Janis blong Mi blong Givim Seves

Bifo ol doa blong Resif Brasil Tempol oli open blong wan nara dei blong oli mekem ol odinens blong sevem man, Maria Rose de Arujo we i gat 70 yia i wekap blong rere blong wan narafala dei blong gudfala seves bakegen.

Blong go long tempol, Maria i mas travel blong wan aoa mo haf long fo defren bas stat long hom blong hem long Kabo de Santo Agostinho, saot blong Resife, we i stap long Not Is kos blong Brasil. Be bifo Maria i save go, hem i mas mekem rere kaekae mo ol narafala samting blong wan kasen blong hem we i blaen we hem i stap lukaotem long hom blong hem.

“Maria hem i wan gudfala eksampol blong givim seves long ol narafala man,” Sleto P. Olivera, we i tempol rekoda i talem. “Stat long taem we oli bin dediketem tempol long Disemba 2000, Maria i bin volontia blong givim seves long ples ia evri dei we tempol ia i bin open. Hem i stap wok tu long ol holidei.”

Stat long 7:00 oklok long moning kasem 3:00 oklok long aftenun evri Tiusde kasem Satedei, Maria i wok long ples blong kakae long tempol, hem i wasem ol plet mo mekem ol salad. Hem i talem se hem i wantem blong wok longtaem moa, be from longfala draev long bas i gobak hom, hem i mas lego wok eli blong gobak hom bifo ples i tudak.

Brata Olivera i talem long Maria se hem i no nidim blong kam long tempol evri dei, be hem i konfes se bae hem i nidim tu pipol blong oli tekem ples blong Maria. Brata Olivera i talem “Maria i jes smael mo i talem se hem i givim ful laef blong hem long Lod.”

Long Maria, blong givim seves long tempol evri dei hem i wan bigfala spesel janis.

“Papa blong mi long Heven i bin blesem mi wetem gudfala helt, mo gol blong mi hem i blong gohed blong kam evri dei, olsem we helt blong mi i letem mi,” hem i talem. “Mi bin mekem wan kavenan blong givim evri talen blong mi mo ol samting we mi save mekem blong givim seves long Lod. Taem mi go long hom blong mi afta we mi givim seves long tempol, mi no filim taed nating. Lod i bin blesem mi long wei ia.”

Bifo, taem hem i bin stap givim seves blong sikis yia long wod blong hem long famle histri senta, Maria i bin stap lukaotem famle laen blong hem. Afta, long sam Satedei moning bifo hem i stap go wok long ples blong kakae long tempol, hem i finisim ol tempol wok blong fo jeneresen blong ol famle blong hem long saed blong ol woman. Hem i mekem tu se oli finisim wok blong fo jeneresen blong ol famle blong hem long saed blong ol man.

Taem hem i stat lukaotem ol famle histri blong hem, Maria i bin filim se wok ia hem i no posibol—speseli taem hem i no bin save faenemaot ol nem blong tu (2) bubu blong ol bubu blong hem. Be wan naet, tufala nem ia i bin kamaot long hem long wan drim. Fastaem, hem i stap tingting se tufala nem ia i no stret, i mekem hem i stop blong mekem wok ia, be taem hem i stap lukaot long ol rekod blong mama blong hem, hem i bin faenem tufala nem ia mo i bin save mekem ol famle koneksen. Hem i biliv se drim ia i bin kam olsem wan blesing from ol hadwok blong hem blong givim seves long Lod mo ol pikinini blong Hem.

“Tempol hem i laef blong mi,” Maria i talem. “Ol pipol we oli no kam long tempol oli stap mestem wan bigfala janis mo blesing. Taem yumi givim seves long tempol, yumi kam blong andastanem stret mining mo paoa blong tempol.”