O Le A Ou Oti!

I le avea ai o se tausisoifua i se iunite pisi e mataitū ai le sologa manuia o taotaga e uma ona fai, sa ou maua ai se valaau i se tasi aso e uiga i se gasegase e igoa ia Pili, o lē sa faatoa uma lava lona taotoga. Sa tatau ona avatu o ia i le iunite e tausi ai gasegase tigaina, ae sa sui mai ia te a’u ona ua tumu le iunite lena.

E le’i umi ae taunuu mai le gasegase ma lona aiga. Sa o’u faafetai i le vaai atu sa malamalama, faalagolago, ma sa le’i vaaia se tulaga mafatia.

Ina ua uma ona fai ana faailo taua ma faamasani o ia ma lona aiga i lona potu, sa ou lalaa atu loa i le potutele e tusi se faamatalaga i lana siata. E fetaui lava le papai o la’u peni i le pepa, ae ou faalogoina loa le faapea mai o se leo, “Toe foi atu i lona potu.” Sa taofi lau tusitusi ma ou tilotilo ane i o’u tua. Sa leai se isi iina. Sa ou faapea sa ou mafaufauina le leo, ae sa faafuasei ona ou toe faalogoina mo le taimi lona lua—ae ua leotele atu.

Sa ou toe tamoe atu i le potu o Pili ma iloa ai ua faaluaina le fufula o lona ua, ma sa i ai se faaletonu i lana manāva. O le mafaufau e faapea ai ua pu le alatoto o lona ua, sa ou oomiina tonu ai lona ua i lo’u lima taumatau a o faaaoga lo’u lima agavale e valaau ai le tagata faata uaua sa faatinoina lona togafitiga. Sa fai mai le fomai tipitipi o le a ia auina mai nisi e ave atu Pili i se taimi vave lava. “Ma aua ne’i aveesea lou lima!” o lana tala lea.

A o faaauau ona ou oomia, sa ou matauina se tusi masani a le Ekalesia i tafatafa o le moega o Pili. “O oe o se tagata o le Ekalesia?” o lau fesili lea.

Sa taumafai o ia e lue mai lona ulu ona ia ta’u mai lea ia te a’u o ia o se tagata galue i sauniga i le Malumalu o Atlanta Georgia. Ona ia taumafai lea e aua ne’i tagi ma fai mai, “O le a ou oti!”

Sa ou tau atu ia te ia e le oti, ma faapea atu ma le mausali, “Ou te faaipoipo i le Malumalu o Atlanta i le masina a sau, ma o le a e i ai iina.” Sa taunuu mai le vaega o le au fomai tipitipi ma aveese faavave atu Pili.

I le fiafia ai i fuafuaga o la’u faaipoipoga i le masina a sau, sa toeitiiti lava a galo ai ia te au ia Pili, o le, sa maua ane sa tali atu lona tino i vailaau faafomai. Ae ina ua taitai atu au e le faatina o le malumalu i le potu o le faamauga i le aso o la’u faaipoipoga, sa ou vaaia ni foliga masani: o le faletua o Pili o Georgia. Ina ua ou fai atu ia te ia o lea o le a ou faaipoipo, sa alu atu o ia ma sue mai Pili. O se taimi e le’i mamao ae amataina le sauniga, sa matala mai ai le faitotoa ma ulufale mai o ia i totonu. I le mavae ai o vaiaso o le ulutiga, faafaufau, ma le vaivai, sa faapea ona maua le malosi o Pili i lena aso e malaga atu ai i le malumalu, ma le le iloaina o le aso lea o la’u faaipoipoga.

E lua tausaga mulimuli ane ae valaauina i maua ma lo’u toalua o ni tagata galulue i sauniga i le Malumalu o Nashville Tennessee. Ina ua ma taunuu atu i le malumalu ina ia vaetofiaina, sa tatala mai e se tamalii le faitotoa mo a’u ma faapea mai, “Susu mai i le Malumalu o Nashville!” O le Tuagane ia Pili.

Sa matou galulue faatasi mo le tolu tausaga. Sa faamatala atu e Pili i tagata uma sa ou sefeina lona ola, ae sa ou iloaina sa laveaiina o ia e le Alii. I le faagasologa, sa ia aoaoina au i le taua o le usitai i musumusuga a le Agaga.