Sa Ia Motusia Noataga o le Oti

I se tasi po a o laiti le ma fanau, sa matou faia ai se suesuega faaleaiga o tusitusiga paia. Sa matou faitau e uiga i le Faaola ma talanoa e uiga i le leai o ni measese na Ia faia.

I se taimi mulimuli ane o lena po, sa faamoe ai e lo’u toalua le ma tama teine e tolu tausaga le matua, o Susi. Sa tilotilo ae Susi i lona tina ma fai mai, “Tina, e i ai se measese sa fai e Iesu.”

“O le a le uiga o lau tala?” o le fesili atu lea a lona tina.

“E i ai se mea sa ia momotuina,” o le tala lea a Susi.

Sa fai si le mautonu o lona tina ma fesili atu, “O le a le mea sa Ia momotuina?”

“Sa momotu e Iesu noataga o le oti,” o le tali lea a Susi.

Sa oo ina iloa e lo’u toalua na faafia ona la usuina ma Susi le pese Peraimeri “I Se Taeao Manaia”, ma na aoaoina ai e Susi upu “I se taeao manaia, Iesu na toetu. Ma tuua ai le tuugamau le oti ua leai.”¹ Sa faamalamalama atu e le tina o Susi e faapea, o le momotuina o noataga o le oti, o lona uiga sa toetu Iesu ina ia mafai e i tatou uma ona toe ola pe a tatou feoti.

O lena talanoaga ua tuuina mai ai ia i maua ma lo’u toalua ni avanoa se tele e aoao ai le ma fanau teine o Lisi, Susi, ma Ema, e faatatau i le uiga moni o le Togiola ia i tatou taitoatasi. E sa’o Susi: Sa motusia e Iesu noataga o le oti. Ae e le o se measese. O le meaalofa aupito maoae lea e mafai ona Ia tuuina mai ia i tatou! (Tagai i le Mataupu Faavae ma Feagaiga 14:7.)

Na maliu le Faaola ma sa toetu mai ina ia mafai ona tatou toe nonofo faatasi ma lo tatou Tama Faalelagi ma o tatou aiga e tusa ai ma o tatou amiotonu. Afai tatou te agavaa, e mafai ona tatou olioli i faamanuiaga o le tino ola pea ma le ola e faavavau i se aso. Ou te faafetai ona sa motusia e Iesu se mea—o noataga o le oti!