Mi Bin Promesem Papa long Heven

Taem Yukari i gat tri yia, skul blong hem oli givim melek wetem kofi insaed long hem. From mama blong Yukari i bin tijim hem abaot Tok blong Waes, Yukari i no wantem blong dring kofi mo melek ia. Bae hem i fulumap kap blong hem wetem wota mo bae hem i dring.

Wan dei Yukari i talem long mama blong hem, “Mi wantem blong dring kofi mo melek olsem ol narafalawan.” Mama blong hem i bin sidaon wetem hem mo i bin helpem hem blong andastanem se Papa long Heven i lavem hem, mo se Hem i no wantem hem blong i dring kofi, mo se hem i wan komanmen. Stat long dei ia, Yukari hem i sua se hem i neva wantem blong dring kofi. Moa long wan yia i bin pas.

Wan dei taem tija blong Yukari i no bin stap, wan narafala tija i bin kam long klas blong olgeta. Olsem oltaem, Yukari i stap dring wota. Tija i luk hemia mo i bin askem, “From wanem yu stap dring wota?” Yukari i bin eksplenem se hem i go long jos mo i bin promesem Papa long Heven se bae hem i no dring kofi. Tija i sapraes bigwan. Stat long taem ia, skul blong olgeta i stop blong mekem kofi mo melek mo oli bin givim ol narafala dring.