Mi? Wan Man blong Lukaot long Sipsip long Isrel?

Josef Sej Merilas i livim hom kantri blong hem Haiti taem hem i gat 19 yia mo i bin muv i go long Dominik Ripablik long 1980 blong lukaotem wok. Eitin manis afta, hem i kambak long Haiti, i bin mared, mo i bin gobak long Dominik Ripablik wetem niufala woman blong hem, Marie Remon Estalin.

Taem tufala i statem mared laef blong tufala tugeta long niufala kantri we tufala i jes muv i go long hem, Josef i eksperiensem wan hanggri long saed blong spirit. Hem mo Marie i bin visitim sam jos blong fidim hanggri blong tufala ia, be olsem ol man Haiti we oli stap long kantri we oli toktok lanwis blong Spen, tufala i bin gat hadtaem blong andastaenem samting, mo blong ol man oli andastanem tufala. Long en, tufala i bin fas long tu Lata-dei Sent misinari, we tufala i bin invaetem tufala blong kam long jos. Afta we Josef mo Marie i bin atendem sam miting, ol misinari oli jes tijim ol lesen long tufala long lanwis blong ol man Spen, mo tufala i bin baptaes long Septemba 1997.

Oli bin singaotem Josef blong hem i wok long Sandei Skul presidensi, afta olsem wan kaonsela long branj presidensi, mo afta olsem branj presiden. Be from sam toktok we i no stret mo sam filing we i mekem tufala i harem nogud, plante long ol samting ia i kamaot from oli no bin gat gudfala komunikesen, Josef, Marie, mo faef pikinini blong tufala i bin stop blong go long jos mo plante lokol memba blong Jos oli bin fogetem gud olgeta.

Long ol nekis seven yia afta, tufala i bin gat fo moa pikinini mo tufala i bin welkamem wan nifiu mo wan nis we oli kam long Haiti insaed long hom blong tufala. Tru long plante hadwok Josef i kam blong save toktok gud lanwis blong ol man Spen mo Inglis, mo i stat blong tijim Inglis mo lanwis blong ol man Haiti long wan lokol kampani.

Long Ogis 2007, tu prishud lida, long rod blong tufala blong lukaotem ol sipsip blong Lod we oli bin lus, oli bin kamaot long doa blong famle ia. Oli bin faenemaot se Josef mo Marie i stil gat ol testemoni long gospel, nomata we tufala i no bin atendem ol miting blong seven yia. Ol lida ia oli bin invaetem famle ia blong kambak long jos, mo oli bin mekem long nekis dei blong hem nomo—13 long olgeta evriwan. Oli bin atendem seves stat long taem ia kam kasem naoia.

Tedei, Josef hem i wan branj misin lida long Barahona, we i stap long Saot Wes pat blong Dominik Ripablik. Tufala bigfala boe blong hem oli bin wok tu long branj lidasip, mo nifiu blong hem, wan niu elda we oli jes odenem nomo, hem i presiden blong ol Yang Man. Famle ia i jes go long tempol nomo, mo oli bin sil olsem wan famle we i no save finis.

Traem tingbaot, 13 sipsip we oli bin lus, naoia oli bin faenem olgeta from tu memba man blong lukaot long sipsip, tufala i bin wantem blong lukaotem, fidim mo karem famle ia i kambak long yad blong Lod. Lod bin lidim tufala i go long hom ia semmak olsem bae Hem i lidim yu mo mi, taem yumi lukaotem ol sipsip we i bin lus we oli stap long responsabiliti blong yumi.

Mi bin wan witnes mo wan patisipen long ol taosen visit blong givhan long ol narafala man. Mi testifae long gudfala paoa blong Spirit we i bin stap wetem olgeta. Mi bin luk plante sipsip we oli bin lus, oli bin kambak mo oli bin filim glad taem yumi welkamem olgeta i kambak long yad. Mi bin luk ol pipol oli filim spirit, oli givim blesing long olgeta, oli krae, oli serem ol testemoni, oli mekem prea mo kasem ol ansa, mo oli bin talemaot lav blong olgeta. Mi bin luk ol laef oli jenis.

Samtaem bitwin 592 mo 570 B.K., God i bin toktok long profet blong Hem, Esikel long saed blong ol man blong lukaot long sipsip we oli no stap mekem wok blong olgeta. From fasin ia blong no mekem wok blong olgeta, ol sipsip oli bin seraot. Lod i talem olsem abaot ol man blong lukaot long sipsip ia:

“Man blong wol ya. Yu mas tok agens long ol lida ya blong ol laen blong Isrel. Yu talem long olgeta we mi mi talem[:] … yufala i no lukaot gud long ol sipsip blong mi nating! …

“Olgeta we oli no strong, be yufala i no stap lukaot gud long olgeta, mo olgeta we oli sik, yufala i no stap mekem olgeta oli kam gud bakegen. Mo olgeta we oli karekil, yufala i no stap fasem ol soa blong olgeta nating blong mekem olgeta oli kam gud bakegen. Olgeta we oli mestem rod, mo olgeta we oli lus, be neva yufala i go lukaot olgeta blong tekem olgeta oli kambak. …

“… Oli ronronwe, oli go olbaot long olgeta ples long wol, mo i no gat man i go lukaot olgeta blong traem faenem olgeta.

“Mi mi Hae God; … Bambae mi tekemaot olgeta long han blong yufala” (Esikel 34:2, 4, 6, 10).

Long plante wei, yumi kam ol pipol blong jos we i lukluk nomo long olgeta we oli kam long japel. Yumi wok had blong givim kaekae long saed blong spirit mo tingting long olgeta we oli kam long jos, be olsem wanem long olgeta we oli bin lusum rod blong olgeta blong kam long japel?

Sapos mi bin kasem wan koling blong givim seves insaed long Jos, nao mi gat sipsip we mi gat wan diuti we i kam long God blong givhan mo blong givim seves long olgeta. Eksampol, olsem wan tija mi mi wan man blong lukaot long sipsip, i no long olgeta we oli kam long klas blong mi nomo, be tu, long olgeta we oli no atendem klas tu. Mi gat responsabiliti ia blong faenem olgeta, blong save gud long olgeta, blong kam fren blong olgeta, blong givhan long ol nid blong olgeta, mo blong karem olgeta i kambak long yad.

Olsem ol memba man blong lukaot long sipsip, bae yumi mekem gud sapos yumi tingbaot mo tingting hevi long ol tijing we oli stap long Luk 15. Long japta ia, Lod i bin tijim ol parabol blong sipsip we i bin lus, blong wan smol mane we i bin lus, mo blong yang boe we i bin lusum rod. Trifala parabol ia oli tokbaot “samting we i bin lus” mo oli bin faenem bakegen. Long parabol blong sipsip we i bin lus, Lod i askem:

“Hu long yufala we i gat handred sipsip blong hem mo wan long olgeta i lus, be hem i no tingbaot? Sipos wan long yufala i lusum sipsip blong hem olsem, bambae hem i mas livim ol naenti naen sipsip blong hem oli stap kakae long open ples, nao hem i mas go lukaot sipsip ya we i lus, gogo i faenem.

“Mo taem hem i faenem sipsip ya, bambae hem i glad tumas, i mas leftemap sipsip ya blong karem long solda blong hem.

“Mo taem hem i kamhom, bambae hem i mas singaot ol fren blong hem wetem olgeta we oli stap raonabaot long hem, blong talem long olgeta se, ‘Yufala i kam joen wetem mi, yufala i glad wetem mi, from mi mi faenem sipsip ya blong mi we i lus.

“Mo mi mi talem long yufala. Bambae long heven i olsem nomo. Bambae oli glad moa long wan man nomo we i man nogud, be i tanem tingting blong hem from sin blong hem, i winim we oli glad long naenti naen stret man, we oli no mekem samting we oli tanem tingting blong olgeta from” (Luk 15:4–7).

Long parabol ia, wan sipsip nomo i bin lus mo oli bin faenem, be hemia i no stap hapen olsem long ol wod mo branj blong yumi. Be olsem wanem yumi yusum parabol ia i stap semmak, nomata long namba blong ol sipsip we oli bin ronwe long yad.

Parabol i no talemaot yumi hamas taem nao i bin tekem blong oli kambak long yad. Long ol hadwok blong yumi olsem ol man blong lukaot long sipsip, bae sam sipsip bae oli kambak afta long wan singgel visit nomo, be sam bae i tekem sam yia blong yumi mas gohed blong givim ol naesfala tingting oltaem blong leftemap olgeta.

Long rod blong karembak ol brata mo sista blong yumi i kam long yad o jos, yumi no mas fogetem se ol sipsip ia we yumi stap karem i kambak … long yad oli stap “kolosap tumas long hat blong Man blong Lukaot long Sipsip.”¹ Hem i save gud wanwan long olgeta. Hem i lavem wanwan long olgeta wetem wan lav we i stret evriwan. From oli blong Hem, Hem bae i gaedem yumi, i daerektem yumi, mo i helpem yumi blong toktok sapos yumi askem, mo afta, sapos yumi lisin long voes blong Spirit. Tru long paoa blong Tabu Spirit, plante bae oli ansa gud taem yumi go aot long olgeta wetem wan tru hat mo wan tingting we i stap daon.

Bae yumi tingbaot ol responsabiliti blong yumi olsem ol man blong lukaot long sipsip, blong mekem se yumi save givim wan gudfala ripot long Lod long saed blong wok blong yumi ova long ol sipsip we Hem i bin givim long wanwan long yumi blong lukaotem.