L-Intenzjoni ta’ Alla Hi li Jġibkom Lura d-Dar

Nixtieq nesprimi l-gratitudni tiegħi għat-talb tagħkom hekk kif jien bdejt il-proċess biex naġġusta ruħi għas-sejħa li għamilli l-President Nelson biex inservi bħala Appostlu tal-Mulej Ġesù Kristu. Tistgħu timmaġinaw kemm ħassejtni kommoss u dan kien għalija żmien ta’ bidla straordinarja u ta’ eżami tal-kuxjenza ta’ veru. Madankollu hu tabilħaqq ta’ unur kbir għalija li nservi lis-Salvaturi, f’kwalunkwe kapaċità, u li flimkien magħkom naqsam l-aħbar it-tajba tal-evanġelju tiegħu ta’ tama.

Barra minn hekk, intqal li wara kull Appostlu ġdid hemm kunjata mill-aktar meraviljuża. Ma nafx jekk din hijiex xi ħaġa li ntqalet verament, iżda f’dan il-każ, hemm probabbiltà kbira li hu hekk. U nissuspetta li l-fatt li l-kunjata tiegħi m’għadhiex aktar magħna ma jnaqqas xejn mill-meravilja tagħha.

Ftit tax-xhur ilu, meta jien u marti konna qed inżuru pajjiż ieħor fuq ħidma varja tal-Knisja, għodwa waħda jiena qomt kmieni kmieni u ħarist b’għajnejja nofshom magħluqa mit-tieqa tal-lukanda tagħna. Taħtna fi triq mill-aktar traffikuża, jiena rajt li kienu għalqu t-triq u fil-viċin kien hemm pulizija li beda jidderieġi l-karozzi biex jerġgħu jduru hekk kif jaslu ħdejn il-barriera. Għall-ewwel, kienu ftit biss il-karozzi li bdew jgħaddu minn dik it-triq u bdew jintalbu jduru lura. Iżda meta beda jgħaddi l-ħin u t-traffiku beda jiżdied, bdew jinġemgħu bosta karozzi.

Mit-tieqa ta’ fuq, jien stajt nara lill-pulizija bħallikieku qed jieħu gost li bl-awtorita tiegħu jibblokka t-traffiku u jġiegħel lin-nies imorru lura minn fejn ġew. Fil-fatt, hu deher li kien qed jieħu gost jitlajja hemmhekk bħallikieku qisu se jaqbad jiżfen kull darba li xi karozza tersaq viċin il-barriera. Jekk xi sewwieq jidher frustrat minħabba l-għeluq tat-triq, dan il-pulizija ma kienx jidher lest li jgħinu jew juri simpatija miegħu. Hu sempliċiment jibda jċaqlaq rasu u b’subgħajh jurih ’il fejn id-direzzjoni opposta.

Ħuti, ja dixxipli kollegi tiegħi fit-triq tal-ħajja mortali, il-pjan sabiħ ta’ Missierna, sewwasew il-pjan “favoluż” tiegħu,¹ huwa mfassal biex iġibkom lura d-dar, mhux biex iħallikom barra.² Ħadd ma poġġa xi barriera u ħalla lil xi ħadd ħdejha biex iġiegħlkom idduru lura u jibgħatkom ’l hemm. Fil-fatt, li jiġru huwa eżattament l-oppost. Alla jinsab ifittixkom b’persistenza kbira. Huwa “jrid li uliedu kollha jagħżlu li jerġgħu lura lejh,”³ u Huwa jagħmel kulma jista’ biex iġibkom lura.

Missierna kollu mħabba ssorvelja l-Ħolqien ta’ din l-istess dinja għall-għan propju li jipprovdi opportunità għalikom u għalija biex ikollna ċerti esperjenzi skomdi u rraffinati fil-mortalità, iċ-ċans ħalli aħna nużaw il-volontà morali li tana Alla biex nagħżlu lilu,⁴ ħalli nitgħallmu, u nikbru, niżbaljaw, nindmu, inħobbu ’l Alla u lil għajrna, u biex xi darba nerġgħu lura d-dar ħdejh.

Huwa bagħat lill-prezzjuż Ibnu l-Maħbub f’din id-dinja mitlufa biex jgħix l-esperjenza sħiħa umana, biex jagħti eżempju ħalli l-bqija ta’ wliedu jkunu jistgħu jimxu warajh, u biex jagħmel Espjazzjoni u jifdina. Ir-rigal espjatorju kbir ta’ Kristu jneħħi minn quddiemna kull barriera fiżika u spiritwali li tisseparana mid-dar eterna tagħna.

Kull ħaġa li tirrigwarda l-pjan tal-Missier għall-ulied maħbubin tiegħu hi intenzjonata biex twassal lil kulħadd lura d-dar.

Xi jsejħu l-messaġġier ta’ Alla, il-profeti tiegħu, dan il-pjan fl-iskrittura tar-Restawrazzjoni? Isejħulu l-pjan tal-fidwa,⁵ il-pjan ta’ ħniena,⁶ il-pjan kbir ta’ ferħ,⁷ u l-pjan tas-salvazzjoni li japplika għal kulħadd, “permezz ta’ demm l-Iben il-Waħdieni tiegħi.”⁸

L-intenzjoni tal-pjan kbir ta’ ferħ tal-Missier hi l-kuntentizzatagħkom, hawnhekk, bħalissa, u fl-eternitajiet. Mhijiex li jipprevjeni l-kuntentizza tagħkom u jġegħelkom minflok biex tinkwetaw u tibżgħu.

L-intenzjoni tal-pjan tal-fidwa tal-Missier hi fil-fatt il-fidwatagħkom, li intom tiġu salvati permezz tat-tbatija u l-mewt ta’ Ġesù Kristu,⁹ u ħielsa mill-jasar tad-dnub u l-mewt. Mhijiex li jħallikom kif intom.

L-intenzjoni tal-pjan ta’ ħniena tal-Missier hi li Huwa jestendi l-ħniena hekk kif intom terġgħu dduru lejh u tonoraw il-patt ta’ fedeltà tagħkom lejh. Mhijiex li jċaħħadkom mill-ħniena u minflok jixħet fuqkom l-uġigħ u n-niket.

L-intenzjoni tal-pjan tas-salvazzjoni tal-Missier hi fil-fatt is-salvazzjoni tagħkom fis-saltna ċelestjali tal-glorja hekk kif intom tirċievu t-testimonjanza ta’ Ġesù¹⁰ u toffrulu l-milja ta’ ruħkom.¹¹ Mhijiex li jħallikom barra.

Allura dan ifisser li kollox jgħaddi fejn tidħol kif ngħixu ħajjitna? Li l-mod kif nagħżlu li nużaw il-volontà tagħna ma jagħmilx differenza? Li aħna nistgħu nagħżlu liema kmandamenti ta’ Alla nobdu u liema le? Le, żgur li le. Bla dubju waħda mill-aktar stediniet konsistenti ta’ Ġesù waqt il-ministeru mortali tiegħu kienet biex aħna ninbidlu u nindmu u nersqu lejh.¹² Ħaġa fundamentali li nsibu fit-tagħlim kollu tiegħu biex ngħixu fuq pjanura ogħla ta’ mġiba morali¹³ hija s-sejħa għall-progress personali, għal fidi trasformattiva fi Kristu, għal bidla setgħana fil-qalb.¹⁴

Alla jrid għalina riorjentazzjoni radikali għall-impulsi egoisti u kollha kburija tagħna,¹⁵ fejn aħna “mmorru, u ma nidinbux aktar.”¹⁶

Jekk nemmnu li l-intenzjoni tal-pjan tal-Missier li jilħaq lil kulħadd hi li jsalvana, jifdina, u jestendilna l-ħniena, u b’hekk iwasslilna l-ferħ, x’inhi l-intenzjoni tal-Iben li permezz tiegħu ġei fis-seħħ dan il-pjan kbir?

L-Iben jgħid dwaru nnifsu: “Għax jiena nżilt mis-sema mhux biex nagħmel ir-rieda tiegħi, imma r-rieda ta’ min bagħatni.”¹⁷

Ir-rieda ta’ Ġesù hija r-rieda tal-Missier benevolenti! Huwa jridu li jagħmilha possibbli għal kull wieħed minn ulied Missieru li jirċievi l-għan aħħari tal-pjan—il-ħajja ta’ dejjem magħhom. Ħadd mhux eskluż minn dan il-potenzjal divin.

Jekk intom faċilment tinkwetaw li intom qatt m’intom se tkunu tajbin biżżejjed, jew li l-imħabba li jwasslilkom Kristu permezz tal-Espjazzjoni infinita tiegħu sejra bil-ħniena tiegħu tkopri lil kulħadd minbarra lilkom, mela allura mhux qed tifhmuha sew. Infinita tfisser infinita. Infinita tkopri lilkom u lil dawk li tħobbu.¹⁸

Nefi spjega din il-verità sabiħa: “Hu ma jagħmel xejn ħlief dak li hu ta’ benefiċċju għad-dinja; għax hu jħobb id-dinja, saħansitra jagħti ħajtu biex ikun jista’ jressaq lill-bnedmin kollha lejh. Għalhekk, m’hemm ħadd li jikkmanda li hu ma jgawdix mis-salvazzjoni tiegħu.”¹⁹

Is-Salvatur, ir-Ragħaj it-Tajjeb, imur ifittex in-nagħaġ il-mitlufa tiegħu sakemm isibhom.²⁰ Hu “mhux lest li jħalli waħda minnhom jintilef.”²¹

“Driegħi kollu ħniena lest għalikom, u kull min jiġi, lilu jiena nilqa’.”²²

“Hemm xi ħadd marid fostkom? Ġibuh hawn. Hemm min hu magħtub, jew għami, jew zopp, jew imġiddem, jew mifluġ, jew li hu trux, jew b’xi mod qed isofri? Ġibuh hawn u jien infejqu, għax jien għandi kompassjoni lejkom.”²³

Huwa ma keċċiex lill-mara li bdiet tnixxi d-demm; Huwa ma tbiegħedx mir-raġel imġiddem; Huwa ma tax dahru lill-mara żienja; Huwa ma rrifjutax lill-bniedem li nidem—kien x’kien id-dnub tiegħu. U Huwa mhux se jirrifjuta lilkom jew lil dawk li tħobbu meta intom tofrulu l-qalb maqsuma u l-ispirtu niedem tagħkom. Din mhijiex l-intenzjoni tiegħu jew l-għan tiegħu, jew il-pjan, l-iskop, ix-xewqa jew it-tama tiegħu.

Le, Huwa ma jagħlaqx it-triq u ma jpoġġix barrieri; Huwa jneħħihom. Huwa ma jħallikomx barra; Huwa jilqagħkom ġewwa.²⁴ Il-ministeru kollu tiegħu kien dikjarazzjoni ħajja tal-intenzjoni tiegħu.

Imbagħad bla dubju hemm is-sagrifiċċju espjatorju tiegħu, li hu aktar diffiċli biex aħna nifhmuh, li jiżboq dak li aħna kapaċi nifhmu. Iżda, u din hija “iżda” importanti, aħna nifhmu, u nistgħu nifhmu, l-intenzjoni qaddisa, li twassal għas-salvazzjoni, tas-sagrifiċċju espjatorju tiegħu.

Il-velu tat-tempju nqasam fi tnejn meta Ġesù miet fuq is-salib, u dan jissimbolizza li dak l-aċċess lura għall-preżenza tal-Missier infetaħ beraħ—għal dawk kollha li jduru lejh, jafdawh, iħalluh jgħinhom iġorru t-tagħbija tagħhom, u jieħdu fuqhom il-madmad tiegħu f’rabta ta’ patt.²⁵

Fi kliem ieħor, il-pjan tal-Missier mhuwiex biex joħolqilna l-barrieri. Qatt ma kien; qatt mhu se jkun. Hekk xi ħwejjeġ li hemm bżonn nagħmlu, kmandamenti li għandna nħarsu, jew xi aspetti min-natura tagħna x’nibdlu? Iva. Iżda bil-grazzja tiegħu, dawn huma ħwejjeġ li nistgħu nagħmlu, mhux impossibbli.

Din hija l-aħbar it-tajba! Jiena m’għandix kliem biex infisser il-gratitudni tiegħi għal dawn il-veritajiet sempliċi. L-iskop tal-Missier, il-pjan tiegħu, l-għan tiegħu, l-intenzjoni tiegħu, ix-xewqa tiegħu, u t-tama tiegħu huma kolllha biex ifejqukom, huma kollha biex iwasslulkom il-paċi, huma kollha biex iwasslu lilkom u lill-maħbubin tagħkom lura d-dar. Dwar dan jiena nixhed f’isem Ibnu Ġesù Kristu, ammen.