Ċempel, Ma Tmurx Taqa’

Illum nixtieq nibda billi nixhed dwar iċ-ċertezza kbira li għandi f’qalbi li Alla jisma’ talbna u jweġibhom b’mod mill-aktar personalizzat.

F’dinja li għaddejja minn żminijiet mimlija inċertezza, uġigħ, diżappunt, u qsim il-qalb, aħna nafu nħossuna inklinati li niddependu aktar fuq l-abbiltajiet u l-preferenzi personali, kif ukoll fuq l-għarfien u s-sigurtà li tagħtina d-dinja. Dan jaf iwassalna biex inpoġġu fl-isfond is-sors vera tas-sokkors u l-għajnuna li jista’ jikkontrobatti l-isfidi ta’ din il-ħajja mortali.

Immaġni

Kamra ta’ sptar.

Niftakar darba meta kelli niddaħħal l-isptar minħabba marda, u kien diffiċli għalija li norqod. Meta tfejt id-dawl u l-kamra spiċċat fid-dlam, stajt nara kliem mixgħul mas-saqaf quddiemi li jgħid, “Ċempel, ma tmurx taqa’.” B’sorpriża għalija, l-għada erġajt osservajt l-istess messaġġ jirrepeti ruħu f’bosta nħawi tal-kamra.

Immaġni

Tabella li tgħid Ċemplu, jew sejħu, ma tmorrux taqgħu.

Għalfejn il-messaġġ kien daqstant importanti? Meta staqsejt lill-infermiera dwar dan, hija qaltli, “Dak huwa biex jipprevjeni xi waqgħa u tispiċċa muġugħ aktar milli int.”

Din il-ħajja, min-natura tagħha, iġġib magħha esperjenzi diffiċli, xi wħud huma inerenti għall-ġisem fiżiku tagħha, oħrajn għad-dgħufijiet jew għall-mard li jkollna, xi oħrajn riżultat ta’ kif oħrajn jużaw il-volontà tagħhom, u oħrajn għall-mod kif nużaw il-volontà tagħna.

Teżisti wegħda aktar qawwija minn dik li s-Salvatur innifsu għamel meta Huwa ddikjara, “Itolbu, u jingħatalkom; fittxu, u ssibu; ħabbtu, u jiftħulkom”?¹

It-talb huwa l-mezz ta’ komunikazzjoni ma’ Missierna fis-Smewwiet li jagħtina ċ-ċans li “nċemplu, ma mmorrux naqgħu.” Madankollu, hemm ċerti ċirkustanzi li fihom nafu naħsbu li t-telefonata tagħna ma semagħha ħadd għax ma nirċievu l-ebda tweġiba immedjata jew skont l-aspettattiva tagħna.

Dan xi kultant iwassal għal anzjetà, niket, jew diżappunt. Iżda ftakru fl-espressjoni ta’ fidi fil-Mulej li lissen Nefi meta qal, “Għalfejn mela ma jistax jurini kif għandi nibni ġifen?”² Issa, nistaqsikom, għalfejn mela il-Mulej ma jistax jurikom x’għandkom tagħmlu biex ma taqgħux?

Li nkunu kunfidenti fit-tweġibiet li jagħtina Alla jimplika li naċċettaw li t-triqat tiegħu mhumiex dejjem it-triqat tagħna³ u li “kollox jiġi fis-seħħ fi żmienu.”⁴

Iċ-ċertezza li nkunu nafu li aħna wlied Missier fis-Smewwiet kollu mħabba u ħniena għandha timmotivana biex “inċemplu” permezz tat-talb devot b’attitudni ta’ “nitolbu dejjem, bla heda; … ħalli l-ħidma tagħna tkun għall-ġid ta’ ruħna.”⁵ Immaġinaw kif iħossu Missierna fis-Smewwiet meta f’kull talba li nitolbu aħna nagħmlu dan f’isem ibnu, Ġesù Kristu. Jien nemmen li aħna nkunu qed nuru ċerta qawwa u ħlewwa meta nagħmlu dan!

L-iskrittura mimlija eżempji ta’ dawk li sejħu lil Alla biex ma jaqgħux. Ħelaman u l-armata tiegħu, meta kienu qed iħabbtu wiċċhom mal-hemm, sejħu lil Alla, u fetħu qalbhom miegħu f’talbhom. Huma rċevew assigurazzjoni, paċi, fidi, u tama, u hekk kisbu kuraġġ u determinazzjoni sakemm fl-aħħar kisbu l-għan tagħhom.⁶

Immaġinaw kif Mosè seta’ sejjaħ u talab lil Alla meta sab lilu nnifsu bejn il-Baħar tal-Qasab min-naħa u l-Eġizzjani ġejjin biex jattakkawh min-naħa l-oħra, jew Abraham meta obda l-mandat biex jissagrifika lil Ibnu Iżakk.

Jiena ċert li lkoll kemm intom kellkom u se jkollkom esperjenzi meta li ċċemplu, jew issejħu, tkun l-unika tweġiba biex ma taqgħux.

Tletin sena ilu, meta jien u marti konna qed inħejju għaż-żwieġ ċivili tagħna u għaż-żwieġ tagħna fit-tempju, aħna rċevejna telefonata biex jgħidulna li ż-żwieġ ċivili tagħna ġie kkanċellat minħabba strajk. Aħna rċevejna din it-telefonata tlett ijiem qabel iċ-ċerimonja li kellna skedata. Wara li ppruvajna naraw nagħmlux xi appuntament ma’ uffiċċji oħra u ma sibna xejn disponibbli, aħna bdejna nitnikktu u niddubitaw kemm stajna niżżewġu kif kien ippjanat.

Jien u l-għarusa tiegħi “sejjaħna” lil Alla, billi ftaħna qalbna miegħu f’talbna. Finalment, xi ħadd qalilna dwar uffiċċju f’raħal żgħir fil-periferija tal-belt fejn is-sindku kien xi ħadd li konna nafuh. Mingħajr ma ħsibnieha xejn, morna niltaqgħu miegħu u staqsejnieh jekk kienx possibbli li jżewwiġna hu. B’ferħ għalina, hu qabel li jagħmel dan. Is-segretarja tiegħu enfasizzat magħna li kellna niksbu ċertifikat f’dak ir-raħal u neħdulhom id-dokumenti kollha qabel nofsinhar tal-għada.

L-għada, aħna morna f’dak il-raħal żgħir u bqajna sejrin fl-istazzjon tal-pulizija biex nitolbuhom id-dokument meħtieġ. B’sorpriża għalina, l-uffiċjal qal li ma setax jagħtihulna, għax f’dan ir-raħal kien hemm bosta koppji żgħażagħ li kienu qed jaħarbu mill-familji tagħhom biex jiżżewġu b’mod sigriet, li bla dubju ma kienx il-każ tagħna. Għal darb’oħra, erġajna mtlejna bil-biża’ u n-niket.

Niftakar li kont sejjaħt fis-skiet lil Missieri fis-Smewwiet biex ma mmorrux naqgħu. F’moħħi feġġ ħsieb mill-aktar ċar, li beda jgħidli ripetutament, “Rakkomandazzjoni tat-tempju, rakkomandazzjoni tat-tempju.” Jien dlonk ħriġt ir-rakkomandazzjoni tat-tempju u tajtha lill-uffiċjal, b’sorpriża kbira għall-għarusa tiegħi.

Kemm kienet sorpriża sabiħa meta smajna lill-uffiċjal jgħid, “Għalfejn m’għidtulix li intom membri tal-Knisja ta’ Ġesù Kristu tal-Qaddisin tal-Aħħar Żmien? Jien midħla sew tal-knisja tagħkom.” Huwa dlonk beda jħejji d-dokument. Aħna ssorprendejna ruħna aktar meta l-uffiċjal ħalla l-istazzjon mingħajr ma qal xejn aktar.

Għaddew ħamsin minuta u baqa’ ma ġiex lura. Kienu diġà nofsinhar nieqes ħamsa, u kellna biss sa nofsinhar biex nissottomettu l-karti tagħna. Fil-pront huwa tfaċċa quddiemna b’ġeru żgħir u qalilna li kien rigal tat-tieġ għalina u tahulna flimkien mad-dokument.

Aħna ġrejna lejn l-uffiċċju tas-sindku, bid-dokument tagħna u bil-kelb ġdid tagħna. Imbagħad rajna karozza uffiċjali riesqa lejna. Jien waqaft quddiemha. Il-karozza waqfet, u fiha rajna lis-segretarja. Hekk kif ratna qaltilna, “Jiddispjaċini, għidtilkom li sa nofsinhar. Issa se jkolli mmur fuq biċċa xogħol oħra.”

Jiena umiljajt lili nnifsi fis-skiet, sejjaħt b’qalbi kollha lil Missieri fis-Smewwiet, u tlabtu għal darb’oħra għall-għajnuna biex “ma naqgħux.” F’daqqa waħdaI, seħħ miraklu. Is-segretarja qaltilna, “Kemm għandkom kelb ħelu. Fejn nista’ nsib wieħed bħalu għat-tifel tiegħi?”

“Dan għalik” weġibtha fil-pront.

Is-segretarja ħarset lejna sorpriża u qalet, “Tajjeb, ejja mmorru fl-uffiċċju u nirranġaw kollox.”

Jumejn wara, jien u Carol iżżewwiġna b’mod ċivili, kif pjanat, u mbagħad ġejna ssiġillati fit-Tempju ta’ Lima, fil-Peru.

Bla dubju, jeħtieġ niftakru li li nsejħu hija kwistjoni ta’ fidi u azzjoni—fidi li nagħrfu li aħna għandna Missier fis-Smewwiet li jisma’ talbna skont l-għerf infinit tiegħu, u mbagħad, azzjoni konsistenti ma’ dak li tlabna għalih. It-talb—li nsejħu—jaf ikun sinjal tat-tama tagħna. Iżda li nieħdu azzjoni wara li nitolbu huwa sinjal li l-fidi tagħna hija reali—fidi li ġiet ippruvata f’mumenti ta’ wġigħ, biża’, jew diżappunt.

Nissuġġerixxi li intom tikkunsidraw dan li ġej:

1. Aħsbu dejjem fil-Mulej bħala l-ewwel post fejn tmorru għall-għajnuna.

2. Ċemplu, jew sejħu, ma tmorrux taqgħu. Duru lejn Alla fit-talb sinċier tagħkom.

3. Wara li titolbu, agħmlu dak kollu li tistgħu biex tiksbu l-barkiet li tlabtu għalihom.

4. Umiljaw lilkom infuskom biex taċċettaw it-tweġiba fil-ħin tiegħu u bil-mod tiegħu.

5. Tiqfux! Ibqgħu mexjin ’il quddiem fit-triq tal-patt sakemm tistennew it-tweġiba.

Jista’ jkun li bħalissa hawn xi ħadd li, minħabba ċ-ċirkustanzi, iħossu se jaqa’ u jixtieq isejjaħ b’qalbu kollha kif għamel Joseph Smith: “O Alla, fejn int? … Kemm se ddum tarani nsofri?”⁷

Anke f’ċirkustanzi bħal dawn, itolbu bi “spinta spiritwali” kif għallimna l-President Russell M.Nelson,⁸ għax talbkom dejjem jiġi mismugħ!

Ftakru din l-għanja:

Hekk kif aħna nitlobu, aħna nħossu t-tgħannieqa ta’ Missierna fis-Smewwiet, li bagħat lill-Iben il-Waħdieni tiegħu biex itaffilna t-tagħbija tagħna, għax jekk aħna nsejħu lil Alla, jiena nixhed li aħna żgur ma naqgħux. F’isem Ġesù Kristu, ammen.