Seminare i Vaomatua o Ekuatoa

O se vaega toalaiti o le autalavou, e pei o Oscar R., ua leva ona avea ma tagata o le ekalesia ae faatoa faatuina le paranesi, ae o le toatele lava e le’i leva ona liliu mai. Ma sa mu se afi i totonu o o latou loto. “Matou te malolosi,” o le tala lea a Oscar.

Ia Setema 2010, a o le’i leva lava ona faatuina le paranesi, sa amatalia ai e le paranesi le polokalama o le seminare. “O le taimi muamua na matou faapotopoto ai i ni nai tausaga ua mavae,” na fai mai ai Oscar, “sa toalaiti lava i matou. Sa na o a’u le talavou. Ae sa matou tuputupu ae lava. E le’i leva ae maua le matou toa 6, sosoo ai ma le toa 10, ma o le taimi nei ua toatele lava le autalavou.”

Talu ai e o nisi o le autalavou i le aoga i le taeao ae o isi i le afiafi, o lea latou te faatulagaina ai ni taimi atofaina se lua mo vasega seminare—e tasi i le taeao mai le 8:00 i le 9:00 ma le tasi i le afiafi mai le 4:30 i le 5:30.

Atonu e tau le toatele le autalavou i le polokalama, ae mo talavou na e auai atu, o le seminare ua suia ai o latou olaga.

“O le seminare o se faamanuiaga sili lea mo a’u,” na fai mai ai Lui V., o se tagata e le’i leva ona liliu mai. “E fesoasoani ou te sauniuni ai e avea ma se faifeautalai lelei. E tele luitau ma faaosoosoga ua feagai ma a’u talu ona ou auai i le Ekalesia, ae ua mafai ona ou faatumauina lo’u malosi aua ua ou iloa o loo o’u faia le mea sa’o.”

Ma e le na o Lui e i ai lagona faapena. “E le’i leva ona avea au ma se tagata o le Ekalesia,” na fai mai ai Ariana J., “ae sa ou auai i le seminare talu mai lava ona ou papatiso. Ou te fiafia e auai i ai aua o loo aoaoina ai le tele o mea moni e uiga i le talalelei a Iesu Keriso, lea e faatumulia ai lo’u loto i le faamoemoe ma lo’u mafaufau i le malamalama.”

O le auai i le seminare ua fesoasoani e faamauaa ai Ariana i le talalelei. “Mo au, o se faamanuiaga le avea o se vaega o nei vasega,” o le tala lea a Ariana. “Latou te faamalosia ai lo’u agaga ma fesoasoani e saunia ai a’u ina ia i ai se aso e mafai ona avea ai a’u ma se toalua, tina, ma se taitai lelei o le Ekalesia, ma atonu foi o se faifeautalai faamisiona.”

E faapena foi le lagona o le tuagane o Ariana o Gerardo. “Ou te faafetai ona ua avea le seminare ma se vaega taua o lo’u olaga,” na ia fai mai ai. “Ua saunia ai au e fai se misiona i se aso. O iina ua ou aoao ai e uiga i le ata o le faaolataga ua saunia e le Atua mo a’u. O vasega taitasi ou te auai ai e aumaia ia te au le faamoemoe e mafai ona ou mautofi i le malo selesitila ma tuuina mai ia te au le faamautinoaga ua ou mauaina le talalelei a Iesu Keriso.”

E fai lava si vaivai o Gerardo i le taimi o le vasega i nisi o taimi. E alu muamua o ia e ave lona uso laitiiti i le aoga ona toe foi vave ane ai lea e piki lona tuafafine ina ia mafai ona la o atu i le seminare. Ae e le afaina lea ia te ia.

“O nei mea uma e matuai fou lava ia te au, peitai ua faatumulia au i le fiafia,” o le tala lea a Gerardo. “Ua ou iloa ua ou i ai i le ala sa’o o le a faapea ona tuuina mai ai ia te au le avanoa e toe vaai ai i lo’u Tama Faalelagi. E tuuina mai e le Agaga Paia lenei faamautinoaga ia te au. E tau lava o lo’u faia o se taumafaiga ma tumau ai e tau i le iuga.”

Mo Walter A., o le seminare i le taimi muamua sa fai si taufaafefe. “Sa ou popole i le taimi muamua,” o lana tala lea. “Ae ina ua ou ulu atu i le vasega, sa ou lagonaina le faapitoa aua sa ou lagonaina le alofa lea e te lagonaina pe a e suesue i tusitusiga paia. Ma ina ua ou aluese, sa ou lagonaina le faamalosia o au i le fiafia i lo’u loto ona o mea sa ou aoaoina. O se tasi o faamanuiaga maoae ua saunia e le Tama Faalelagi mo le autalavou o le seminare.”

“Ua suia lo’u olaga e Le Ekalesia a Iesu Keriso o le Au Paia o Aso e Gata Ai,” o le tala lea a Apelu A., o lē o loo sauniuni foi e alu i se misiona. “O loo o’u aoao e uiga i aoaoga a perofeta. Ou te alofa ia Iosefa Samita. Sa toa o ia i le aumaia o le Toefuataiga o le Ekalesia moni e ui lava i faafitauli uma na oo atu ia te ia ona o lenei mea. Ou te fia toa e pei o ia.”

O le toatele o le autalavou sa faia ni osigataulaga e auai i le seminare. E le faigofie i taimi uma, ae mo le autalavou i Puerto Francisco de Orellana, Ekuatoa, o se taumafaiga tauaogaina.

“A ou mafaufau e uiga i le fetaomi atu i luma, e pei ona fai mai ai le mau,” o le faamatalaga lea a Apelu, “Ou te manatu ua faauigaina ia faatulaga mea e tatau ona faamuamua o le olaga. O le seminare o le tasi lea o ia mea. E pei foi ona suia ai lo’u olaga, e mafai foi ona faia faapena i isi talavou.”

E oo lava foi i nofoaga maotua i vaomatua i Ekuatoa, o le Ekalesia a Iesu Keriso ma lana polokalama o le seminare mo le autalavou ua ola lava ma suia ai olaga mo i latou o e e filifili e auai ai.