Talanoa Faatasi
O nisi nei o fautuaga mo le faia o a outou lava “taimi o talanoaga” faaleaiga:
-
Fai atu i ou matua e uiga i le faaavanoaina o ni nai minute o aso taitasi mo lo outou aiga e talanoa faatasi ai. Atonu e mafai ona fai i le taimi o se taumafataga po o se taimi faapitoa o le aso.
-
Ia mautinoa e tofu tagata uma ma se avanoa e tautala ma faalogo ai. Ia faaaofia ai tagata uma lava!
-
Ia faaaloalo i manatu o tagata o lou aiga. Ia mautinoa e lagona e tagata uma o le mea o loo fai mai ai le isi tagata e taua.
Taaloga e Talanoa Ai
E manaomia nisi o manatu mo ni taimi o talanoaga? Faataitai taaloga nei:
Togiina o le Taga Fatupi: Afai e toatele lou aiga pe faigata foi ona faasolo avanoa, faaaoga se taga fatupi e faailoa ai po o ai ua oo i lona taimi e tautala ai. A uma ona fai le faamatalaga a le tagata o loo i ai le taga fatupi, ona togi lea o le taga fatupi i le isi tagata o le aiga mo lona taimi e tautala ai.
Tagata Fai Faatalanoaga: Vaevae i ni vaega taitoalua ma auauai e faafoliga e pei o ni tagata fai faatalanoaga. Mafaufau i ni nai fesili mo lau paga ona fai atu lea ia te ia o fesili. E mafai ona outou faaaogaina ni masini faaleoteleleo mo’i po o se laau pu’eleo mo a outou faatalanoaga.
O Le A Se Mea E Te Faia? Ia auauai e fai atu i lou aiga ni fesili eseese e amata i le “O le a se mea e te faia … ?” O nisi o faataitaiga o le, “O le a se mea e te faia pe a e leiloa?” ma le “O le a se mea e te faia pe a mafai ona e alu i soo se atunuu o le lalolagi?”
Fesoasoani mo Matua: Taimi ma le Tagata-e-Toatasi
E ui lava i le malie o le talanoa o se aiga, ae e taua foi i matua ma fanau ona faaalu se taimi faatasi ma le tagata-e-toatasi. Ia faaaoga tatau taimi o le aso e mafuta taitoatasi ai ma lau fanau. Ia valaaulia le tamaitiiti se toatasi i le taimi e fesoasoani atu ia te oe e faatino se galuega i le fale, e te lua o faatasi i se feau, pe lua te talanoa i totonu o lou potu mo ni nai minute. O ni nai taimi pupuu lava e mafai ona taitai atu ai i ni talanoaga anoa.