Gud Inaf blong Wet From

Taem mi go insaed long Buenos Aires Ajentina Tempol wetem ol yut blong wod blong mi blong mekem ol baptaes blong ol dedman, mifala i bin wet blong sam minit insaed long rum blong resepsen. Afta ol man we oli wok long tempol oli askem mifala blong go daon long wan rum we i gat sam jea i stap long hem mo blong mifala i wet bakegen.

From hem i wan Satedei, plante pipol oli bin kam long ol defren ples blong Ajentina blong go long tempol. Mifala i jes sidaon kwaet nomo mo wet long ples ia blong tu aoa haf. I gat sam nogud tingting i stat blong ron tru long maen blong mi: “Olsem wanem nao oli save mekem yumi wet longtaem olsem ia? Mi taed, mo i moa gud yet sapos mi no bin kam, from hemia, mi stap westem taem nomo.”

Mi stanap mo stat wokbaot i go daon long rum. I no longtaem wan man we i wok long tempol i kamaot mo talem se: “Ol yangfala pipol, plis yufala i no hariap. Mi andastanem se yufala i bin wet longtaem finis, be yufala i save wan samting? Long spirit wol, milian pipol ia oli bin wet from taem ia tedei, mo oli bin wet blong plante plante handred yia, mo mi save promesem yufala se oli wantem tumas blong janis blong olgeta i kam hariap. Ol brata oli stap baptaesem mo konfemem ol man, mo oli no save mekem moa bitim wanem oli stap mekem naoia.

Taem hem i talem ol toktok ia, mi harem mi sem. Mi luksave se mi bin stap selfis from mi no wantem blong givim plante aoa long ol pipol ia we oli bin wet blong plante longfala yia finis mo we oli no bin gat janis olsem we mi bin gat blong harem abaot tru Jos mo kasem baptaes long wol.

Man ia we i wok long tempol i kamaot bakegen, mo i stat blong singaotem ol nem blong olgeta blong wod blong mifala. Wan sista i givim long mifala sam waet klos we i bigwan smol long mifala. Afta mifala i jenis i go long ol waet klos ia, hem i fasem ol hea blong mifala wetem ol waet ribon.

Afta, mifala i wokbaot drae leg i go long stul insaed long ples blong baptaes. Ol tapi insaed ia oli sopsop mo oli hae olsem se mifala i no stap wokbaot long graon.

Taem taem blong mi i kam, mi harem mi fraet olsem we hem i dei blong baptaes blong miwan. Be olgeta we oli wok insaed long tempol oli bin naes long mi mo oli bin gat fasin blong save wet longtaem wetem wanwan long mifala mekem se hem i bin wan gudfala taem.

Taem mi kamaot long ples blong baptaes, wan sista i stap wet long mi finis wetem wan bigfala waet tawel mo wan bigfala smael. Mi bin jenisim ol klos blong mi mo go long wan rum we oli bin konfemem mi long hem. Sem sista ia we i bin givim tawel long mi i bin go wetem mi mo talem tangkyu long mi blong wantem mekem wok blong Lod.

Taem mi lego tempol, mi luksave se hem i bin wan long ol eksperiens we i moa gud long laef blong mi. Tempol hem i wan tabu ples mo Spirit blong Lod i stap long hem, mo i daerektem bigfala wok blong Hem. Hem i gud inaf blong save wet.