Ia Poro Haere i Ta‘u nei Evanelia – te mauihaa amui-tahi-raa i rotopu i te mau melo e i te mau misionare

Hōho’a

Aita i maoro a‘e nei, ua titau manihini matou e piti na tuahine misionare ia haere mai e tamaa. I muri mai i te tamaaraa, ani atura matou ia vaiiho mai raua i te hoê parau faaitoitoraa no matou. E mea ineine maitai raua e ua horo‘a mai i te hoê papa‘iraa mo‘a e te hoê tapa‘o-faaohipa-raa na matou. Ua hopoi mai raua i te hoê buka apî no te Buka a Moromona e te tahi mau peni rave rau û. Ua farii matou i te titauraa manihini a teie na misionare. I roto i te mau pene tata‘itahi, e tapa‘o matou i te hoê û taa è no ni‘a ia Iesu Mesia mai te mea e iteahia ia matou. Ia rave matou i teie nei ohipa, e haamana‘o matou i to matou na misionare.

I to teie na misionare faaŏraa mai i teie nei ohipa, ua ite ohie roa matou e, e haapiipiiraa teie no te papa‘iraa mo‘a i horo‘ahia i roto i te buka Ia Poro Haere i Ta‘u nei Evanelia. Ei utuafare, ua mauruuru roa matou no teie nei mauihaa misionare rahi e te puai.

A toru matahiti i teie nei to te mau misionare faaohiparaa Ia Poro Haere i Ta‘u nei Evanelia i te ao atoa nei. Ua riro teie buka ei rave‘a huanane i te ohipa misionare. Ua rave faaotihia te orama rahi a te peresideni Hinckley: « A faafatu i te mana‘o o te haapiiraa ». E « haapii ratou i te mau mana‘o na roto i ta ratou iho mau parau i raro a‘e i te arata‘iraa faauru a te Varua Maitai » (hi‘o « Taviniraa Misionare », Haapiipiiraa na te feia faatere o te ao atoa nei, 11 no tenuare 2003, 19).

Ia tomo te mau misionare i roto Ia Poro Haere i Ta‘u nei Evanelia, e haapii e e faaohipa ratou i te mau parau haapiiraa e te mau parau tumu faufaa o te faariro ia ratou ei feia ite i roto i ta ratou taviniraa faufaa. Taa-ê noa’tu i teie, e hinaaro ihoa ratou i te taato‘araa o ta tatou tauturu e patururaa. E mea na roto i te amui-tahi-raa teie hopoi‘a rahi e rave faaotihia’i o tei horo‘ahia i te mau aposetolo i tahito e te mau aposetolo no te tau hopea nei: « E haere outou e ati noa a‘e te mau fenua atoa, e faaite haere i te evanelia i te taata atoa » (Mareko 16:15).

Ia nehenehe te manuïaraa e tupu i roto i teie nei mau tautooraa, e mea ti‘a ia tatou ia riro ei hoê e te mau misionare, e e mea ti‘a ia tatou ia taa maitai te tahi e te tahi. Te taa tamau ra anei outou i te mau misionare ? Aita vau e parau nei i te reo area râ, e mea nahea ta ratou ia rave i te ohipa misionare. E haapii ratou i te mau parau tumu o te evanelia e e titau manihini ratou i te feia o te anaanatae i te taui i to ratou oraraa e ia bapetizohia e ia haamauhia ei melo no te Ekalesia.

Mai te mea te hinaaro ra tatou i te taa papu e i te tauturu i to tatou mau misionare, e mea ti‘a ia tatou ia titau i te faaroo mai to te mau misionare, e mea ti‘a ia tatou ia feruri mai ta te mau misionare e feruri nei e e mea ti‘a ia tatou ia ite mai ta te mau misionare e ite nei. Nahea tatou ia rave faaoti i te reira ?

Hoê rave‘a faufaa roa, oia hoi, te haereraa na muri i te mau misionare e i te hi‘oraa ia ratou ia rave i te mea o ta ratou e rave. Te tahi atoa rave‘a no tatou oia ïa ia tai‘o Ia Poro Haere i Ta‘u nei Evanelia e ia haapii atu â i te ohipa misionare. Mai ta te peresideni McKay i parau na e, « e misionare te melo tata‘itahi » (i roto i te Conference Report, Eperera 1959, 122), te tamata nei te mau melo ia riro ei mea itoito i roto i te pororaa i te evanelia. Ua riro Ia Poro Haere i Ta‘u nei Evanelia ei arata‘i maitai mau no te tauturu ia tatou ia ohipa i ni‘a i teie nei titauraa. Eita ta tatou tai‘oraa Ia Poro Haere i Ta‘u nei Evanelia e tauturu noa ia tatou ia faarahi i te hoê ite rahi a‘e e ia popou i ta tatou iho mau misionare area râ, e tauturu te reira ia tatou i roto i to tatou oraraa o te mau mahana atoa.

Te vai nei ta te mau melo tata‘itahi o to matou nei utuafare hoê buka Ia Poro Haere i Ta‘u nei Evanelia . Na roto i te tai‘oraa i teie nei arata‘i ua riro ïa ei patururaa rahi i roto i te faahoturaa i te hoê iteraa papû puai. Na te reira e tauturu ia tatou ia maramarama i te mau parau tumu faufaa o te evanelia e i te hiaai i te tavini. Te hinaaro nei au e rave i te hoê taime iti no te tapa‘o i te tahi o te mau upoo parau o Ia Poro Haere i Ta‘u nei Evanelia ([2004], iii), e e maramarama mai ia outou:

Teie to ratou tai‘oraa:

« Nahea vau ia ite e ia taa i te Varua ? »

« Nahea vau ia tai‘o maitai e ia faaineine no te haapii ? »

« Eaha te mea o ta‘u e tai‘o e no te haapii ? »

« Eaha te ohipa a te Buka a Moromona ? »

« Nahea vau ia faarahi i te mau taipe huruMesia ? »

E ere anei e o teie te mau mea o ta tatou paato‘a e hinaaro nei i te haapii ? No te feia atoa o te hinaaro nei ia riro ei melo misionare maitai a‘e e o te hinaaro nei i te ite e nahea ia paturu i te mau misionare, ua î Ia Poro Haere i Ta‘u nei Evanelia i te mau mana‘o e i te mau hi‘oraa puai. E haapii mai tatou e nahea ia tauturu i te mau misionare ia imi i te mau taata no te haapii e e nahea tatou ei mau melo ia rave amui i te ohipa e te mau misionare no te tauturu i te feia imi o te Ekalesia. E haapii tatou ia maramarama e no te aha te mau titauraa puai no te rave i te ohipa e tauturu ai i te faarahiraa i te faaroo i roto ia Iesu Mesia e e nahea tatou ia ti‘a e to tatou mau hoa melo-ore o te haere nei na roto i teie rave‘a tauiraa maitai roa o te faafariuraa.

Ei faahauraa i te tai‘oraa o te mau papa‘iraa mo‘a a te mau misionare, a tai‘o Ia Poro Haere i Ta‘u nei Evanelia i te mau mahana atoa. E haapii mai ratou i te mau parau tumu e i te mau rave‘a aravihi e e faaohipa hoi ratou i te reira. E haapii ihoa ra e nahea ia faaohipa i te arata‘iraa a te Varua i roto i teie ohipa. Mai te mea e hinaaro tatou i te haapii mai ta te mau misionare e rave ra, e mea ti‘a atoa ia tatou ia tai‘o maitai Ia Poro Haere i Ta‘u nei Evanelia e ia hi‘opo‘a maitai i te mau misionare i roto i ta ratou ohipa o te mau mahana atoa.

I roto i te omuaraa o Ia Poro Haere i Ta‘u nei Evanelia e tai‘o tatou: « Ia Poro Haere i Ta‘u nei Evanelia e buka ïa na te mau misionare rave tamau o te Ekalesia. Tera râ, te mau parau tumu e te mau parau haapiiraa i haapiihia i roto i te reira e tano atoa ïa na te mau misionare paroita e te feia faatere a imi ai ratou i te patu i te basileia o te Fatu. E horo‘a te tai‘o pinepineraa i teie nei buka ia ratou te tura no te rave faaotiraa i ta ratou mau hopoi‘a ei mau melo misionare e i te faatupu i te hoêraa e te mau misionare rave tamau » (xi).

Ua haapii Elder Richard G. Scott e e mea ti‘a i te mau melo atoa ia tai‘o Ia Poro Haere i Ta‘u nei Evanelia. Teie ta’na i parau, « e mea rahi te mau mea maitata‘i i ravehia… mai te faaŏ-raa-hia mai ă Ia Poro Haere i Ta‘u nei Evanelia area te mau hopea râ, e roaa ïa te reira mai te mea e riro te mau melo ei feia ite i te faaohipa i teie nei mauihaa faahiahia » (« The Power of Preach My Gospel », Liahona, Me 2005, api 31).

E au e ua ta‘oti‘ahia to tatou taime no teie tai‘oraa no reira, e horo‘a’tu vau i te tahi mau mana‘o tauturu

• E mea ti‘a i te feia apî e faaineine nei no te rave i te hoê misioni ia tai‘o maite Ia Poro Haere i Ta‘u nei Evanelia apitihia e te mau papa‘iraa mo‘a.

• A titau manihini i te mau misionare i roto i to outou utuafare. A ani ia ratou ia haapii ia outou e i to outou utuafare i te hoê parau tumu e aore râ, i te hoê parau haapiiraa no roto mai i Ia Poro Haere i Ta‘u nei Evanelia.

• I te tahi taime, a faaohipa Ia Poro Haere i Ta‘u nei Evanelia no te mau pureraa pô utuafare. A vaiiho i ta outou mau tamarii ia haapii i to outou utuafare mai ta te mau misionare te huru. I roto i to matou utuafare, ua hitimahuta matou i te mau haapiiraa o tei horo‘ahia e ta matou mau tamarii. Ua maere matou i te huru o ta ratou haapiiraa i te mau parau tumu ohie. I te tahi taime, ua ani manihini matou i te mau hoa ia haere mai e faaroo i teie mau haapiiraa.

• E nehenehe ta te mau orometua haapii evanelia e faaohipa maori râ, i te mau parau tumu ohie o te evanelia i roto Ia Poro Haere i Ta‘u nei Evanelia ei turu no te mau haapiiraa tei talenahia no te haapiiraa.

• Ua iritihia Ia Poro Haere i Ta‘u nei Evanelia e ua haapurorohia i roto e rave rahi mau reo e parauhia nei e to tatou mau melo. I te mau fenua e mea apî â te Ekalesia, e nehenehe Ia Poro Haere i Ta‘u nei Evanelia e faaohipahia ma te apitihia e te mau papa‘iraa mo‘a ei materia e ei niu no te tai‘oraa e no te haapiiraa i te mau haapiiraa evanelia atoa.

• Ua faaitoito Elder Scott i te feia faatere o te fenua iho o te Ekalesia « ia faaohipa i teie nei mau materia i roto… i te mau peresideniraa, i roto i te mau tomite faatere autahu‘araa, e i te mau apooraa paroita » (Liahona, Me 2005, api 31).

• A faaohipa Ia Poro Haere i Ta‘u nei Evanelia ei materia tauturu no te mau haapiipiiraa, no te mau a‘oraa, no te mau parau faaitoitoraa, no te mau haapiiraa, no te mau pureraa pae auahi e no te mau tai‘oraa a te taata iho.

Te faaite papû nei au e mea faauruhia teie nei buka arata‘i a te misionare e te Atua. E mea ti‘a ia tai‘o tatou i te reira ma te haapa‘o maitai, ia nehenehe tatou ia taa maitai i ta tatou mau misionare e i ta ratou ohipa. E mea ti‘a ia aparau te mau misionare e te mau melo i te reo hoê roa. E mea ti‘a ia riro tatou ei hoê i roto i ta tatou mau tautooraa no te poro i te evanelia. E faariro ïa te reira ia tatou mai te hoê mauihaa i roto i te rima o te Fatu, mai Ia’na i parau e, « e e na reira hoi au i te haaputuputu i ta‘u i maiti mai roto mai i na tufaa e maha no te fenua nei, oia o ratou atoa o te faaroo mai ia‘u nei, e o te haapa‘o mai i to‘u nei reo » (PH&PF 33:6).

Ei mau melo no Ta’na ekalesia, titauhia tatou ia riro ei tuhaa no teie haaputuputuraa hanahana. No teie nei parau mau, te faaite papû nei au i te reira, na roto i te i‘oa o Iesu Mesia, amene.