Aisea Na Ou Ala Ai i le 3:00 i le vaveao?

Sa ou faapea i le taimi muamua na tu’i lemu au e lo’u toalua o Eva ou te ala i luga. Ae ina ua ou faliu ae, na ou iloa ai o loo moe pea o ia. A o ou nofo ae i luga, na oo mai se lagona mautinoa e tatau ona ou alu atu i le potu malolo. Sa ou oso ese mai le moega ma savali atu loa agai i le potu malolo. I le siakiina o tamaiti a o ou ui atu i talaane o o latou potumoe, na ou iloa ai o loo momoe gapepe i latou.

I totonu o le potu malolo, sa manaia le mafanafana sa sau mai malala ola o le matou magalafu, lea sa ola ai malala o le tafuga i le afiafi. Sa sao lava le setiina o le ala ea o le ogaumu, ma na foliga mai sa lelei lava le ogaumu. Sa foliga mai mea uma i o latou tulaga masani. E oo foi i le matou taifau sa moe, na te le’i iloaina lo’u i ai iina. O fafo, na ou vaai ai na o ata lafoia e le minoi na faalalava i le lotoa na lilofia i le kiona.

A o ou toe tilotilo solo i le potu, sa ou le mautonu. E mo’i lava le lagona na ou maua. Ae aisea la ua ou tutu toatasi ai i le potu malolo i le 3:00 i le vaveao? Sa ou tutu ai pea mo ni nai minute ae na iu ina ou filifili ou te toe foi atu ou te moe.

O le taimi lava na ou savali atu ai i le potumoe, na ou faalogoina ai se pao o le fetoai o uamea i ou tua. Sa vave ona ou faliu atu i tua ma vaaia ai le asu ma aloiafi vevela na lelea mai tua o le ogaumu! Sa faafuasei ona motu mai se taofi sa i luga o le paipa o le ogaumu, ma see mai ai se vaega o le paipa i totonu o le isi itu, ma tuua ai se ta’e i le paipa.

Sa ou valaau atu ia Eva mo se fesoasoani. Ona ou faamauluina vave lea o ni totini lima pau mamafa sa ou tuuina i talaane o le ogaumu ma toe faapipii faatasi ia paipa o le ogaumu. Ina ua uma ona toe faapipii le fasi paipa, ona ou fesoasoani atu lea ia Eva i le tapilieseina o le asu mai le potu malolo. Ona ma iloiloina lea o mea na faaleagaina.

Sa na o sina vaega lava o le kapeta na mu i aloiafi ma le pefu. Ana ou le i ai iina i le taimi na motu ai le taofi o le paipa, semanu e vave lava ona mu atoa le potu malolo. Sa taofia le faatamaiaga na semanu e oo i ai lo matou fale, ma atonu foi o o matou ola—e faafetai ai i se lagona toafimalie ae faagalogata mai le Agaga Paia.

I le toe foi atu i le moega, sa ou faafetai ona o se Tama Faalelagi, o le o loo silafia mea uma, na lapataiina au i se tamai taofi uamea o le a leaga i lena po malulu o le taumalulu.