Faaavanoaina o le Taimi e Talanoa ma Faalogo Ai

Saunia e Rosemary M. Wixom

Peresitene Aoao o le Peraimeri

Mai se lauga o le faasalalauga faasatelite o le konafesi faalesiteki a le Aai o Sate Leki sa faia i le aso 24 o Oketopa, 2010.

O a tatou taumafaiga faamoemoeina ia lelei atu a tatou fesootaiga i le taimi nei o le a faamanuia ai o tatou aiga e faavavau.

Ata

Rosemary M. Wixom

I se lalolagi atoatoa o le a foi atu ai tamaiti uma mai le aoga ae faafeiloaia e se ipu kuki manogi e i ai fasi sukalati na faatoa uma lava ona tao, se ipuinu umi o le susu malulu, ma se tina ua sauni mai e faaavanoa le taimi e talanoa ma faalogo atu e uiga i le aso a lana tama. Tatou te le o nonofo i se lalolagi atoatoa, afai e te manao ai, ia faamisi ia kuki ma le susu, ae aua le faamisiina le “faaavanoaina o le taimi e talanoa ma faalogo ai.”

O le luasefuluiva tausaga talu ai, sa faaalia ai le faanoanoa o Peresitene James E. Faust (1920–2007), Fesoasoani Lua i le Au Peresitene Sili, e faapea, ua matuai itiiti lava se taimi e faatasitasi ai aiga. Mafaufau i lena mea—ua 29 tausaga ua mavae—sa ia saunoa i le konafesi aoao: “O le tasi o faafitauli autu i aiga i aso nei o le, ua faasolo ina itiiti taimi tatou te faatasitasi ai. … O le taimi e faatasitasi ai o le taimi faapelepele lea—o le taimi e tatau ona talatalanoa ai, e faalogologo ai, e fefaamalosiau a’i ai, ma faaali atu ai auala e fai ai se mea.”¹

A o tatou faaaluina faatasi ia taimi ma talatalanoa ma a tatou fanau, e iu ina tatou iloa lelei i latou ma latou iloa lelei foi i tatou. O mea e ave i ai la tatou faamuamua, o lagona moni o o tatou loto, o le a avea ma se vaega o a tatou talanoaga ma tamaiti taitoatasi.

O le a le savali numera tasi mai lou loto e te filifilia e faasoa atu i lau tama?

Ua aoao mai i tatou e le perofeta o Mose i le Teuteronome:

“E te alofa atu ia Ieova lou Atua ma lou loto atoa, ma lou agaga atoa, ma lou manatu atoa.

“Ia i ai foi i lou loto o upu nei ou te fai atu ai ia te oe i le aso nei:

“Ia e matua aoao soo ai i lau fanau, ma ia e tautalatala ai pe a e nofo i lou fale, pe a e savali foi i le ala, pe a e taoto, pe a e tulai foi” (Teuteronome 6:5–7; faaopoopo le faamamafa).

Ma ou te fia faaopoopo atu ma le tasi lenei: “Ma pe a outou aai faatasi i le laulau.”

Afai tatou te mananao i o tatou aiga ia faatasi e faavavau, tatou te amataina le faagasologa i le taimi lenei. O le faaaluina o le taimi e talatalanoa ai ma a tatou fanau, o se faaputuga oa i lo tatou aiga e faavavau a o tatou savavali faatasi atu i le ala e agai atu i le ola e faavavau.

Sa faasoa mai e se tasi o tina mai Ilinoi, ISA, le faiga sa ia faaavanoaina ai le taimi e talatalanoa ma si ana fanau:

“A o laiti le ma fanau, sa ou faia se aga masani o le matamata i ni nai polokalama sa sili ona ou fiafia i ai i le televise. … O le mea na leaga ai, sa o mai ia polokalama i le taimi tonu lava foi lea e o ai le fanau e momoe.

“… Sa i ai se taimi sa ou iloaina ai sa ou tuua a’u polokalama i le pito i luga o la’u lisi ae faapito lava i lalo la’u fanau. Mo se taimi sa ou taumafai ai e faitau tala e faamomoe ai a o ola foi le televise, ae sa ou iloaina i lo’u loto sa le o le auala sili lea. A o ou mafaufau loloto e uiga i aso ma vaiaso sa ou maumauina i lau masani o le matamata televise, sa amata ona ou lagona le tausalaina ma filifili ai loa e sui. Sa fai si umi o o’u faatalitonuina a’u lava e mafai moni lava ona ou tapeina le televise.

“Ina ua mavae le tusa o le lua vaiaso o le tapeina o le televise, sa ou lagonaina le pei ua aveese atu se avega. Sa ou iloaina sa sili atu le lelei o o’u lagona, sa pei ua mama foi, ma sa ou iloaina sa ou faia le filifiliga sa’o.”²

O le taimi e faamomoe ai tamaiti o le taimi lelei lea e talatalanoa ai.

Sa fai mai Helamana e uiga i le autau totoa, “Sa latou faamatala mai ia te au upu a o latou tina, fai mai: Matou te le masalosalo lava sa mautinoa lena mea e o matou tina” (Alema 56:48).

O “upu a o latou tina” sa aoaoina ai i latou. A o talanoa atu i a latou fanau, sa aoao atu e na tina le afioga a le Atua.

Faasaosaoina o Fesootaiga Patino

E tele se lelei e maua mai le talatalanoa, ma ua iloa lelei lava foi e le fili le mana o le upu tautalagia. E fiafia o ia e tuuitiitia le agaga lea e oo mai i totonu o o tatou aiga pe a tatou talatalanoa, faalogo, fefaamalosiauai, ma faifaimea faatasi.

Sa le’i manuia taumafaiga a Satani e taofi le Toefuataiga o le talalelei a Iesu Keriso i lenei tisipenisione ina ua ia taumafai e faamuta se talanoaga taua i le va o Iosefa Samita ma le Atua le Tama ma Lona Alo o Iesu Keriso.

I upu a Iosefa, “[Sa] vave ona taofia o a’u e se mana sa lofitu atoa ai a’u, ma sa i ai sona mana uiga ese i luga o a’u sa taofia ai lo’u laulaufaiva ina ia le mafai ona ou tautala” (Iosefa Samita—Talafaasolopito 1:15).

E matuai manao lava le fili e taofia o tatou laulaufaiva—soo se mea lava ia taofia ai i tatou mai le faailoaina atu faafesagai i upu ia lagona o o tatou loto. E fiafia o ia i le mamao ma mea faalavefau; e fiafia i le vavao; e fiafia i faamatalaga faalealofa—soo se mea lava e mafai ona taofia ai i tatou mai le mafanafana o se leo ma lagona patino lea e oo mai mai le talanoa faafesagai.

Faalogo Atu i Loto o a Tatou Fanau

O le faalogo e tutusa lava le taua ma le talanoa. Na saunoa ia Elder Jeffrey R. Holland o le Korama a Aposetolo e Toasefululua: “Afai tatou te faalogo ma le alofa, tatou te le tau manaomia ona mafaufau po o le a le mea e tau atu. O le a tuuina mai ia i tatou … e ala i le Agaga.”³

A tatou faalogo, tatou te vaai atu i totonu o loto o i latou e siomia i tatou. O loo i ai se fuafuaga a le Tama Faalelagi mo Ana fanau taitoatasi. Mafaufau pe a faapea e mafai ona tatou iloa atu le fuafuaga patino mo a tatou fanau taitoatasi. Ae faapefea pe afai e mafai ona tatou iloa le ala e faaleleia ai o latou meaalofa faaleagaga? Ae faapefea pe afai e mafai ona tatou iloa le ala e faaosofia ai se tamaitiiti ia ausia lona gafatia? Ae faapefea pe afai e mafai ona tatou iloa le ala e fesoasoani atu ai i tamaiti taitoatasi i le suiga mai le faatuatua o se tamaitiiti i le molimau?

E mafai faapefea ona tatou iloa?

E mafai ona tatou amata iloa e ala i le faalogo.

Fai mai se tasi o tamā o le Au Paia o Aso e Gata Ai: “E sili atu le tele o le lelei e mafai ona ou faia pe a ou faalogo i la’u fanau nai lo le taimi ou te talanoa ai ia i latou. … Ua aoaoina malie lava, o la’u fanau e le mananao i a’u tali ua leva ona fatufatu, taimi talafeagai, ma le poto. … Ia i latou, o le mafai ona fai mai o a latou fesili ma ia talanoa e uiga i o latou faafitauli e sili atu le taua nai lo le mauaina o a’u tali. E masani lava a uma a latou tala, afai ou te faalogo lelei ma mo se taimi umi, latou te le manaomia moni lava a’u tali. Ua uma ona latou mauaina a latou tali.”⁴

E fai si umi o le taulai atu i mea na e sili atu ona taua. O le talatalanoa, faalogo, ma le faamalosiauina e le vave ona tupu. E le mafai ona faatotopea pe atofaina—e sili atu le lelei o le taimi e tupu ai. E tutupu pe a tatou faia faatasi ni mea: galulue faatasi, fatufatuai faatasi, ma taaalo faatasi. E tutupu pe a tatou tapeina ala o faasalalauga, faataatiaese ia faalavefau o le lalolagi, ae taulai atu i le tasi ma le isi.

O le taimi nei, o se mea faigata le faia o lena mea. A tatou taofi ma tape mea uma, e ao ona tatou saunia mo le mea o le a sosoo ai. O le taimi muamua, o le filemu e ono fai si vevela; e ono sosoo mai ai ma se lagona le lagolelei o le faanoanoa. Ia onosai, faatalitali mo ni nai sekone, ia ona fiafia lea. Tuu atu lou mafaufau atoa ia i latou o siomia oe e ala i le fai atu o se fesili e uiga ia i latou ona amata lea ona e faalogo. Matua, talanoa i se mea e fiafia i ai lau tama. Talie i mea ua tuanai—ae miti i le lumanai. O se talanoaga faavalevalea e mafai foi ona matala mai ai se talanoaga anoa.

Faamuamuaina o Lo Tatou Faamoemoega e Faavavau

O le tautotogo ua tuanai atu, a o ou asiasi atu i se vasega o tamaitai talavou, sa fai atu ai le faiaoga i le vasega e tusi atu mea e 10 e ave i ai la tatou faamuamua. Sa vave ona ou amata tusitusi. Ou te faapea atu, o le mea muamua sa ou mafaufau i ai sa amata i le “Numera 1: tapena le kapoti penitala i le umukuka.” Ina ua uma a matou lisi, sa fai mai le taitai o Tamaitai Talavou e faasoa atu mea na matou tusia. O Abby, o lē sa le’i leva ona atoa lona 12 tausaga, sa nofo i o’u tafatafa. O le lisi lenei a Abby:

Alu i le kolisi.
Avea ma se tagata mamanu faatufugaga i totonu [o fale].
Alu i se misiona i Initia.
Faaipoipo i le malumalu i se faifeautalai ua foi mai le misiona.
Maua se fanau e toalima ma se fale.
Auina atu la’u fanau i misiona ma i le kolisi.
Avea ma se tinamatua e “foai atu kuki”.
Faifaaleaga fanau a fanau.
Aoao atili e uiga i le talalelei ma fiafia i le olaga.
Toe foi atu e nonofo faatasi ma le Tama o i le Lagi.

Sa ou faapea atu, “Faafetai lava, Abby. Ua e aoaoina au e uiga i le i ai o se vaaiga mamao i le fuafuaga a le Tama Faalelagi mo i tatou uma. A e iloa o loo e savalia se ala, e tusa lava po o a auala taamilo e ono oo mai, o le a e le afaina lava. A taulai atu lou ala i le sini aupito taua—o le faaeaga ma le toe foi atu i lo tatou Tama Faalelagi, o le a e oo atu iina.”

O fea na maua mai ai e Abby lenei lagona o le faamoemoega e faavavau? E amata mai i totonu o o tatou aiga. E amata mai i totonu o o tatou auaiga. Sa ou fesili atu ia te ia, “O a au mea e fai i lou aiga e fausia ai na mea e ave i ai lau faamuamua?”

O lana tali lenei: “E ese mai i le faitauina o tusitusiga paia, o loo matou suesueina le Tala’i La’u Talalelei.” Ona ia faaopoopo mai lea, “Matou te talanoa soo—i afiafi faaleaiga, pe a aai faatasi i le afiafi, ma i totonu o le taavale pe a matou tietie.”

Sa tusia e Nifae: “Ma ua matou tautalatala e uiga ia Keriso, ua matou olioli ia Keriso, ua matou talai atu Keriso.” Aisea? “Ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala” (2 Nifae 25:26).

O le talanoa, faalogologo, ma le fefaamalosiaua’i o le tasi i le isi, ma le faia faatasi o mea o se aiga o le a tatou latalata atili atu ai i lo tatou Faaola, o lē e alofa ia i tatou. O a tatou taumafaiga faamoemoeina ia lelei atu a tatou fesootaiga i le taimi nei—i lenei lava aso—o le a faamanuia ai o tatou aiga e faavavau. Ou te molimau atu a tatou tautalatala e uiga ia Keriso, ua olioli foi ia Keriso ma i le meaalofa o le Togiola. O le a iu ina iloa e a tatou fanau “po o le a le puna e mafai ona latou tepa taulai i ai mo se faamagaloga o a latou agasala.”