Ia ati-noa-hia e te rima o to’na ra aroha

I to‘u fariiraa i teie piiraa, ua taparu vau i to‘u Metua i te Ao ra ia faaite ia‘u eaha te mau hinaaro o te mau tuahine o te Ekalesia. Ua farii au i te hoê iteraa papû e, te hinaaro nei tatou o Ta’na mau tamahine ia ite e, ua here anei Oia ia tatou. Te hinaaro nei tatou ia ite e, te ite maira anei Oia i te maitai i roto ia tatou. Te iteraa i To’na here, e faaitoito te reira ia tatou ia haere ti‘a’tu i mua i te ti‘a-maite-raa, no te haapapû ia tatou e, e mau tamarii tatou Na’na, e no te haapapû ia tatou e, te poihere nei Oia ia tatou noa’tu ta tatou mau hape e rave nei e to tatou mau hupehupe.

Ua farii au i teie nei parau haapapûraa i to‘u horo‘araa i to‘u iteraa papû i roto i te putuputuraa o te Amuiraa Rahi o te Sabati avatea i te ava‘e Eperera matahiti 2002. I taua po‘ipo‘i ra, ua faaitehia mai ia‘u e, eita paha Elder Haight e a‘o i roto i te amuiraa. Mai te mea e tupu mau te reira, e horo‘ahia e pae minuti na‘u ia horo‘a i to‘u iteraa papû. Ia ite mai outou e, ua pure au no Elder Haight i taua mahana ra ! I te po‘ipo‘i Sabati, ua hi‘o atu vau ia’na i te haereraa mai i roto i te Pû Amuiraa, topa ihora to‘u hau – e tae roa’tu i te taime ua ti‘a oia ma haere ê atu i te taime o te himeneraa a te amuiraa. I to‘u râ ti‘araa’tu i te pupiti i taua avatea ra, ua ereere roa te paruru e i ni‘a i te reira e piahia’i te mau a‘oraa! Area te mana‘o e aputa noa maira i roto i to‘u feruriraa e i to‘u aau oia ïa ia te hinaaro nei te mau vahine ia ite i te here o te Fatu i roto i to ratou oraraa. Ua ite au e, o te parau poro‘i ïa i titauhia ia‘u ia horo‘a i taua mahana ra, e te tamau noa nei teie parau poro‘i i te riro ei parau poro‘i na matou.

Ua haehaa roa to‘u aau na roto i to outou fariiraa mai i teie parau poro‘i aroha. Mauruuru no to outou faaiteraa e e mea nahea teie parau poro‘i i te haamaitairaa i to outou oraraa. Ua faaite papû mai ta outou mau parau e, e tura to tatou tata‘itahi – e te hinaaro nei – ia ite i te here o te Fatu i roto i to’na oraraa.

Ua here to tatou Metua i te Ao ra ia tatou hou tatou a haere mai ai i te fenua nei. Ua ite au e te here nei Oia ia tatou, te mau tuahine, oia’toa Ta’na Tamaiti o Iesu Mesia. E eita roa teie here e taui – e mea tamau te reira. E nehenehe outou e turu‘i i ni‘a i te reira. E nehenehe tatou e ti‘aturi i te reira.

Mai ta te tumu parau a te Sotaiete Tauturu e faahaamana‘o mai nei ia tatou e « e ore roa te aroha e mou », e mea ti‘a ia ti‘aturi tatou e e ore roa te here o te Mesia e mou. Te mau mea’toa o ta tatou e rave i roto i te Sotaiete Tauturu, e mea ti‘a ia faahoho‘a te reira i te here o to tatou Faaora e te here o to tatou Metua i te Ao ra. E mea ti‘a teie here rahi ia riro ei puna no to tatou hinaaro i te tavini ia vetahi ê. Ia riro te reira ei na tumu e piti atoa oia to tatou fetiiraa e to vahi i faataahia no tatou !

Ua matau vau i te hoê metua vahine e pae ana tamarii tei niuniu i te hoê tuahine paari o ta’na i faariro ei orometua faufaa no’na e ui atura, « E nehenehe anei taua e ori-haere i ni‘a i te mou‘a ? » Ua taa i teie hoa e, te hinaaro nei teie tuahine i te aparau. I te afaraa o na kilometera hoê ahuru ma toru o teie haaatiraa, parau maira teie mama apî e, « Aita vau e mana‘o ra e te here nei te Metua i te Ao ra ia‘u; rave rahi o ta‘u mau hape e rave nei i roto i to‘u oraraa. Aita vau e mana‘o nei e mea ti‘amâ vau i To’na here; nahea ïa Oia ia here ia‘u ? » E vahine teie o tei rave i te mau fafauraa o te hiero e e mea itoito hoi i roto i te Ekalesia. Inaha râ, aita oia e mana‘o nei e e mea ti‘amâ oia i te here o to’na Metua i te Ao ra. Pahono vitiviti atura teie tuahine paari e, « oia, te here nei Oia ia oe. E tamahine oe Na’na ».

Te faaru‘e tamau ra anei tatou i te here o te Fatu o Ta’na e ninii tamau noa mai nei e o ta tatou e hinaaro nei i te farii ? Te mana‘o ra anei tatou e titauhia tatou ia maitai roa no te fariiraa i To’na here ? Ia faati‘a tatou ia tatou iho ia ite e « ua ati-noa-hia tatou e te rima o to’na ra aroha »,¹ ua paruruhia ïa tatou, e ite ïa tatou e aita tatou e titauhia ia maitai oioi roa. E mea ti‘a ia ite tatou e te maitai roa o te hoê ïa rave‘a. E evanelia teie no te haereraa mure-ore i mua, e e mea ti‘a ia tatou ia oaoa i teie nei haereraa i mua. Te auraa o te parau « mure ore » oia ïa aita o’na e haamataraa e aita e hopearaa, e e vai te ati-noa-raa i To’na ra aroha no tatou i te mau mahana atoa. A haamana‘o e vai tamau noa te reira noa’tu e aita tatou e ite i te reira. E mea here na‘u te faahoho‘araa a Nephi no teie nei hororahi, « To te Atua aroha… tei tauturu mai i te aau o te mau tamarii a te taata nei ; no reira, e mea hinaarohia ïa i te mau mea atoa… e e mea oaoa roa ïa i te varua ».² E te faaite papû nei au i e e parau mau te reira.

Ua ite au e, te vai nei paha o te tapitapi nei ia feruri e eaha râ te huru o To’na aroha. A feruri na i te hoê mama e ta’na aiu fanau apî. Na te mahanahana, te parururaa, te aupururaa e te hau o te hiiraa a te hoê mama e tauturu ia tatou ia ite eaha mau te huru ia ati-noa-hia e te rima oTo’na ra aroha. Ua papa‘i te hoê tuahine apî no te Sotaite Tauturu e, « E mea na roto noa i te here o to‘u mama vau i ite ai i te rahi e i te mana o te aroha o te Faaora ».

E te mau metua vahine, te ite ra outou e e mea faufaa na outou ia haapii i teie parau mau i ta outou mau tamarii ? A ati-noa-hia’i ta outou mau tamarii i roto i to outou here, e ite ïa ratou i te hoê tuhaa o To’na aroha. Te titau u‘ana mai nei te peresideni Hinckley ia tatou ia « Here i te Fatu to tatou Atua, e ia here i Ta’na Tamaiti, e ia mauruuru no to’na here ia tatou. Ia mure to vetahi here, te vaira ïa teie here anaana, te teitei, e te mure ore o te Atua no tatou tata‘itahi e te here o Ta’na tamaiti, o tei horo‘a i To’na ora »³ no tatou tata‘itahi.

Te hoê metua vahine o tei ite papû i to’na auraa e te Atua, e tauturu oia i ta’na mau tamarii ia ite i te Atua e ia ati-noa-hia i To’na ra aroha. Ua putapû-roa-hia vau i te mau parau o ta te hoê tamahine i parau i te hunaraa o to’na metua vahine 100 matahiti : « I to‘u apîraa, te tamata ra vau i te faanaho i te tabula ohipa o ta‘u piha haapiiraa, e haere au i roto i te fare tutu e te auri ra to‘u mama. E faaite au ia’na i te tahi mau maitiraa no ta‘u haapiiraa… e faaroo mai oia i te taatoaraa. Ei reira maua e aparau ai i te mau rave‘a… e e parau mai oia e, ‘Na reira, e Cathy, ua pure anei oe no te reira ?’ Ma te haama rii e te feaa rii e pahono atu ia vau e, ‘e mea titauhia ia pure no te mau mea’toa ?’ E pahono ohie mai oia e, ‘Te na reira noa nei au.’ »⁴

E faaroo maitai teie metua vahine. Ua faaitehua oia i to’na faaroo i roto i te Fatu, ua faaite oia i te hoê hoho‘a maitai, ua faaite oia i to’na iteraa atea i ta’na tamahine ia hoi tamau i te Fatu. A haafatata’tu ai tatou i te Fatu, e ite tatou i To’na here ia piri mai ia tatou. E te mau metua vahine e, a haapii i ta outou mau tamarii ia faaô tamau mai i te Fatu i roto i to ratou oraraa e a tauturu ia ratou ia ite i Ta’na faaûruraa here.

Hoê a mahana to maua to‘u mama fariiraa i to maua haamaitairaa patereareha. E 20 to‘u matahiti e e 49 to to‘u mama i te reira taime. Eita roa e mo‘ehia ia‘u taua mahana ra – i to te patereareha tuuraa i to’na na rima i ni‘a i te upoo o to‘u mama ua faaite teie paterealeha ia’na e mea tamau to’na oraraa i te paruruhia i te mau fiva puai o te rumati, te ma‘i mafatu, e te tahi atu mau ma‘i. Ua faati‘a oia i te mau mea tei tupu i roto i to’na oraraa, ma te tata‘u i te mau taime o ta to‘u mama i haamaitai ia vetahi ê i roto i to’na oraraa. Ua faaite atoa oia ia’na i te mau mea o ta te Fatu i faaherehere na’na e ua pûpû i te arata‘iraa no te mau mea o ta’na e hinaaro i te rave. Ua ite au i te oraraa o to‘u mama; a faaroo ai au i teie patereareha tei mataro-ore-hia e to‘u mama, i te tata‘uraa i to’na oraraa. Ua riro teie iteraa ei iteraa papû e, te ora nei te Atua, e te here nei Oia ia tatou, e ua ite Oia ia tatou tata‘itahi. Ua ite au i te here o te Fatu no to‘u mama – e no‘u iho nei – i taua mahana tuiroo rahi ra.

Te tapa‘o faaite rahi a‘e râ o te here o to tatou Faaora no tatou, o Ta’na ïa Taraehara. Ua î To’na here i te maitai, te faaoromai, te aroha e te faaoreraa hara.

I teie nei, ei mau mama ruau, e hopoi‘a mo‘a na tatou ia ati-noa i ta tatou mau mootua i te aroha. I te oreraa te hoê tamarii iti e toru matahiti e faatura, ua haapii to’na mama ruau ia’na ma te parau e, « Eiaha oe e parau mai te râ te huru i to oe mama ruau, no te mea e riro taua ei hoa milioni e milioni atu matahiti ». E ere anei te mea maitai ia riro ei mama ruau ? A haamana‘o, e au mau tuahine, ua ruuruu amui te here e te mau fafauraa ia tatou ei mau utuafare mure ore.

Mea pinepine te here o te Fatu i te horo‘ahia mai na roto ia vetahi ê, a faaroo ai ratou i te muhumuhu o te Varua. Te faaroo ra anei e te haapa‘o ra anei tatou i te reira mau muhumuhu ?

Na roto i te aroraa fifi i te pae no te moni, i ti‘a ai i te hoê tuahine ia faru‘e i to’na fare e i ta’na paroita i muri mai i to’na nohoraa e 22 matahiti i reira. E mea mauiui mau. I te Sabati matamua i roto i ta’na paroita apî teie ta’na i parau, « Ua mo‘emo‘e roa vau, noa’tu e ua matau rii au tau rii taata. O vau tei tae oioi atu i te pureraa a te Sotaiete Tauturu i taua po‘ipo‘i ra. Ua parahi noa vau i reira e ua mata‘ita‘i au i te mau tuahine i te faaîraa i te mau parahiraa. E au e, ua ite iho â ratou i to ratou mau ana‘iraa eiha noa to ratou iho mau parahiraa. Aita roa ratou i parahi i pihai iho ia ratou iho e i pihai iho ia‘u. E au vau mai te hoê motu te huru ». E te mau tuahine e, no te aha tatou e na reira ai ia tatou iho ?! E teie faahou â, « I muri iho, ua haere mai o Lisa. I to’na iteraa mai ia‘u, ua oaoa to’na mata, e ua haere ti‘a mai oia e parahi i pihai iho ia‘u, ma te tauahi ia‘u. E auraa maere mau to te hoê mea iti na‘ina‘i. Na to’na mahanahana » – e to’na atoa here – i tinai ê i to‘u mo‘emo‘e ».

Te măta‘u nei au i te tahi mau taime e e ite noa tatou i te here o te Fatu i roto noa i te mau ohiparaa rahi o to tatou oraraa ; e mea ti‘a atoa râ ia tatou ia ite i To’na here i roto i te mau mea riirii. Eiaha e ti‘aturi-ore i to outou paari no te opereraa i To’na here na roto i te hoê peu iti mau, mai te parahiraa i pihai iho i te hoê tuahine e i te haamanavaraa mai ia’na.

Te ite ra anei outou i te here o te fatu i roto i to outou oraraa ? E riro to‘u iteraa i To’na here ei mea taa ê i to outou iteraa. Te taviri, o te iteraa ïa e mea nahea to outou iteraa i taua here ra. E ia itehia te reira ia outou, a faaite atu ïa i te reira.

Ei peresideniraa, ua haere matou e mata‘ita‘i i te oo‘a o Mehiko i muri mai i te Mata‘i Rorofa‘i o Katrina. I te hoê pô i roto i te pureraa pae auahi, te ti‘a ra vau i te pupiti ua faaûruhia vau e te hinaaro papû nei te mau tuahine tata‘itahi i roto i teie amuiraa i te hoê taata no te tauturu e no te faaitoito ia ratou. I muri mai i te pureraa, ua ti‘a’tu te tuahine Hughes, te tuahine Pingree e o vau nei i te mau opani tata‘itahi e ua tauahi matou i te mau tuahine atoa a haere ê atu ai ratou na teie mau opani. Ua hinaaro noa matou i te faaite i to matou here ia ratou. Mai te mea te faaroo mai nei teie mau tuahine i teie pô, ua faaru‘e matou i ta outou fare pureraa ma te faaapîhia i te here o te Atua o ta outou i horo‘a ia matou. Mauruuru no te haapa‘oraa te tahi i te tahi – e ia matou e toru nei!

I roto i ta‘u mau pure o te po‘ipo‘i, e ani au i te Metua i te Ao ra ia faî ia‘u i To’na here ia nehenehe au e rave i Ta’na ohipa ma to‘u aau atoa. Ua ite au e ua haamaitaihia vau na roto i teie aniraa tuutuu-ore. Ei mau tuahine no te Sotaiete Tauturu, e mea ti‘a ia faaitoito tatou ia faaite i te here o te Mesia o tei opua i te faaoaoa noa i To’na Metua na roto i te raveraa i To’na hinaaro. E te mau tuahine e, e mea ti‘a ia faaitoito tatou i te peeraa i To’na hi‘oraa hau a‘e – i te faaite i taua here ra na roto i to tatou mau mana‘o, i ta tatou mau parau, i ta tatou mau ohipa – i roto i te mau mea’toa o ta tatou e rave. Eiaha tatou e vaiiho i te te‘ote‘o e aore râ, i te faarahi, te pipiri e aore râ, to tatou mau hiaai ia faatea ê i to tatou hinaaro i te ati-noa-hia i te here o te Atua. Te rave‘a maitai a‘e no te reira, o te fariiraa ïa i te taraehara mure ore a te Faaora. I reira tatou e faaaano ai i taua haamenemeneraa ra no te faaô mai i to tatou utuafare e ia vetahi ê. E titau manihini taua haamenemeneraa ra i te Faaora e i to tatou Metua i te Ao ra i roto i to tatou aau e i to tatou oraraa. E taua haamenemeneraa ra, tei roto ïa i te ra‘i.

E au mau tuahine here, ia haamaitai mai te Fatu ia outou ia ite outou i To’na here i te mau mahana atoa na roto i to outou hapa‘oraa i ta outou mau fafauraa, te faaiteraa i te aroha e te faaitoitoraa i te mau utuafare. Na roto i te io‘a o Iesu Mesia, amene.