O Se Aupito Itiiti o Taitai?

Na manaomia e le matou uarota se peresitene fou o le korama a le au tiakono. Sa matou tootutuli ma ou fesoasoani i le matou fonotaga a le au epikopo, e pei ona matou masani ai, e saili le faamaoniga a le Alii i lenei tofiga ma isi foi tofiga.

I le lagonaina o le faamautu mai o le Agaga, na ou setiina ai se faatalanoaga ma Víctor Leonardo Jiménez Gonzáles, o se alii talavou e le’i leva ona atoa lona 12 tausaga ma o loo galue foi o se failautusi a le korama a le au tiakono.

I le taimi o le faatalanoaga, sa ou fesiligia ai Víctor e uiga i lona valaauga o loo i ai nei ma po o a foi ni ona lagona.

“O loo ou popole, Epikopo,” o lana tali mai lea. “O loo matuai ou popole lava.”

“Aisea ua e popole ai?”

“Ou te manao ia i ai uma le au tiakono i le lotu. O lea, a o ou sau, na ou alu ai i fale o Nikolao ma Atonio ma fafagu i laua i luga, ona ou alu ai lea i fale o Simi ma Lui e aumai i laua. O loo ou popole tele, Epikopo,” o le tala lea a Victor.

Sa ou maofa i lana faamatalaga ma le mafai e se failautusi e 12 tausaga o le korama a le au tiakono ona popole tele i isi tagata o lana korama.

“Ua ou i ai iinei e auauna atu,” sa faaauau ai lana tala, “ma ou te manao e fai ma le sa’o, peitai o au o se tasi o taitai e aupito maualalo lava.”

“O le a le uiga o lau tala ‘o se tasi o taitai aupito maualalo?” na ou fesili atu ai.

“Aua o au o le failautusi. E le o au o le peresitene po o se fesoasoani. O au o se failautusi, o le mea lena e avea ai au ma se tasi o taitai aupito maualalo. Aua foi e tatau ona iinei le au tiakono ae o lea e le o i ai, o lea e tatau ai ona ou alu e aumai i latou aua o iinei e tatau ona latou i ai. Ou te le iloa pe aisea latou te le o mai ai. Ae e tatau ona ou alu e aumai i latou, Epikopo!”

Na le mafai ona toe taofi le maligi o ou loimata. I le faatumulia ai i le ootia, na ou fai atu ai, “Ua e faamanatu mai ia te au le pogai na valaauina ai au e avea ma se epikopo. Ia manatu popole i isi, ia asiasi ma auauna atu ia i latou e pei ona sa faia e le Tupu o Peniamina. E tatau ona tatou i ai i le galuega a isi, ona tatou i ai lea i le galuega a le Atua. E le o oe o se taitai aupito maualalo. O i latou uma o e auauna atu ua faia se sao taua i lo tatou Tama Faalelagi ma Lana Ekalesia.”

E uiga i lenei mea, na ia faapea mai ai, “O le mea lena na ou aoaoina mai lo’u tama. Ma a ou vaai atu o e tutulu, ou te manatua ai se tasi taimi ina ua ia talanoa mai ia te au—-sa tagi o ia ma fai mai, ‘A i ai sau matafaioi, e tatau ona e faia ia sa’o.’”

O loimata na faafouina ai lo’u agaga, ma o upu a le alii talavou na faafouina ai lo’u manatua. Na ou manatuaina le taua tele o fanau a lo tatou Tama Faalelagi ina ua ou vaaia le faataua na tuuina e lenei alii talavou i luga o tagata taitoatasi o lana korama.

Na ou tuuina atu se valaauga o le avea ma peresitene o le korama a le au tiakono ia Victor. I le tali mai sa ia faapea mai ai, “O lenei la, o le a ou matuai galue malosi. O le a ou le faia se mea e te le fiafia ai lau susuga, Epikopo.”

E oo lava i le taimi nei, i se taimi mulimuli ane, e toe foi mai ai loimata pe a ou manatua lenei faatalanoaga e le mafaagaloina. Ou te iloa le gafatia faalelagi o loo i ai i lenei alii talavou. Ua matuai mautu lelei le lumanai mo ia, ma o lana vaaiga o le mea e taua e matuai manino lava.