⁶ Ako mopamatuod nga sumala sa akong nakita ug nadungog, wala nay laing mas maayo nga panahon nga mamahimong sa ka miyembro sa Ang Simbahan ni Jesukristo sa mga Santos sa Ulahing mga Adlaw kay sa karon. Nasayod ako niini sumala sa akong kaugalingong kahibalo, nga walay kalambigitan sa bisan unsang lain nga tinubdan, tungod sa akong nakita ug nadungog.

Panahon sa akong tuig sa senior high school, aron makagradwar sa seminary, gikinahanglan ko nga moila sa tanang 15 ka templo sa Simbahan. Adunay gibutang nga litrato sa matag templo sa atubangan sa among lawak klasehanan, ug kinahanglan ko nga makahibalo kon asa nga dapit ang matag usa niini. Karon, paglabay sa daghang mga tuig, lisod na kaayo ang pag-ila sa matag usa niini—kay aduna nay 335 nga magamit o gipahibalo nga itukod nga mga templo. Nakita na nako sa personal ang daghan niini nga mga balay sa Ginoo ug mopamatuod nga ang Ginoo nagtanyag sa Iyang mga panalangin ug mga ordinansa ngadto sa mas daghan pa gayod sa Iyang mga anak tabok sa kalibotan.

Ang akong mga higala sa FamilySearch nagtudlo nako nga sobra sa usa ka milyon ka mga ngalan ang gidugang ngadto sa FamilySearch matag adlaw. Kon wala ninyo makit-i ang inyong mga katigulangan kagahapon, dapiton ko kamo sa pagsusi na usab ugma. Kabahin sa pagpundok sa Israel sa pikas nga habig sa tabil, wala nay laing mas maayo nga panahon nga mahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw kay sa karon.

Samtang nagpadako mi sa among mga anak didto sa Twin Falls, Idaho, ang among panglantaw sa tibuok kalibotan nga Simbahan limitado. Sa dihang gitawag ko nga mahimong usa ka Kinatibuk-ang Awtoridad, si Marcia ug ako gisangonan nga moserbisyo sa Pacific Area, usa ka dapit nga wala pa kami makaadto sukad. Nalipay kami nga nakakita og mga stake gikan sa ibabaw sa New Zealand ngadto sa ubos, nga adunay templo nga gipahinungod niadtong 1958. Usa kadto sa 15 nga kinahanglan nakong memoryahon sa seminary. Nakakaplag kami og mga templo sa matag dagko nga siyudad sa Australia, nga adunay mga stake tabok niana nga kontinente. Aduna kami mga buluhaton didto sa Samoa, diin adunay 25 ka stake, ug sa Tonga, diin hapit katunga sa populasyon mga miyembro sa Simbahan. Aduna kami buluhaton didto sa isla sa Kiribati, diin nakakaplag kami og duha ka stake. Aduna kami mga buluhaton sa pagbisita sa mga stake sa Ebeye sa Marshall Islands ug sa Daru sa Papua New Guinea.

Human sa among panahon didto sa Pacific Islands, gisangonan kami nga moserbisyo sa Pilipinas. Sa akong katingala, ang Simbahan ni Jesukristo sa Pilipinas nagtubo lapas pa sa bisan unsa nga akong naamgohan. Sa pagkakaron aduna nay 125 ka stake, 23 ka misyon, ug 13 ka templo nga gigamit o gipahibalo nga itukod. Nakasaksi ko og simbahan nga adunay sobra sa 850,000 ka miyembro niana nga nasod. Ngano nga wala man ako makamatikod sa pag-establisar sa Simbahan ni Kristo tabok sa kalibotan?

Human sa tulo ka tuig didto sa Pilipinas, gihangyo ko nga moserbisyo sa Departamento sa Misyonaryo. Ang akong buluhaton midala namo ngadto sa mga misyon sa tibuok kalibotan. Ang akong panglantaw bahin sa tibuok kalibotan nga Simbahan sa Manluluwas milapad og maayo. Si Marcia ug ako gisangonan sa pagbisita sa mga misyon sa Asya. Nakita namo ang nindot nga sentro sa stake sa Singapore, nga adunay talagsaon, matinud-anon nga mga miyembro. Mibisita kami sa mga miyembro ug sa mga misyonaryo didto sa usa ka chapel sa Kota Kinabalu, Malaysia. Nakighimamat kami og mga misyonaryo sa Hong Kong ug miapil sa usa ka nindot kaayo nga komperensiya sa stake nga adunay matinud-anon, mapahinungoron nga mga Santos.

Kini nga kasinatian nabalik sa makadaghan samtang nakighimamat kami sa mga misyonaryo ug sa mga miyembro tabok sa Europe, sa Latin America, sa Caribbean, ug sa Africa. Ang Simbahan ni Jesukristo nagsinati og talagsaong paglambo sa Africa.

Usa ako ka saksi nga nakakita sa nagpadayon nga Pagpahiuli sa ebanghelyo ni Jesukristo ug sa katumanan sa propesiya ni Joseph Smith nga “ang kamatuoran sa Dios magpadayon nga maisogon, halangdon, ug gawasnon, hangtod nga kini makasulod sa matag yuta, makabisita sa matag dapit, molukop sa matag nasod, ug madungog sa matag dunggan.”⁷

Ang atong talagsaong mga misyonaryo nga milukop na karon sa kalibotan 74,000 na ang gidaghanon. Nakigtinabangay sa mga miyembro, nagbunyag sila og sobra sa 20,000 ka tawo kada buwan. Bag-ohay lang naglangkob kini sa 18, 19, ug 20 anyos nga mga batan-ong lalaki ug mga batan-ong babaye kinsa, pinaagi sa tabang sa Ginoo, miresulta niining dako nga milagro sa pagpundok. Nakita namo kining mga batan-ong babaye ug mga batan-ong lalaki diha sa gagmay nga mga baranggay sa Vanuatu ug sa dagko nga mga siyudad sa New York, Paris, ug London. Nakasud-ong ko nila nga nagtudlo mahitungod sa Manluluwas sa lagyong mga kongregasyon sa Fiji ug sa mas dagkong mga panagtigom sa mga lugar sama sa Texas, California, ug Florida sa Estados Unidos.

Makakita kamo og mga misyonaryo sa matag suok sa yuta nga mamulong og 60 ka lainlaing pinulongan ug nagtuman sa dakong sugo sa Manluluwas diha sa Mateo 28: “Busa panglakaw kamo ug himoa ninyong mga tinun-an ang tanang kanasoran, sa pagpamautismo kanila sa ngalan sa Amahan, ug sa Anak, ug sa Espiritu Santo.”⁸ Akong gipasidunggan ang nangagi ug ang kasamtangang mga misyonaryo sa Simbahan ug mopahinumdom sa atong nagtubo nga henerasyon bahin sa pagdapit ni Presidente Russell M. Nelson sa pagduol ug sa pagpundok sa Israel.⁹

Ako mopamatuod karong adlawa nga ako nakakita niining makahuloganong Pagpahiuli sa ebanghelyo sa Manluluwas sa akong kaugalingong mga mata ug nakadungog niini sa akong kaugalingong mga dalunggan. Usa ako ka saksi sa buhat sa Dios sa tibuok kalibotan. Wala nay laing mas maayo nga panahon nga mahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw kay sa karon.

Tingali ang labing makadasig nga milagro sa pagpahiuli nga akong nasaksihan mao kamo, ang matinud-anong mga miyembro sa Simbahan sa matag yuta. Kamo, ang mga Santos sa Ulahing mga Adlaw, gihulagway ni Nephi diha sa Basahon ni Mormon samtang nakita niya ang atong panahon ug mipamatuod, “Ug nahitabo nga ako, si Nephi, nakakita sa gahom sa Kordero sa Dios, nga kini mikunsad diha sa mga santos sa simbahan sa Kordero, ug diha sa katawhan sa pakigsaad sa Ginoo, kinsa nagkatibulaag sa ibabaw sa tibuok yuta; ug gisangkapan sila sa pagkamatarong ug sa gahom sa Dios sa dako nga himaya.”¹⁰

Ako mopamatuod nga akong nakita sa akong mga mata ang nakita ni Nephi—kamo, ang mga Santos sa pakigsaad sa matag yuta, gisul-uban sa hinagiban sa pagkamatarong ug sa gahom sa Dios. Samtang didto ko sa pulpito sa usa niining halangdon nga mga nasod sa kalibotan, ang Ginoo mibutang sa akong hunahuna sa usa ka butang nga gitudlo ni Hari Benjamin diha sa Mosiah 2 sa Basahon ni Mormon. Brent, “Ako nagtinguha nga [ikaw] mohunahuna sa bulahan ug sa malipayong kahimtang niadtong nanagtuman sa mga sugo sa Dios. Kay tan-awa, bulahan sila sa tanang butang, sa temporal ug sa espirituhanon.”¹¹

Mopamatuod ko kaninyo nga nakakita ako niini sa akong kaugalingong mga mata ug nakadungog niini sa akong kaugalingong mga dalunggan samtang ako nakahimamat kaninyo, matinud-anong mga Santos sa Dios sa tibuok yuta kinsa nagtuman sa mga sugo. Kamo ang mga anak sa pakigsaad sa Amahan. Kamo ang mga disipulo ni Jesukristo. Kamo usab nahibalo sa unsay akong nahibaloan kay nakadawat kamo og personal nga pagsaksi sa pagkatinuod sa gipahiuli nga ebanghelyo ni Jesukristo. Ang Manluluwas nagtudlo, “Apan bulahan gayod ang inyong mga mata kay makakita man kini, ug ang inyong mga dalunggan kay makabati man kini.”¹²

Ubos sa direksiyon sa Ginoo ug sa pagpangulo sa Iyang mga propeta ug apostoles magpadayon kita sa pag-andam og mga misyonaryo, mohimo ug motuman og sagrado nga mga pakigsaad, moestablisar sa Simbahan ni Kristo sa tibuok kalibotan, ug modawat sa mga panalangin nga moabot samtang magtuman kita sa mga sugo sa Dios. Nagkahiusa kita. Mga anak kita sa Dios. Nakaila kita Kaniya ug gihigugma nato Siya.

Moapil ako kaninyo, akong mga higala, samtang maghiusa kita nga mopamatuod nga kining mga butanga tinuod. Mohimo kita og talaan sa atong nakita ug nadungog. Kamo ug ako mga saksi nga mopamatuod. Pinaagi kini sa gahom niining hiniusa nga pagsaksi nga magpadayon kita sa unahan inubanan sa hugot nga pagtuo ni Ginoong Jesukristo ug sa Iyang ebanghelyo. Akong ihatag ang akong pagsaksi nga si Jesukristo buhi. Siya ang atong Maluluwas ug atong Manunubos. Sa ngalan ni Jesukristo, amen.