Te haaputuputuraa ia Iseraela i haapurara-ê-hia

I mutaa ihora, ua haamaitai te Fatu i te Metua Aberahama na roto i te hoê fafauraa no te faariro i to’na ra huaai ei nunaa ma‘itihia.¹ E rave rahi te mau faahitiraa i teie nei fafauraa i roto i te mau papa’iraa mo‘a atoa. Tei roto atoa te mau fafauraa e e tae mai te Tamaiti a te Atua na roto i te reni heeraa o Aberahama e e fatu-ai‘a-hia te tahi mau fenua, e e haamaitaihia te mau nunaa e te mau opu o te fenua nei na roto i to’na ra huaai e e rave rahi atu â mau fafauraa.² Noa’tu e ua tupu a‘ena te tahi tuhaa o taua fafauraa ra, te haapii nei te Buka a Moromona e e tupu teie nei fafauraa a Aberahama i roto ana‘e i teie nei mau mahana hopea nei !³ Te haapapû atoa nei te reira e tei rotopu tatou i te nunaa fafauhia a te Fatu.⁴ E haamaitairaa na tatou ia riro ei tuhaa no te faatupuraa i teie nei mau fafauraa. Auê ïa taime faahiahia no te ora !

Ei mau huaai no Aberahama, ua noaa i te mau opu no Iseraela no mutaa iho ra, te mana autahu‘araa e te mau haamaitairaa o te evanelia, ua orurehau râ te nunaa i muri iho. Ua taparahi pohe ratou i te mau peropheta e ua faautu‘ahia ratou e te Fatu. Ua afa’i-ê-hia’tu na ati hoê ahuru i roto i te faatîtîraa i Assyria. Mai reira’tu ua mo‘ehia ratou i roto i te mau buka a te taata nei (Oia mau, aita na ati hoê ahuru « i mo‘e » i te Fatu). Ua tamau noa na ati e piti i vai mai no te hoê tau poto e i muri iho, no to ratou orurehau, ua afa’i-ê-hia’tu ratou i te faatîtîraa i Babulonia.⁵ I to ratou hoiraa mai, ua herehia ratou e te Fatu, area râ, aita faahou â ratou i faatura Ia’na. Ua pato‘i ratou e ua faaino ratou Ia’na. Ua tapu ra te hoê Metua here e te oto, « E haapurara vau ia outou i te mau fenua »,⁶ e ua na reira Oia – na te mau nunaa atoa.

E mea maramarama maitai atoa te fafauraa a te Atua no ni‘a i te haaputuputuraa o Iseraela i haapurara-ê-hia.⁷ Ei hi‘oraa, ua ite atea o Isaïa e, i te mau mahana hopea nei e tono atu te Fatu i te mau « ve‘a na te moana » i teie nei mau nunaa « i purara e te rave-u‘ana-hia ».⁸

E faatupu-mau-hia teie nei fafauraa no te haaputuputuraa, tei itehia i roto i te mau papa’iraa mo‘a atoa, mai te mau tohuraa no te haapurara-ê-raa hia o Iseraela.⁹

Hou to’na Faasatauro-raa-hia, ua haamau te Fatu o Iesu Mesia i Ta’na Ekalesia. Tei roto i te reira Ekalesia, te mau aposetolo, te mau peropheta, te mau hitu ahuru, te mau haapii e te tahi atu â.¹⁰ Ua tono te Fatu i Ta’na mau pĭpĭ na te ao atoa no te poro i Ta’na ra evanelia.¹¹

I muri a‘e i te hoê tau, ua hi‘a te Ekalesia tei haamauhia e te Fatu i roto i te viivii varua. Ua faahuru-ê-hia Ta’na mau haapiiraa ; ua tauihia Ta’na mau oro‘a. Ua tae mai te Taivaraa Rahi mai tei faaite-atea-hia e Paulo, tei ite e, eita te Fatu e hoi faahou mai « o te taiva te tupu na na mua roa te mahana o te Mesia ».¹²

Ua pee te Taivaraa Rahi i te hoho‘a tei hope i te mau tau tuuraa evanelia atoa na mua’tu. Te tau tuuraa matamua roa i te tau ïa o Adamu. I muri iho ua tae mai te mau tau tuuraa a Enoha, Noa, Aberahama, Mose e te tahi atu. Ua farii te peropheta tata’itahi i te hoê faaueraa no te ra’i mai ia haapii i te atuaraa e te haapiiraa a te Fatu ra ia Iesu Mesia. I te mau tau atoa, ua opuahia teie nei mau haapiiraa ia tauturu i te nunaa. Ua hope râ to ratou haapa‘o ore raa i roto i te taivaraa. No reira, ua taaotiahia te mau tau tuuraa matamua atoa i te tau e te vahi. Ua taotiahia ratou i te tau no te mea ua hope tata’itahi ratou i roto i te taivaraa. Ua taotiahia ratou i te vahi i te hoê tuhaa na’ina’i o te palaneta Fenua.

No reira i titauhia’i ia faaho‘ihia mai te mau mea atoa. Ua pii te Atua te Metua e Iesu Mesia i te Peropheta Iosepha Semita ia riro ei peropheta no teie nei tau tuuraa. Ua faaho‘ihia mai te mau mana atoa no te ra’i o te mau tau tuuraa matamua na roto ia.¹³ Eita teie nei tau tuuraa no te îraa o te mau tau e taotiahia i te tau aore râ i te hoê vahi. Eita e hope i roto i te taivaraa e e faaîhia te ao nei.¹⁴

Mai tei tohuhia e Petero e Paulo, e faaho‘ihia mai te mau mea atoa i roto i teie nei tau tuuraa. No reira, e ti‘a ia tae mai, ei tuhaa no taua faaho‘iraa mai, te haaputuputuraa o te tia’i maoro hia no Iseraela i haapurara-ê-hia.¹⁵ E omuaraa titauhia no te Tae Piti raa mai o te Fatu.¹⁶

Teie nei haapiiraa no ni‘a i te haaputuputuraa o te hoê ïa o te mau haapiiraa faufaa rahi roa a Te Ekalesia a Iesu Mesia i te Feia Mo‘a i te mau Mahana Hopea nei. Ua prau te Fatu : « E faaite atu vau i te hoê tapa‘o ia outou… [e] haaputuputu vau i to‘u mau taata i purara-maoro-hia ra, e te utuafare o Iseraela e, e ia faati‘a fahou vau i to‘u Ziona i roto ia ratou ».¹⁷ Ua riro te taeraa mai o te Buka a Moromona ei hoê tapa‘o i to te ao atoa nei e ua haamata te Fatu i te haaputuputu ia Iseraela e ia faatupu i te mau fafauraa Ta’na i rave ia Aberahama, Isaata e Iakobo.¹⁸ Eita tatou e haapii noa i teie nei haapiiraa, e rave atoa nei ra tatou i te ohipa i roto i teie nei haaputuputuraa. Te na reira nei tatou a tauturu ai tatou i te haaputuputu i te feia i ma‘itihia e te Fatu i na pae e piti o te paruru.

E mea faufaa rahi te Buka a Moromona no teie nei ohipa. Te faaite nei oia i te haapiiraa no ni‘a i te haaputuputuraa.¹⁹ Te turai nei oia i te taata ia haapii no ni‘a ia Iesu Mesia, ia ti‘aturi i Ta’na ra evanelia, e ia amui atu i Ta’na ra Ekalesia. Oia mau, ahani aita e Buka a Moromona, e ore ïa te haaputuputaraa tei fafauhia no Iseraela e tupu.²⁰

E mea faufaa rahi roa te i‘oa faaturahia o Aberahama no tatou. Ua hau atu te reira i‘oa i te faahitihia i roto i te mau irava no te mau papa’iraa mo‘a no te Faaho‘iraa i roto i te mau irava atoa o te Bibilia.²¹ Ua tuatihia o Aberahama i te mau melo atoa no te Ekalesia a Iesu Mesia i te Feia Mo‘a i te mau Mahana Hopea nei.²² Te haapapû nei te Fatu i te fafauraa a Aberahama i to tatou nei anotau na roto i te peropheta Iosepha Semita.²³ I roto i te hiero, te farii nei tatou i te mau haamaitairaa hope roa, mai te huaai no Aberahama, no Isaaka e no Iakobo.²⁴

Ua ite-atea-hia teie nei tau tuuraa no te îraa o te mau tau atoa e te Atua mai te tau no te haaputuputu, i ni‘a i te ra’i e i ni‘a i te fenua nei. Ua ite o Petero e, i muri a‘e i te hoê taivaraa e tae mai te hoê faaho‘iraa. O oia, o tei vai i piha’i iho i te Fatu i ni‘a i te Mou‘a no te Faahuru-ê-raa, ua parau oia :

« E teie nei, e tatarahapa outou, e e fariu mai, ia paraihia ta outou hara, ia itea mai te anotau haumărû no ô mai i te aro o te Fatu ra ;…

« Ei te ra‘i â hoi oia parahi ai, e tae noa’tu i te tau e tia’i i te mau mea atoa nei, ta te Atua i parau mai i te vaha o te mau peropheta mo‘a atoa no’na mai te matamua mai â o teie nei ao ra ».²⁵

I te tau apî, ua tonohia mai te mau Aposetolo Petero, Iakobo e Ioane e te Fatu « ma te mau taviri no [To’na] basileia, e no te hoê tau tuuraa no te evanelia no te mau taime hopea ; e no te îraa o te mau tau », [i reira Oia] « e amui ai i te mau mea’toa ia riro ei hoê, to nia i te ra‘i, e to te ao atoa nei ».²⁶

I te matahiti 1830, ua haapii mai te Peropheta Iosepha Semita no ni‘a i te hoê ve‘a no te ra’i mai tei piihia o Elia tei mau i te mau taviri no « te faahoiraa mai i te mau mea atoa ».²⁷

E ono matahiti i muri mai, ua haamo‘ahia te hiero no Ketelani. I muri a‘e i to te Fatu fariiraa i taua fare mo‘a ra, ua haere mai te mau ve‘a no te ra’i mai e te mau taviri no te autahu‘araa. Ua fâ maira o Mose²⁸ « e ua horo‘a maira… te mau taviri no te haaputuputuraa o Iseraela mai na tuhaa e maha o te ao nei, e te arata‘iraa o na opu hoê ahuru mai te fenua apatoerau mai ra.

« I muri iho i teie, ua fâ maira o Elia, e ua horo‘a maira i te tau tuuraa no te evanelia a Aberahama, i te na ô raa mai e i roto ia tatou e i to tatou huaai e haamaitaihia’i te mau u‘i atoa i muri iho ia tatou ».²⁹

I muri iho ua haere mai o Eliaha e ua parau maira : « Inaha, ua tae roa mai te tau, o tei parauhia maira e te vaha o Malaki – o tei faaite mai e e tonohia mai oia [o Eliaha], hou te mahana rahi e te mea hanohano ra o te Fatu e tae mai ai – no te faafariu mai i te aau o te mau metua i te tamarii, e to te mau tamarii hoi i te mau metua, oi tairihia mai te ao nei i te hoê ahua ra ».³⁰

Ua tupu taua mau mea nei i te 3 no eperera 1836,³¹ e ua faatupu a‘era i te tohuraa a Malaki.³² Ua faaho‘ihia mai te mau taviri mo‘a no teie nei tau tuuraa.³³

Aua‘e e nehenehe atoa te titauraa ia « haere mai i te Mesia »³⁴ e faatae-atoa-hia i te feia tei pohe ma te ore i ite i te evanelia.³⁵ Te titau nei te tuhaa o to ratou faaineineraa i te mau tutavaraa i ni‘a i te fenua nei no vetahi ê. Te haaputuputu nei tatou i te mau reni heeraa, te faatupu nei tatou i te mau api anairaa utuafare, e te rave nei tatou i te ohipa monoraa i roto i te hiero no te haaputuputu i te mau taata i te Fatu e i to ratou ra mau utuafare.³⁶

E mea faufaa rahi roa i ŏ nei i ni‘a i te fenua nei no te haaputuputuraa o Iseraela. E ti‘a te evanelia ia afa’i –matamua-hia i te « mau mamoe i mo‘e i te utuafare ra o Iseraela ».³⁷ No reira, ua haere atu te mau tavini a te Fatu e poro i te Faaho‘iraa. I roto i te mau fenua e rave rahi ua maimi ta tatou mau misionare i te mau taata no Iseraela i haapurara-ê-hia ; ua auau ratou ia ratou i roto i te mau apoo no te mau mato ; e ua ravaai ratou ia ratou mai i mutaa ihora.³⁸

Te maitiraa ia haere atu i te Mesia e ere ïa no ni‘a i te vahi outou e parahi ra. E faaotiraa râ na te taata tata’itahi. E nehenehe te taata « e faataehia i te ite i te Fatu ra »³⁹ ma te ore e faarue i to ratou fenua ai‘a. E parau mau, i te mau mahana matamua o te Ekalesia, e mea pinepine te parau faafariu i te tuatihia i te parau haere atu i te tahi ê atu fenua. I teie nei râ, te tupu nei te haaputuputuraa i roto i te mau fenua tata’itahi. Ua faaoti te Fatu i te haamauraa o Ziona⁴⁰ i roto i te basileia i reira Oia i te horo‘a raa i Ta’na Feia Mo‘a to ratou fanauraa e to ratou opu. Ua faaite atea te papa’iraa mo‘a « e haaputuputuhiate taata i to ratou utuafare i te fenua ai‘a no ratou ra, e e haaparahihia ratou i to ratou mau fenua atoa i parauhia ra »⁴¹ « Ua riro te fenua tata’itahi e vahi haaputuputuraa no to’na iho nunaa ».⁴² Te vahi haaputuputuraa no te Feia Mo‘a Berezilia tei Berezilia ïa ; te vahi haaputuputuraa no te Feia Mo‘a Nigeria tei Nigeria ïa ; te vahi haaputuputuraa no te Feia Mo‘a Korea tei Korea ïa, e na reira noa’tu. Ziona o « tei mâ ïa te aau ».⁴³ Ziona, i reira ïa te Feia Mo‘a parau-tia. No te rahi o te mau ve‘a, te mau aparauraa, e te mau amuiraa e e nehenehe i te mau melo atoa ia farii i te mau haapiiraa, te mau taviri, te mau oro‘a e te mau haamaitairaa no te evanelia, noa’tu eaha te vahi ratou e parahi ai.

Te oraraa varua paruruhia tei te huru ia nahea te hoê taata i te ora, eiaha râ te vahi o ta’na e parahi. E ti‘araa to te Feia Mo‘a i te mau fenua atoa ia titau aifaito noa i te mau haamaitairaa a te Fatu.

E mea mau te ohipa a te Atua Mana Hope. Te ora nei Oia. O Iesu te Mesia. Teie Ta’na Ekalesia, tei faaho‘ihia mai no te faatupu i ta’na fâ hanahana, mai te haaputuputuraa i fafauhia no Iseraela. O te peresideni Gordon B. Hinckley te peropheta a te Atua i teie nei mahana, te faaite papû nei au i te reira i te i‘oa o Iesu Mesia, amene.