Te faaite nei matou i te iteraa papû i to te ao nei

E te mau taea‘e e te mau tuahine, te haaputuputu nei tatou no te tahi atu amuiraa rahi, te oaoa nei au ia faaite atu e, te tupu tamau noa nei te Ekalesia i te puai e te ti‘aturihia. I te matahiti 1982, a 24 matahiti rii i teie nei, ua tapa‘o vau i roto i to‘u buka aamu e : « Te vai ra te tau e haamauhia ai hau atu e 300 reni haapurororaa i ni‘a i ta tatou pahi peeutari no te amuiraa rahi no atopa. To’na auraa ra maori râ, e hau atu e 300 fare tĭtĭ na tatou i reira to tatou mau taata e haaputuputu ai i tera fenua e tera fenua no te faaroo i te amuiraa ».

Ua faaitehia mai ia‘u e, i teie nei te vai nei ta te Ekalesia iho e 6,066 pû haruharuraa reni peeutari i roto e 83 fenua. E oaoa rahi to‘u i te mea e, i roto i to tatou tupuraa rahi ua tupu atoa i te rahi te mau rave‘a no te farerei e no te paraparau i te Feia Mo‘a i te mau Mahana Hopea nei i te ao atoa nei.

I teie nei, te hinaaro nei paha tatou ia rahi atu te bapetizoraa i te mau Hau Amui no Marite nei e i Canada, e nehenehe atoa e faahiti i te reira parau no te mau huru vahi atoa i te ao nei. Area râ, te rahi mau nei te auhune o te melo i roto e 160 rahiraa fenua. I te vahi e aita i rahi te Feia Mo‘a i te mau Mahana Hopea nei aita i maoro a‘e nei, i teie mahana, te vai nei te mau paroita e te mau tĭtĭ puai i reira, e te mau tane e te mau vahine faaroo e te aravihi i roto i te faatereraa.

Noa’tu e, e mea fifi rii no matou ia tere i te mau vahi i titauhia ia matou ia tere, ua monohia te reira titauraa i to te Peresideniraa Matamua, te mau melo no te Tino Ahuru Ma Piti, e te Hitu Ahuru, na roto i te paraparauraa na ni‘a i te rave‘a peeutari, i te mau tĭtĭ e rave rahi ati a‘e te ao nei.

Ua taui te tau, ta matou râ parau poro‘i, aita ïa i taui. Te faaite papû nei matou i to te ao nei e, ua vetea te mau ra’i, ua fâ mai e ua paraparau mai te Atua to tatou Metua i te Ao ra, e Ta’na Tamaiti, te Fatu ti‘afaahou. Te pŭpŭ atu nei matou i to matou iteraa hanahana e, ua faaho‘i-faahou-hia mai te autahu‘araa, e tae noa’tu i te mau taviri e te mana no te mau haamaitairaa mure ore.

Aita i maoro a‘e nei i haamo‘a matou i te hiero apî no Sacramento i Kalifonia, te hitu o te hiero i roto i te reira tuhaa fenua e te 123raa o te hiero i te ao nei. Ua tapu atoa matou i te repo no te tahi atu hiero i Salt Lake.

Te oaoa nei matou ia faaara atu e, te tere maitai nei te faaapîraa i te Fare Menemene no Roto Miti ia au i te tarena i faataahia, e i teie tau faatupuraa raau i muri nei, e faaohipa-faahou-hia teie fare nehenehe roa na te Pŭpŭ himene no te fare menemene no ta’na mau haapurororaa hepetoma.

Te haa nei te Ekalesia i roto i te hoê faanahoraa rahi no te paruru i te heipuni o Temple Square. E haamau‘araa rahi te titauhia, eita râ te reira e ravehia i roto i te moni tuhaa ahuru.

Area râ, te tamau noa nei â to tatou mau melo i te faaite i to ratou faaroo i roto i te parau no te aufauraa i te tuhaa ahuru.

Ia hi‘o-ana‘e-hia te mau mea atoa, ta‘u noa e nehenehe e parau atu, maori râ, e haamaitairaa rahi ta te Fatu e ninii mai nei i ni‘a i Ta’na Ekalesia, e tei ia tatou te hopoi‘a no te imiraa i te mau rave‘a atoa no te faahaere i te reira i mua.

I teie nei, e te mau taea‘e e te mau tuahine, i muri a‘e i te himene a te pŭpŭ himene, faaroo ana‘e tatou i te mau parau a to tatou mau taea‘e e to tatou mau tuahine. E i roto i teie amuiraa rahi na tatou ia arata‘i mai te Varua o te Fatu i te mau mea atoa e ravehia e e parauhia, e ia î roa hoi to tatou aau e to tatou feruriraa, ta‘u ïa pure na roto i te i‘oa o Iesu Mesia ra, amene.