Wan Dakdak We I No Naes o Wan Naesfala Swan? I Stap long Yu Nomo!

Olsem wan yangfala pikinini, mi tingbaot mama blong mi i stap ridim stori ia long mi “Smol Dakdak We I No Naes,” we i stap kam long Hans Kristian Andesen. Ating from se mi mi stap fraet mo mi filim se mi no naf long eni samting, be memori mo mining blong stori ia i stap wetem mi oltaem.

Long stori ia mi tingbaot, wan mama dakdak i stap wet blong ol eg blong hem oli brok mo ol smosmol dakdak oli kamaot. I no longtaem, wetem glad blong mama dakdak, ol smol yelo dakdak oli kamaot long ol eg blong olgeta. Be, i gat wan bigfala eg we i no brok yet i stap. Mama mo ol smosmol dakdak blong hem oli stap wet mo lukluk eg ia. Taem eg ia i jes brok, ol yelo dakdak ia oli luk se niufala memba blong famle blong olgeta ia i defren long olgeta. Oli kam raonem hem mo oli talem long mama mo papa blong olgeta se, “Hem i no olsem yumi. Hem i no naes.” Oli livim hem i stap long bed blong olgeta mo oli swim i go. Dakdak we i no naes ia i stap long bed blong olgeta mo i stap traem blong haed. Evri taem hem i kamaot long wan nara dakdak oli stap givim ol rabis komen nomo long hem. Samtaem hem i stap talem long hemwan se, “Evriwan oli no laekem mi from se mi no naes.”

Afta wan merikel i tekem ples long laef blong hem. Hem i luk ol narafalawan we oli luk semmak olsem hem mo oli mekem samting semmak olsem hem nomo! Hem i kam fren wetem olgeta, mo oli tekem hem i go long mama blong olgeta mo askem, “Mama, Mama, mifala i faenem wan smol brata! Hem i save stap wetem yumi blong oltaem?” Naesfala mama swan (dakdak we i moa waet mo i gat longfala nek) i foldem ol waet wing blong hem raonem dakdak we i no naes ia mo i talem long wan naes voes long hem, “Yu nomo wan smol dakdak we i no naes! Yu yu wan smol swan, mo samdei bae yu kam king blong smol reva ia.”

Mi bin laekem blong harem stori ia taem mi wan yang pikinini. Mi no luksave se ol lesen we mi bin lanem long stori ia bae i helpem mi tru long ol hadtaem long yut laef blong mi. Mi bin baptaes olsem wan memba blong Jos taem mi gat eit yia, be long en, famle blong mi i nomo stap aktiv long jos.

Long smol taon long Aedaho long ples we mi groap long hem, i gat wan ples blong lukluk sinema we long evri Satedei aftenun oli putumaot wan so. Oltaem mi stap go long so ia wetem tu o tri fren blong mi. Long ples ia bae oli soemaot wan sot muvi abaot ol spot mo narawan abaot ol nius we i stap go raon. Stamba so, oltaem, hem i wan muvi blong ol kaoboe wetem plante aksen long hem.

Wan Satedei, long taem blong brek bitwin long muvi, ol staf oli pusumaot wan 10-spid baskel. Kala blong hem i red, mo i naes tumas, mo bae oli givim long man we i gat stret namba blong tiket we bae oli singaotem! Man, mi wantem baskel ia tumas!

Anaonsa i pusum han i go long kontena mo i pulumaot wan tiket. Taem hem i ridim namba long tiket, mi faenemaot se mi mi gat tiket we i win ia. Be mi no muv o talem eni samting. Mi bin fraet mo sem tumas. Mi no trastem miwan blong go antap long stan mo letem evriwan i save se mi mi winim baskel ia. Anaonsa i singaotem bakegen namba blong tiket we i win tu moa taem, mo evri taem ia mi holemtaet tiket blong mi i go daon blong i no gat man i luk. Long en, man ia i ridim wan narafala namba. Wan long ol fren we mi stap go long muvi wetem i gat niufala namba blong tiket we oli stap singaotem ia. Hem i jiam antap, mo i singaot, mo i ron i go long stej blong klemem baskel blong hem. Baskel ia i mas kam blong mi ia!

Taem mi stap wokbaot i go bak hom miwan long ol muvi long Satedei ia, mi tingbaot stori blong dakdak we i no naes ia. Mi bin filim se mi mi olsem smol swan ia nomo. Mi filim se mi stap wokbaot krangke long ol wud mo traem blong haed mo no gat man i laekem mi. Mi no luksave huia mi o huia bae mi kam olsem. Taem mi kasem hom, mi save se wan samting i mas jenis. Mi tingbaot se mi stap tingting, “Hem i taem blong mi groap. Samting we i bin hapen bae i neva hapen long mi bakegen.”

Mi stat blong faenemaot se i gat ol narafalawan we oli stap raon long mi we oli lavem mi mo kea abaot mi. Wod bisoprik blong mi i gat wan intres long mi, olsem stek presiden blong mi, we oli stap long rod narasaed nomo long haos blong mi. Oli bin tijim gospel long mi. Oli bin serem ol testemoni blong olgeta long mi se Sevya i wan tru man mo gudfala Atonmen blong Hem i wan samting we i bin hapen tru, mo wanem Atonmen i save mekem blong mi. Oli ridim long mi evri taem stori blong Josef Smit mo visen blong hem long Tabu Bus. Aot long eksperiens ia, mi bin developem gudfala fasin blong ridim Josef Smit—Histri evri wik. Taem mi mekem olsem, mi save se mi save gat paoa blong winim eni samting we oli bin givim long mi long wik ia.

Long taem ia long laef blong mi, taem mi nidim gud wan man, Papa blong mi long Heven i bin blesem mi. Hem i save huia mi, mo Hem i sendem ol wokman blong Hem blong oli helpem mi blong faenemaot samting ia blong miwan. Oli putum ol han blong olgeta raonem mi mo talem long mi tru long ol aksen blong olgeta se mi mi nomo wan dakdak we i no naes, mo we sapos mi stap klin inaf mo kipim ol komanmen blong God, bae mi save kam “king blong smol reva.” Blesing mo save blong mi long Atonmen i stat blong givim mi moa paoa mo tras.

Taem mi kasem 16 yia, ol gudfala man ia oli leftemap tingting blong mi blong kasem wan petriakel blesing. Afta we mi kasem rekomen blong mi, mi jiam long olfala baskel blong mi mo mi bin ron blong sam kilomita i go long hom blong petriak. Hem i bin eksplenem long mi wan taem bakegen wanem hem i wan petriakel blesing mo olsem wanem bae i blesem laef blong mi. Hem i putum ol han blong hem antap long hed blong mi. Afta long eksperiens ia, laef blong mi i neva stap semmak bakegen.

Mi bin akseptem wan misin kol blong go long Skotlan mo mi bin gat wan gudfala eksperiens. Sam wik afta we mi bin kambak long hom, mi bin mitim waef blong mi long wan Jos miting. Mitufala i bin fren, mo mi askem hem blong i maredem mi. Mitufala i bin mared long Sol Lek Tempol.

Wan laen blong ol toktok long petriakel blesing blong mi i soemaot se bae mi save laef long wol ia wetem wan enjel. Long taem we petriak i givim long mi blesing ia, mi no bin save wanem ia enjel mo mining blong ol toktok ia. Taem mi livim tempol long dei we mi mo waef blong mi i bin sil, mi bin save wanem mining blong ol toktok ia. Hem i bin laet blong laef blong mi. Tangkyu i go long hem, from mi bin save laef long wan ples blong laet. Hem i bin karem glad mo hapines i kam long ol 8 pikinini, 25 apu pikinini, mo 2 smosmol apu pikinini blong mitufala. Ol pikinini blong mitufala oli bin talem se oli glad tumas from mama blong olgeta. Mi givim ol tangkyu i go long God from ol blesing blong gospel mo ol blesing we i no save finis blong ol kavenan mo ol odinens blong tabu tempol.

Setan bae i wantem blong yumi bilivim se yumi ol dakdak we i no naes, mo yumi no gat janis blong kam olsem Papa blong yumi long Heven mo tabu Pikinini blong Hem. Mi serem witnes se God i lavem wanwan long yumi long ol spesel wei. Olsem Elda Nil A. Makswel (1926–2004) blong Kworom blong olgeta Twelef Aposol i stap talem oltaem, “Fasin we God i yusum blong i helpem yumi kam huia Hem i wantem yumi blong kam, i stap long ol smosmol pat blong ol laef blong yumi.”¹ Yumi ol pikinini blong Hem. Mi kam blong save se yumi save kam antap long weaples yumi stap long hem naoia, mo kam “ol king mo kwin blong smol reva” taem yumi folem ol komanmen blong gospel.

Mi save wan nara samting tu. Mi save huia yu mo weaples yu kam long hem. Ol revelesen oli mekem yumi tingbaot se yumi bin fetful long laef bifo laef ia long wol (luk long Revelesen 12:7–11; D&C 138:56; Abraham 3:22–23). Taem yumi fasem ol testemoni blong yumi long ol bigfala trutok ia, wanwan dei bae i kam wan gudfala blesing long wanwan long yumi.

Stap long saed blong Lod. Sapos Hem i save lukaotem gud wan boe we i stap fraet olsem mi, bae Hem i save lukaotem gud yu naoia mo long fiuja. Yu yu wan pikinini boe o gel blong God we Hem i bin jusumaot. Jusum blong laef gud inaf blong kasem paoa, olsem hemia blong God, we i stap insaed long yu.