Faenem Paoa tru long Fasin blong Obei

Nomata we i no gat spring wota blong kam yangfala we yumi save stap lukaotem, be i gat wan narafala spring wota we wota blong hem i moa gud, we i ol wota blong laef we i no save finis. Hemia hem i spring wota blong trutok.

Man we i stap raetem poem ia i kasem stret bigfala tingting ia blong lukaotem trutok taem hem i raetem ol laen ia we i no save ded:

Long wan revelesen we oli givim long Profet Josef Smit long Ketlan, Ohaeo, long Mei blong yia 1833, Lod i bin talem se:

“Trutok hem i wan save abaot ol samting olsem we oli stap, olsem we oli bin stap, mo olsem we bae oli kam; … 

“Spirit blong trutok i kam long God; … Jisas i bin kasem ful trutok; …

“Mo i no gat man i kasem ful trutok kasem taem nomo hem i kipim ol komanmen blong Hem.

“Hem we i kipim ol komanmen blong Hem bae i kasem trutok mo laet kasem taem hem i kam antap long glori long trutok mo hem i save evri samting.”²

I no gat nid blong yu o mi long naesfala taem ia, we ful gospel i bin kambak, blong sel long ol solwota we yumi no save gud, o blong wokbaot long ol rod we yumi no save blong lukaotem spring wota blong trutok. From wan Papa long Heven we i gat lav i bin makem rod blong yumi mo i bin givim wan map we yumi save dipen evriwan long hem—fasin blong obei!

Toktok blong Hem we i bin kamaot, i talemaot klia ol blesing we i kam tru long fasin blong obei mo ol harem nogud we i kam long man we i wokbaot long ol rod blong sin we hem i no mas wokbaot long hem. Long wan jeneresen we i strong long kastom blong sakrifaes blong ol animol, Samuel i bin talem strong, “I tru we hem i wantem blong yumi kilim ol nambawan sipsip blong mekem sakrefaes long hem, be hem i wantem moa blong yumi obei long tok blong hem.”³

Ol profet, blong bifo mo blong naoia, oli bin save paoa we i kam tru long fasin blong obei. Tingbaot Nifae: “Bae mi go mo mekem ol samting we Lod i bin talem.”⁴ O ol naesfala toktok blong Momon abaot paoa we ol boe blong Mosaea oli bin gat:

“Oli bin kam strong long save blong trutok; from oli ol man blong wan stret haremsave mo oli bin stadi long ol skripja strong oltaem, blong oli save andastanem toktok blong God.

“Be i no hemia nomo; oli bin mekem plante prea, mo livim kakae; taswe oli bin gat spirit blong profesi, mo spirit blong revelesen, mo taem we oli bin tij, oli bin tij wetem paoa mo raet blong God.”⁵

Presiden Deved O. MaKei (1873–1970), long wan long ol fas mesej blong hem i go long membasip blong Jos long wan jeneral konfrens, i bin givim yumi daereksen blong yusum long taem blong yumi long wan simpol, be yet, long wan wei we i gat paoa: “Kipim olgeta komanmen blong God.”⁶

Samting ia i semmak long hevi toktok we i kam long Sevya blong yumi taem Hem i talem se evriwan we oli wantem wan blesing long Hem, oli mas obei long loa mo ol kondisen we oli kam wetem blesing ia, we oli bin stanemap finis bifo oli mekem wol ia.⁷

Ol stret aksen blong Masta oli mekem yumi bilivim ol toktok blong Hem. Hem i bin soemaot tru lav blong God taem Hem i bin laef long wan stret laef, mo i gvim ona long tabu misin blong Hem. Hem i neva flas. Hem i neva fulap long hae tingting. Oltaem Hem i fetful. Oltaem nomo Hem i gat tingting we i stap daon. Oltaem nomo Hem i stap talem trutok. Oltaem nomo Hem i stap tru.

Nomata we masta blong ol giaman, we i devel, i bin temtem Hem; nomata we Hem i bin kam slak long bodi from we Hem i bin livim kakae blong 40 dei mo 40 naet mo “hem i bin hanggri tumas” be yet, taem ivel wan ia i givim wan tingting blong temtem Jisas, Jisas i givim yumi wan eksampol we i kam long God abaot fasin blong obei, mo Hem i no tanem baksaed long wanem samting Hem i save se i raet.⁸

Taem Hem i bin fesem harem nogud long Getsemane, mo Hem i bin go tru long sobodi we i mekem swet blong Hem i ron olsem ol bigfala drop blong blad i foldaon i go long graon, Hem i bin soemaot eksampol olsem wan Pikinini we i obei taem Hem i talem, “Papa, sipos i stret long tingting blong yu, plis yu tekemaot ol samting ya we i stap mekem mi mi harem nogud. Be yu no mekem olsem we mi mi wantem, yu mekem olsem we yu nomo yu wantem.”⁹

Long Pita long Galili, Jisas i talem, “Folem mi.” Sem toktok ia Hem i talem long Filip, “Folem mi.” Long man blong tekem mane blong takis, Livae, we i stap sidaon long ofis blong hem, singaot ia i go long hem tu, “Folem mi.” Iven long wan we i ron biaen long Hem, wan we i gat plante samting, ol toktok ia i kam long hem, “Folem mi.”¹⁰ Sem voes ia i kam long yu mo mi, sem Jisas ia, we i stap talem, “Folem mi.” Yumi wantem blong obei?

Fasin blong obei hem i wan fasin we i blong ol profet, be yumi mas luksave se spring blong paoa ia i stap blong yumi yusum tu tedei.

Wan we i bin lanem gud ol lesen blong fasin blong obei, we i bin faenem spring wota blong trutok, hem i bin wan kaen mo tru man we i gat tingting we i stap daon long ol fasin mo situesen blong hem. Hem i bin joenem Jos long Yurop, mo i wokhad blong sevem mane mo mekem sakrifaes, mo i bin go long Not Amerika—long wan niu graon, wan defren lanwis, ol defren kastom, be Jos i semmak nomo anda long lidasip blong sem Lod, we hem i bin trastem mo i bin obei long Hem. Hem i bin kam branj presiden blong wan smol grup blong ol Sent we oli stap hadwok oltaem long wan siti we i nogud tumas. Hem i bin folem program blong Jos, nomata we i gat smol memba nomo mo plante wok. Hem i bin setemap wan eksampol long membasip blong branj blong hem, wan eksampol olsem hemia blong Kraes, mo oli bin ansabak long eksampol ia wetem wan lav we man i neva luk.

Hem i bin wok blong kasem mane wetem ol han blong hem olsem wan man blong salem ol samting. Mane blong hem i smol nomo, be hem i bin pem wan ful taeting oltaem mo i bin givim moa. Hem i bin statem wan misinari fan long smol branj blong hem, mo blong plante manis long wan taem, hemwan nomo i stap givim mane long fan ia. Taem i bin gat ol misinari long siti blong hem, hem i bin fidim olgeta, mo taem oli stap aot long haos blong hem, oltaem hem i mas givim sam tul olsem donesen long wok mo gud laef blong olgeta. Ol Jos memba blong ol defren siti we oli pas tru long siti blong hem mo visitim branj blong hem, oltaem oli stap harem gud long kaen fasin blong hem ia mo naesfala spirit blong hem mo oli gobak wetem save ia se, oli bin mitim wan defren man olgeta, wan tru wokman blong Lod we i stap obei.

Olgeta we oli bin prisaed ova long hem oli kasem bigbigfala respek we i kam long hem mo hem i lukaotem olgeta long fasin we i gud we i gud. Long hem, olgeta ia oli ol mesenja blong Lod; hem i givhan long saed blong ol nid blong olgeta long wol ia blong oli harem gud; mo hem i stap kaen speseli long ol prea blong hem—we hem i stap mekem oltaem—from gud laef blong olgeta. Wan Sabat dei, sam lida we oli bin kam visitim branj blong hem oli bin tekempat wetem hem long plante prea long ol defren miting mo long ol visit i go long ol memba. Ol lida ia oli bin livim hem long en blong dei ia wetem wan filing blong glad mo wan filing we oli bin kam antap long saed blong spirit we i bin kipim olgeta oli glad truaot long fo aoa draev blong olgeta i go bak long kolkol weta; mo naoia, afta plante yia, filing ia i mekem spirit i harem gud mo i mekem hat i riniu bakegen taem oli tingbaot dei ia.

Ol man we oli kasem edukesen, mo olgeta wetem plante eksperiens long wol oli stap lukaotem man ia we i gat tingting i stap daon, man ia blong God we i no gat edukesen mo oli bin luk olgetawan se, oli laki sapos oli save spendem wan aoa wetem hem. Fes blong hem i olsem eni narafala man nomo; Inglis blong hem i olbaot nomo mo samtaem i had blong andastanem; hom blong hem i simpol nomo. Hem i no gat wan trak o televisen. Hem i no raetem ol buk mo i no prijim ol bigfala toktok mo i no mekem eni samting we wol ia i stap lukluk tumas long hem. Be yet, ol fetful man oli stap resis i go long doa blong hem. From wanem? From oli wantem blong dring long spring wota blong trutok blong hem. Oli no wantem blong luksave tumas long wanem hem i bin talem, be wanem hem i bin mekem; oli no wantem luksave tumas wanem i kamaot long ol toktok we hem i bin prijim, be oli wantem luksave paoa blong laef we hem i bin lidim.

Blong save se, oltaem mo wetem glad, wan pua man i stap givim twante pesen blong hem long Lod, i givim wan klia tingting long tru mining blong taeting. Blong luk hem i givhan long olgeta we oli hanggri mo tekem ol strenja oli kam long haos blong hem, i mekem yumi save se hem i bin mekem hemia long yumi semmak olsem we bae hem i mekem long Masta. Blong prea wetem hem mo tekempat long tras blong hem long paoa we i kam long God tru long prea, hem i blong eksperiensem wan niu wei blong toktok.

Ok, i gud we yumi talem se hem i bin kipim fas mo bigfala komanmen mo sekenwan we i kolosap semmak long faswan,¹¹ se insaed long hem i bin fulap long jareti long ol man, se klin fasin i bin fulumap ol tingting blong hem oltaem mo, long en, tras blong hem i bin gro strong long fes blong God.¹²

Man ia i gat laet blong gud fasin mo glad blong stret mo gud fasin. Paoa blong hem i kam long fasin blong obei.

Paoa we yumi stap lukaotem tedei blong mitim ol jalenj blong wan wol we i had mo i stap jenis i save kam paoa blong yumi taem, wetem harem nogud mo wan strong tingting, yumi save stanap mo talemaot strong wetem Josua, “Be mi, wetem ol famle blong mi, bambae mifala i biaen long Hae God nomo.”¹³