O Le Tusi i le Tele o Gagana
Mo Clara Leticia Cruz Cano o Puerto Rico, o lona fiafia i le Tusi a Mamona na amataina i le pe tusa o le fa o ona tausaga. Sa ia matauina na maua se avanoa o lona tuagane matua e faitau ai i taimi o suesuega o tusitusiga paia a lona aiga i po uma, ma sa manao foi o ia mo sona avanoa. Sa fai atu o ia i ona matua e fesoasoani ia te ia, ma e le’i leva ae avea o ia ma se vaega o le faataamilosaga o le faitauga.
I le 12 o ona tausaga, na talia ai e Clara se lui fou. Nai lo le faitauina i lana gagana moni o le faaSipaniolo, sa ia faitauina le Tusi a Mamona i le faaPeretania. I le 14 o ona tausaga, sa ia faitauina ai i le faaFarani; i le 15, i le faaPotukale; ma i le 16, i le faaItalia.
Ia Aokuso 2005, ina ua talosagaina e Peresitene Gordon B. Hinckley le Au Paia o Aso e Gata Ai e faitau pe toe faitau le Tusi a Mamona, ua amata ona faitau e Clara i le faaSiamani.
“E faigata atu le taimi lenei, ae o le a ou faamaeaina,” o lana tala lea.
O ana faitauga i gagana eseese ua faalauteleina ai lana vaogagana. “A ou tau atu i se upu ou te le iloa, ou te sueina lona uiga. E le‘i umi ae ou lelava sue uiga, o lea ou te taulotoina ai,” o lana tala mai lea. O lana suesue i gagana ua faapea foi ona fesoasoani ai i ana meaaoga. O le tausaga ua tuanai i le 17 o ona tausaga, na avea ai Clara ma tagata faauu sili aoao i aoga uma a le malo i lona atunuu.
Ua maua e Clara nisi o maataua i ana suesuega o gagana e tele. Sa ia iloaina ai foi o lona igoa ogatotonu o Leticia, o lona uiga o le “fiafia” i le faaliliuga faaItalia (tagai 2 Nifae 1:21; 8:3).
E pei foi o isi, o Clara e i ai sana faaputuga o kopi o le Tusi a Mamona i le tele o gagana. Ae fai mai a ia, “Na ou filifili o le a ou le teuina ni kopi o le Tusi a Mamona e le mafai ona ou faitauina.”
O le uiga o lena mea, ua uma ona i ai lana galuega faatino e sosoo ai i luga o lana fata tusi. Na iloa e lana epikopo o Hector Alvarez, sa matamata o ia [Clara] i se kopi o le Tusi a Mamona i lona fale ma tuuina atu loa ia te ia. Ua i ai nei le avanoa sa ia tuuina ia te ia lava e aoao ai e le gata i se isi gagana, ae faapea foi o se alafapeta fou. O le tusi e faaRusia.