O Le A Ou Toe Vaai Ia Te Ia

Sa fai e Tama ia lagona e i matou uma taitoatasi o lana fanau matou te faapitoa. Sa alofa tele o ia ia i matou ma e faigofie lava ona ia faamagalo atu. Sa ia faia le mea sili ia mautinoa sa fiafia i matou uma taitoatasi, ma sa ia faamanino mai sa manao i le mea silisili ona lelei mo i matou. Sa ou alofa tele ia te ia.

A o o’u i le vasega ono, sa maliu ai lo’u tama i se faalavelave tau taavale. Sa matuai faavauvau i matou ma lo’u aiga. Sa i ai se ava tele i totonu o le matou aiga. O Tama o le tagata lea sa ou faalagolago i ai, o le tagata sa ou alu i ai pe a i ai ni o’u faafitauli. Nai lo le sailia o se fesoasoani, sa ou faatagaina le ita ma le tiga e nofo ia te a’u. Mulimuli ane, sa ou faia ai se faaiuga o le sese lea a le Atua. Sa ou le toe faitauina tusitusiga paia ma le toe faia a’u tatalo. Sa ou alu i le lotu ona sa manao lo’u Tina ou te alu. Sa ou taumafai ou te taumamao ese mai lo’u Tama Faalelagi.

Ona ou alu lea i le tolauapiga a Tamaitai Talavou mo le taimi muamua lava. Sa ou fiafia e fetaui i uo fou, ae sa ou le faitauina lava a’u tusitusiga paia. I le po mulimuli, sa fai ai la matou lotu molimau. Sa ou lagonaina se mea sa ou le lagonaina i se taimi umi: o le Agaga. Sa ou faamemelo i teineiti o e sa o i luga ma tuuina mai a latou molimau, ae sa ou saofai lava aua sa ou manatu e le’i i ai sa’u molimau. Sa faafuasei lava ona ou lagonaina e tatau ona ou alu i luga. Sa matala lo’u gutu, ma mafaufau i sa’u tala e fai. O lea sa ou fai atu ai sa ou fiafia i le tolauapiga a Tamaitai Talavou. Ona iu ai lea ina ou faapea atu, ou te iloa sa maliu Iesu Keriso mo a’u ma e alofa lo’u Tama Faalelagi ia te au ma e moni le Ekalesia.

Sa faatumulia au i se toafilemu uigaese. Faafetai i lenei aafiaga ua mafai nei ona ou faapea atu, ua ou iloa o le a ou toe vaai i lo’u tama ona o le Togiola ma le Toetu a le Faaola.