Vinemoana ma le Tusi a Mamona

O ni nai tausaga ua mavae sa siitia atu ai lo matou aiga i se eria televave ma tumutumu i se fanua laitiiti maotua i fafo atu o se nuu laitiiti filemu. Sa latalata ane i ai se faatoaga o vinemoana ua tuutiaia, ma e ala mai i uo a lē e anaina, sa matou maua ai le faatagaga e tau ai ni vinemoana sa matou mananao i ai.

O ni nai taeao o vaiaso taitasi i lena taumafanafana, sa matou feosoi uma ai i luga o le matou taavale ma a matou pakete ma taga ma faaalu se itula malie ma le manaia i le aoina mai o vinemoana. I se tasi taeao, sa fai ai si musu o le ma atalii laitiiti o Ailama matou te o. Sa ia mautinoa ua uma ona matou tauina mai vinemoana uma ma o le a maumau le taimi e toe o ai i ai. Sa matuai faateia o ia i lona mauaina o vinemoana na sili ona tele nai lo se isi lava taimi. Sa i ai ni taufui i nofoaga na te le’i sueina, ma o nisi vine e sili ona susua sa tautau i lala sa ia mautinoa sa ia sueina muamua.

I le taimi lava foi lea e tasi, sa luiina ai e taitai o le autalavou o le uarota a matou tupulaga talavou e faitau atoa le Tusi a Mamona a o lei toe amataina aoga ia Aokuso o le tausaga lena. Sa aumai e le ma fanau le lui i le fale, ma sa tautino loa lo matou aiga e auai faatasi ma i latou i a latou taumafaiga.

E le’i umi ona matou faamaeaina le Tusi a Mamona ae oo mai le matou Liahona o Aokuso 2005, faatasi ai ma le lui a Peresitene Gordon B. Hinckley (1910–2008) ia oo atu i le faaiuga o le tausaga ua uma ona faitau atoa le Tusi a Mamona. Sa matuai fiafia Ailama ma lona uso o Iosefa— i le mafaufau e faapea ua uma ona matou usitai i le perofeta! Ae sa faamanatu atu e o la tei matutua, o Setu ma Petania, ua saunoa mai Peresitene Hinckley ia matou toe faitauina, e tusa lava pe ua faafia ona uma ona matou faia.

“Ae aisea?” o le fesili lea a le aualii. “Ua tatou faitauina upu uma, ma o le a le isi mea o i ai e toe aoao e ese mai i mea ua uma ona tatou faitauina?”

Ina ua mavae sina taimi o le fifilemu, sa ta’ua e se tasi ia vinemoana. “Manatua le taimi sa tatou faapea ai ua uma ona tatou tauina uma ia vinemoana? Ae ina ua tatou toe o atu i ai, sa i ai lava i taimi uma nisi vinemoana—i taimi uma lava! E le afaina pe faafia ona tatou o i ai, e tusa lava pe le’i leva atu foi, ae sa i ai lava i taimi uma taufui vinemoana.”

Sa vave ona matou iloa le sootaga. E pei o le faatoaga lata mai ma ona sapalai e tele o vinemoana mananaia, o le Tusi a Mamona o se punavai tumau o meaai faaleagaga o i ai upumoni fou e ao ona iloaina. O lea sa matou toe amataina ai ona faitau le Tusi a Mamona.

A o ou taliaina le lu’i a le perofeta, sa ou faitauina mea i le Tusi a Mamona ia sa faafia ona ou faitauina, ae sa ou vaaia ia mea i se auala e ese pe malamalama foi i ai a o faatatauina i ni tulaga po o ni lui fou. Ua ou iloa o taimi taitasi tatou te faitauina ai ma le faamaoni le Tusi a Mamona, e mafai ona tatou maua ai ni aoaoga fou ma latalata atili atu ai i le Faaola.