Ol Blesing blong Tempol

Tempol hem i wan tru ples we yu save “stap long wol ia be yu no blong wol ia.” Taem yu stap wari mo gat ol impoten desisen we i mekem maen mo sol blong yu i hevi, yu save tekem ol wari blong yu ia i go long tempol mo kasem givhan long saed blong spirit.

Yumi nidim blong kasem wan testemoni mo wan wan filing blong revren blong tempol from hem i haos blong Lod. Blong kipim tabu fasin blong tempol mo blong invaetem Spirit blong blesem olgeta we oli go long tabu tempol from ol odinens mo kavenan blong olgeta, oli tijim yumi se i no gat doti samting i save go insaed long tempol. Fasin blong revren long tempol hem i wan impoten pat blong invaetem Spirit blong i stap insaed long hem long evri aoa blong evri dei.

Taem mi bin wan boe, papa blong mi i bin tekem mi long Long Aelan, Niu Yok, blong go wokbaot long yad blong Tempol long Sol Lek, blong tajem tempol, mo blong toktok raon abaot from wanem tempol i impoten long laef blong mi. Hem i long taem ia nao we mi bin mekemap maen blong mi se sam dei, bae mi gobak blong kasem ol odinens blong tempol.

Truaot long histri, long evri dispensesen, Lod i bin komandem ol profet se oli mas bildimap ol tempol, blong ol pipol blong Hem oli save go mo kasem ol tempol odinens. Moses mo ol pikinini blong Isrel oli bin kasem blesing blong gat wan tempol we oli stap karem i go olbaot, we i tabenakol, ples we oli bin save wokem ol tabu odinens anda long loa blong Moses—mo hem i ples we, long wan taem, Lod i bin kam mo toktok wetem Moses. King Solomon i bin bildim finisim wan naesfala tempol long Jerusalem, we i no longtaem afta oli bin spolem gud. Afta, long taem blong ministri blong Kraes, oli bin bildim wan narafala tempol long Jerusalem.

Yumi lanem long Buk blong Momon se Nifae i bin bildim wan tempol “folem fasin blong tempol blong Solomon” (2 Nifae 5:16). Ol narafala profet blong ol man Nifae, iven Jekob mo King Benjamin, oli bin tijim ol pipol long tempol (luk long Jekob 1:17; Mosaea 1:18).

Hemia i gat bigfala mining from we yumi luk se, taem Lod Jisas Kraes we i bin laef bakegen long ded i bin kamaot long ol man Nifae long 34 A.K., Hem i bin kam long tempol (luk long 3 Nifae 11:1–11).

Profet Josef Smit i bin tijim se Jos i no oganaes gud, long prapa oda blong hem, mo bae i no save oganaes gud kasem taem Tempol i finis, blong oli stap olsem ol ples we oli save givim ol odinens blong Prishud long hem.”¹

Tempol long Ketlan hem i fas tempol long ol lata dei ia, mo hem i bin gat wan impoten rol long kambak blong ol ki blong prishud. Olsem wan risal long wan prea, Jisas i bin visitim Josef Smit long Ketlan Tempol long 3 Epril 1836 (luk long D&C 110). Sevya i bin kamaot long hem long glori mo i bin akseptem Ketlan Tempol olsem haos blong Hem. Long taem ia Moses, Elias, mo Elaeja oli bin kam tu blong givim ol prishud ki we oli bin holem. Elaeja i bin putumbak ol ki blong siling paoa, olsem we Malakae i bin promesem, blong yumi save harem gud long ol ful blesing blong tempol long ol laef blong yumi.

Ol paeonia famle blong yumi oli bin finisim Navu Tempol mo oli bin mekem ol tabu odinens insaed long hem. Navu Tempol hem i fas tempol we oli bin mekem ol endaomen mo ol siling insaed long hem, we i bin pruvum wan bigfala paoa long ol paeonia taem oli stap traehad blong krosem ol fil blong go long Saeon long Sol Lek Vale. Oli bin endao wetem ol paoa blong tabu tempol. Hasban mo waef tufala i bin sil long tufala. Ol pikinini oli bin sil i go long ol papa mo mama blong olgeta. Plante long olgeta oli bin livim plante famle memba blong olgeta blong oli ded long rod, be oli save se hemia i no en blong olgeta. Oli bin sil finis long tempol blong taem we i no save finis. Afta, tru long revelesen we Presiden Brigham Yang i bin kasem, ol Sent oli bin bildimap moa tempol long Wes.

Tedei i gat 130 tempol we oli open naoia, we i mekem se ol fetful memba blong Jos raon long wol oli save go long haos blong Lod blong kasem ol tempol odinens blong olgeta mo mekem ol kavenan wetem Hem.

Stamba tingting blong tempol hem i blong givim ol odinens we yumi nidim blong kam olsem god long selestial kingdom. Ol tempol odinens oli gaedem yumi i go long Sevya blong yumi mo i givim long yumi ol blesing we oli kam long yumi tru long Atonmen blong Jisas Kraes. Ol tempol oli ol bigfala yunivesiti blong lan we man i save long hem, mo oli givim yumi save mo waes abaot Kriesen blong wol. Ol instraksen blong endaomen oli talem long yumi olsem wanem yumi mas wokbaot long ol laef blong yumi long wol ia. Mining blong toktok ia endaomen hem i “presen.” Odinens blong endaomen i gat ol defren pat wetem ol instraksen blong olsem wanem yumi mas laef mo i gat ol kavenan we yumi mekem blong laef stret mo gud taem yumi folem Sevya blong yumi.

Wan narafala impoten odinens hem i blong sil blong taem we i no save finis long selestial mared. Kavenan ia blong mared i mekem se ol pikinini oli save sil long ol papa mo mama blong olgeta, mo ol pikinini we oli bon long kavenan oli kam pat blong wan famle we i no save finis.

Doctrine and Covenants i tijim yumi se wanem yumi silim long wol ia bae oli silim long heven; mo Lod i talem se wanem yumi joenem long wol ia, long nem blong Lod mo tru long toktok blong Hem, bae oli joenem blong taem we i no save finis long ol heven (luk longD&C 132:46).

Taem wan kapol i nildaon long olta, olsem wan man blong silim ol man, mi luksave rol blong mi olsem wan representetiv blong Lod. Mi save se wanem oli bin silim long wol ia oli silim tu long heven—neva bae oli save brekem sapos olgeta we oli bin sil ia oli stap fetful mo stanap strong kasem en.

Mi bin lukluk, ova long ol yia, plante kapol we oli bin save stanap strong mo kipim ol mared blong olgeta taem oli bin stap tru long ol kavenan we oli bin tekem long olgetawan long tempol. Ol kapol ia we oli gat sakses oli gat sam samting we oli semmak.

Faswan, ol kapol ia oli save huia olgeta wanwan—ol boe mo gel blong God. Oli bin setemap ol gol we i no save finis blong laef bakegen wetem Papa blong yumi long Heven mo Pikinini blong Hem, Jisas Kraes. Oli bin wokhad blong livim biaen long olgeta ol wei blong man we i folem ol fasin blong wol ia (luk long Mosaea 3:19).

Seken, oli save doktrin mo oli save se ol odinens blong tempol we i sevem man mo ol tempol kavenan oli impoten mo oli nidim blong kasem ol gol ia we i no save finis.

Nambatri, oli jusum blong kasem ol blesing we i no save finis blong kingdom blong God be i no ol samting blong wol ia.

Nambafo, ol kapol ia oli luksave se oli bin sil blong taem naoia mo blong taem we i no save finis; oli bin jusum wan kampanion we i no save finis—ol dei blong olgeta blong stap pulum ae blong ol narafala man i pas finis! I no gat nid blong oli lukaot i go moa!

Nambafaef, ol kapol ia oli ting abaot wanwan long tufala bifo oli tingbaot olgetawan. Fasin blong stap selfis i kilim ol filing long saed blong spirit. Tufala i toktok wetem Lod long prea, tufala i gro tugeta mo tufala i no save seraot. Tufala i toktok long tufala, mekem se ol smosmol samting oli neva kam ol bigfala samting. Tufala i stretem kwik ol samting we i mekem olgeta i “kros smol,” mo tufala i no fraet se bae wan long tufala bae i spolem narawan. Long wei ia, taem ol nogud filing oli kam antap, bae wanwan i save serem wetem patna blong hem. Hem i gud yet blong serem ol smosmol harem nogud blong yu eli bifo oli kam olsem kros. Ol kapol ia oli wantem blong talem sore mo askem fogivnes sapos wan i bin mekem narawan we hem i lavem i harem nogud. Tufala i talemaot lav we wan i gat long narawan mo tufala i kam kolosap. Tufala i leftemap tufala mo mekem wanwan long tufala i kam moa strong.

Tempol hem i wan tabu haos, wan tabu ples, we oli stap mekem ol impoten seremoni blong sevem man mo oli mekem ol odinens blong yumi rere blong kam olsem god. Hem i impoten blong yumi kasem wan stret save se taem yumi rere blong go long tabu haos mo se taem yumi tekempat long ol seremoni ia mo ol kavenan ia, ol taem ia bae oli kam sam long ol impoten taem we bae yumi gotru long ol laef blong yumi long wol ia.

Yumiwan yumi bin agri blong kamaot long ples blong God Papa i kam long wol ia blong tes wetem fridom blong jusum, mo wetem save ia se bae yumi fesem “fasin blong … agens long evri samting” (2 Nifae 2:11). Stamba tingting blong yumi hem i blong tekem long yumi ful klos blong faet blong God mo stanap agensem ol rabis ara blong faea blong ol nogud man wetem aean blong fet mo naef blong faet blong Spirit (luk long D&C 27:15–18), blong stanap strong kasem en, mo blong stap klin inaf blong stanap mo laef long ples blong God Papa mo Pikinini blong Hem, Jisas Kraes, blong taem we i no save finis—blong kasem wanem we oli singaotem, laef we i no save finis.