Sa Ou Lagonaina e Tatau Ona Ou Sau

Ua lua ma le afa tausaga talu ona ou papatiso i Buenos Aires, Atenitina, ae sa tatagi pea i o’u taliga upu a se alii faifeautalai o lē sa aoaoina au: “Ou te iloa o oe o se faifeautalai.” Sa ou manatuaina foi le tali mamana na ou mauaina ina ua ou tatalo e fia iloa pe moni lava le lagona lea na tuia ai lo’u loto. I le 20 o ou tausaga, sa ou iloaina e tatau ona ou saunia mo se misiona.

Ae e faapefea ona avea au ma se faifeautalai? Sa leai se mea ou te faapei ai o le alii talavou pei o se agelu lea sa aoaoina au i le talalelei. Ma e faapefea ona ou tuua la’u galuega? O fea o le a ou nofo ai pe a ou foi mai? Sa faigata tele ona sue le nofoaga lea sa ou nofo ai, e ui lava sa na o se potu laitiiti i le pito i tua o le fale o se isi tagata.

A o ou alu atu i le fale i se tasi afiafi, sa faapea ona toe oo mai nei lagona ma masalosaloga i lo’u mafaufau. Ina ua ou oo atu i le fale, sa ou taumafai e fai se faaiuga. Sa tonu ia te au e tootuli ma fai se tatalo mo se fesoasoani. A o ou faia, sa oo mai se lagona malosi e tatau ona ou alu e vaai Leandro, o se uo o lē sa avea ma se malosiaga tele ia te a’u i taimi faanoanoa.

Ae o le mafaufau atu i le fafaguina o ia i le vaeluapo na mafua ai ona ou teena le manatu. Sa ou iloaina e alapo lava o ia e alu e faigaluega, ma sa le mafai ona ou tuitui atu i lona faitotoa i lena taimi. Sa ou tauivi i nisi o manatu ae sa faaauau pea ona ou lagonaina le uunaiga ou te alu e vaai o ia. Ae, sa ou filifili lava e le amanaia.

Nai lo lena, sa ou filifili loa e savalivali solo i le matou pitonuu mo se ea fou. Ae peitai, ina ua ou manatuaina ou te le’i tapunia lo’u faitotoa, o lea sa ou toe foi ai i le fale. A o ou ulu atu i totonu, sa ou vaaia Leandro o saofai mai i totonu o lo’u potu. Sa oo mai le Agaga ia te a’u, ma sa pei ou te tau le manava. Faatasi ai ma se leo sa tau mole i le ootia, sa ou fesili atu ia te ia, “O le a lau mea o fai iinei?”

“Ou te le iloa,” o lana tala lea. “Sa na ona ou manatu lava e tatau ona ou sau e vaai oe.”

Sa ou faamatala atu ia te ia ia masalosaloga sa ia te a’u e uiga i se misiona. Sa ia tuuina mai se molimau ma faamalosiau mai ia te au. Ona ia fesoasoani lea e faatumu a’u pepa o le misiona, lea sa ou aveina atu i lo’u epikopo i le taeao sa sosoo ai. E lua masina mulimuli ane ae ou maua lo’u valaauga i le Misiona a Atenitina Salta.

Ou te iloa o la’u uo o se auupega i aao o le Alii i lena po, ma faatasi ai ma lo’u loto atoa, ua ou iloa e faafofoga mai le Tama Faalelagi ma tali mai i talosaga e faapea ona faia ma se loto faamaoni ma le manatu tonu i ai.