Lav blong Wan Profet

Sam yia finis i pas, Presiden Tomas S. Monson i bin kam long wan rijinol konfrens long Hambeg, Jemani, mo hem i bin wan ona blong mi blong go wetem hem.

Presiden Monson i bin askem abaot Brata Maekel Panitj, wan foma stek presiden we i bin wan long ol strong eli memba blong Jos long Jemani. Mi talem long hem se Brata Panitj hem i sik tumas, mo hem i mas silip nomo long bed mo hem i no bin save atendem ol miting blong mifala.

Presiden Monson i bin askem sapos mifala i save go visitim hem.

Mi save se sot taem bifo long trip blong hem blong kam long Hambeg, Presiden Monson i bin kasem wan operesen long leg blong hem mo hem i no save wokbaot gud. Mi eksplenem se Brata Panitj i stap long namba faef floa blong wan bilding we i no gat eleveta long hem. Mifala i mas klaem long ol step i go antap blong luk hem.

Be Presiden Monson i wantem blong mifala i mas go. Mekem se mifala i bin go.

Mi tingbaot gud olsem wanem hem i bin had blong Presiden Monson i klaem long ol step ia. Hem i save tekem sam step nomo blong wan taem bifo hem i mas stop mo spel. Hem i neva talem wan toktok blong komplen, mo bae hem i no save tanembak hem i gobak. From bilding ia i gat ol hae siling, ol step ia i luk olsem se bae i no gat en blong olgeta, be Presiden Monson i glad blong gohed kasem taem mifala i kamaot long apatmen blong Brata Panitj long nambafaef floa.

Taem mifala i kasem apatmen, mifala i bin gat wan gudfala visit. Presiden Monson i bin talem tangkyu long Brata Panitj from laef blong hem we seves we hem i bin dediketem long jos mo i bin presem hem wetem wan smael. Bifo mitufala i go, Presiden Monson i bin givim wan naesfala prishud blesing long Brata Panitj.

Presiden Monson i save jus nomo blong spel bitwin ol miting blong mifala. Hem i save askem blong luk sam naesfala ples long Hambeg. Oltaem mi stap tingbaot olsem wanem ol ples long siti ia oli naesfala tumas, be wan long siti we hem i bin wantem blong luk moa bitim eni narafala samting hem i wan olfala memba blong Jos we bodi blong hem i nomo strong.

Presiden Monson i bin kam long Hambeg blong tij mo blesem ol pipol blong wan kantri. Be long sem taem, hem i tingting nomo long wan man ia nomo.

Taem Aposol Pita i bin tokbaot Jisas, hem i givim simpol toktok ia: “[Hem] i stap go olbaot long evri ples, i stap mekem ol gudfala wok” (Ol Wok 10:38). Sem samting yumi save talem abaot man we yumi sastenem hem olsem profet blong God.