Faamoemoe i le Togiola

Ua ou fetaui i tagata ua matuai leai lava ma ni faamoemoe. Ua latou manatu, o le salamo, ua mamao ese ma i latou ae o le faamagaloga ua le mafai ona latou au atu i ai. O tagata faapena ua le malamalama i le mana faamama o le Togiola. Ae, afai foi e malamalama, latou te le’i faapatinoina (internalized) le uiga o puapuaga o Iesu Keriso i Ketesemane ma luga o le satauro. Mo soo se tasi o i tatou e lafoai le faamoemoe mo le faamamaina o o tatou olaga o lona uiga o le teena o le loloto, mana, ma le lautele o Ona mafatiaga e sui ai mo i tatou.

O ni nai tausaga ua mavae sa ou maua ai se tofiga a o ou i ai i se konafesi faalesiteki e faatalanoa se alii e 21 tausaga le matua e iloilo ai lona agavaa e auauna atu i se misiona. O le taimi nei, ua tele lava ina le toe faatalanoaina e Pulega Aoao ia faifeautalai faamoemoeina. O lea la, o lenei tulaga sa ese lava. A o ou faitauina nisi o faamatalaga e faatatau i mafuaaga o la’u faatalanoaga, sa nutimomoia lo’u loto. Sa faia ni agasala matuia e lenei alii. Sa ou manatunatu pe aisea o le a talosagaina ai a’u e asiasi atu i se tagata na faapenei sona olaga, ma sa iu ai ina ou faapea, o le a sili atu ona ese mo a’u le fautuaina atu o ia mo se faamaoniga e avea ai ma se faifeautalai.

Ina ua uma le sauniga o le konafesi i le afiafi o le Aso Toonai, sa ou alu atu loa i le ofisa o le peresitene o le siteki mo le faatalanoaga. A o ou faatalitali iina, sa faapea ona sau se alii talavou aulelei ma ni foliga matagofie. Sa ou faapea, pe o le a faapefea ona ou faanoia a’u lava ona sa manino lava sa fia talanoa o ia ae sa i ai sa’u faatalanoaga atofaina ma se alii talavou e sili ona atuatuvale. Ona ia ta’u mai lea o lona igoa. O le alii talavou lava lea na ala ai ona ou i ai iina.

I le tuua ai na o i maua le ofisa, e tasi lava le fesili sa ou fai atu ai: “Aisea ua ou faatalanoaina ai oe?”

Sa ia toe faamatalaina lona olaga ua mavae. Ina ua uma lana faamatalaga, sa amata ona ia ta’u mai laasaga ma puapuaga faaletagata lava ia sa ia ui mai ai. Sa talanoa mai o ia e uiga i le Togiola—le mana e le iu o le Togiola. Sa ia tuuina mai lana molimau ma faailoa mai lona alofa mo le Faaola. Ona ia fai mai lea, “Ua ou talitonu o puapuaga patino o le Faaola i Ketesemane ma Lana taulaga i luga o le satauro sa matuai malosi lava ua faapea ona laveai ai se tagata e faapei o a’u.”

Sa ou ootia i lona lotomaulalo ma i le Agaga, sa ou fai atu ai, “O le a ou fautuaina atu oe e avea ma se sui o Iesu Keriso.” Ona ou fai atu lea, “Na o le tasi lava le mea ou te talosagaina mai ia te oe. Ou te manao ia avea oe ma faifeautalai e aupito sili ona lelei i le Ekalesia atoa. Na pau lava lena.”

I le tolu pe fa masina mulimuli ane, sa ma lauga ai ma Sister Edgley i se nofoaga autu e aoao ai faifeautalai. I le faaiuga o le faigalotu, sa ou feiloai atu i faifeautalai ae ou vaaia ai se alii talavou na pei ou te tau iloa ona foliga.

Sa ia fesili mai, “O e manatua a’u?”

Sa ou faapea atu ma sina matamuli, “E faamalie atu. Ou te iloa e tatau ona ou iloa [oe], ae e matuai o’u le manatua lava.”

Ona ia fai mai lea, “Se’i ou ta’u atu po o ai a’u. O a’u o le faifeautalai aupito sili ona lelei i le nofoaga autu e aoao ai faifeautalai.” Ma sa ou talitonu ia te ia.

O le faamoemoe o lenei alii talavou sa le gata ina faavae i luga o se malamalamaaga ma se molimau o le Togiola, ae na faapena foi i luga o le faapatinoina o lenei meaalofa. Sa ia malamalama [o le Togiola] sa mo ia lava e toatasi! Sa ia iloaina o le mana o le Togiola ma le faamoemoe e aumaia ai pe a foliga mai ua leiloa mea uma pe ua leai se faamoemoe.