Faamatalaga

E ui ina sa ou le alu i le lotu, sa ou manao lava i sau lomiga o le Liahona. I se tasi aso na ou maua ai se Uepi saite ma fesili ai mo se lomiga, ma sa vave lava ona auina mai e se tuafafine se kopi ia te au. Sa ou fiafia tele ina ua ou maua le lomiga mo tagata fou (Oke. 2006). Sa matuai ou ootia ai lava ma ua toe faamaonia ai foi le moni o lenei talalelei. E ala atu i le Liahona, ou te lagona ai le latalata teisi atu i le Atua.

Marcio Honirio Peres, Pasila

Ou te fiafia lava pe a ou faitauina le Liahona. Ou te faaaogaina le mekasini mo lesona a le Aualofa ma afiafi faaleaiga. Sa ou faasoaina atu le Liahona i se uo e le auai i le tatou ekalesia. Ou te fiafia lava e faitau i ai ona ou te malamalama atili ai i le Ekalesia ma mea e tutupu i le Ekalesia. Faafetai tele lava mo le sauniaina o autu lelei ma lesona lelei e mafai ai ona tatou fafagaina o tatou faatuatua i le moni o le talalelei a lo tatou Tama o i le Lagi.

Maasoama Bernard, ISA

O le Liahona e pei lava o se soa tumau. Ou te faitau i ai i aso uma—i le ofisa pe a malolo, i le fale, ma soo se avanoa lava e maua. O fautuaga a le Au Pulega Aoao faapea ai ma le eseese o tala moni o le olaga ua fesoasoani e faatulaga ai lo’u olaga. Ou te talisapaia ia tala uma lava. O le Liahona ua faateleina ai la’u molimau ia Iesu Keriso. O se taiala i aso taitasi.

Wilfred Kenneth F. Wokekoro, Nigeria

Ou te alu i lo’u potu ma le lagona o le vaivai tele ma le manaomia o se malolo pe a tuua le aoga. Ou te faitau i le Liahona. Ou te fiafia lava e faitau i ai. O savali uma lava e musuia moni ma faamanatu mai ai ia te au mea uma na aoao mai e Iesu Keriso ia i tatou. Ou te iloa ma lo’u loto atoa o nei mea ua moni.

Judie Ann Diamada Boligor, Filipaina

Sa lomia i le Liahona se tusiga e uiga i le Togiola a Iesu Keriso ma lona uiga i olaga o tagata, ma sa ou iloaina o au agasala sa i le tuanai ma e mafai ona ou agai i luma ma toe amata. O loo avea nei au ma peresitene o Tamaitai Talavou, ma ou te fiafia e galulue ma tamaitai talavou. Ou te fiafia lava ma faamoemoe e mafai ona ou fesoasoani i tagata e lei papatiso lava, ia iloa o le Ekalesia moni lenei.

Viarda Martínez, Dominican Republic

O le Liahona o se faavae sili ona taua mo le galuega faafaifeautalai. Ua faapea ona ou fesoasoani i nai tagata sailiili e faaaoga ai tusiga mai le Liahona, aemaise lava i le saunia o i latou mo le papatisoga ma le faamauga.

Petra Longerich, Siamani