Dili Ba Mahimong Bunyagan Sab Ko?

“Kamo Nuno ug Miriam, sundon ba ninyo ang ehemplo ni Jesukristo ug magpabunyag sa sunod Sabado?” nangutana si Sister Silva.

Dili makatuo si Paulo sa iyang nadungog. Ang mga sister nga misyonaryo bag-o lang midapit sa 10 anyos niyang igsoong lalaki ug babaye sa pagpabunyag!

“Oo! Oo!” malipayong miingon ang kaluha.

Dili mohunong sa pagpahiyom si Miriam. Nakig-apir si Nuno kang Sister Lopes. Nagpahiyom si Lola nga diha sa dako nga pulang lingkuranan sa kilid.

Sulod sa pipila ka semana nagtudlo ang mga sister nga misyonaryo kang Paulo ug sa iyang igsoon sa balay sa ilang Lola sa berde, mahuyuhoy nga hangin sa isla sa Sao Miguel—1,000 ka milya (1,600 kilometros) gikan sa ulohang yuta sa Portugal. Ganahan si Paulo nga moabli sa katunga nga ibabawng bahin sa atubangang pultahan ni Lola ug tagamtamon ang huyuhoy samtang maglantaw nila ni Sister Lopes ug Sister Silva nga magpadulong sa pagtudlo kaniya mahitungod sa ebanghelyo.

Ang sister nga mga misyonaryo miingon nga usa karon ka espesyal nga leksyon. Karon nahibalo na si Paulo kon ngano. Si Nuno ug Miriam bunyagan, sama sa gitudlo ni Jesus! Gusto sab ni Paulo nga mosunod sa ehemplo sa Manluluwas.

“Mga Sister, mahimo ba sab kong mabunyagan sa sunod Sabado?” mahinamon siyang nangutana, naggunit sa iyang hinulagway nga Basahon ni Mormon paduol kaniya.

Mipahiyom si Sister Silva apan milingo-lingo. “Pasensya, Paulo. Ang Ginoo miingon kanato nga tanan kita kinahanglang mabunyagan lamang kon kita walo na katuig ang edad. Tungod kay unom pa ang imong edad, wala ka pay tulubagon sa imong mga pagpili.”

“Apan, mga sister,” misupak si Paulo, “nagsigi na ko og ampo ug nagbasa sa Basahon ni Mormon uban sa akong pamilya, sama sa inyong gitudlo kanako. Tua ko sa primary matag semana uban ni Lola ug ni Tiyo Mário. Nahibalo ko nga tinuod ang Simbahan! Dili ba mahimong bunyagan ko dungan nila ni Nuno ug Miriam?”

“Maayo kaayo ang imong nahimo sa pagsunod sa mga sugo ug pagkat-on mahitungod sa ebanghelyo,” miingon si Sister Lopes. “Apan gikinahanglan nimo ang pagpaabut og duha pa ka tuig sa dili ka pa mabunyagan.”

Misugod sa pag-ungot ang tutunlan ni Paulo, ug init nga luha ang milugmaw sa iyang mga mata. Mibarug siya ug midagan padulong sa iyang kwarto sa atik, nga iyang katulganan uban sa iyang mga igsoon.

Human makahilak sa iyang unlan sulod sa pipila ka minuto, nakadungog si Paulo og tawo nga nagsaka sa hagdanan padulong sa atik. Milingkod si Tiyo Mário tapad ni Pablo sa higdaanan.

“Unsay nahitabo Paulo?” Nangutana si Tiyo Mário.

“Sila si Sister Silva ug si Sister Lopes miingon nga dili ko mabunyagan, apan si Nuno ug si Miriam mahimo,” miingon si Paulo. “Gusto kong mamiyembro sa Simbahan! Ganahan kong mokanta sa mga himno sa sakrament miting ug mokanta mahitungod sa mga kasulatan sa Primary. Dili ko gustong mabiyaan.”

“Paulo, labut gihapon ka sa Simbahan bisan og dili pa igo ang imong edad aron mabunyagan,” miingon sa malumong paagi si Tiyo Mário.

“Unsaon man?” mihingos si Paulo diha sa iyang unlan.

“Di ba kahibalo ka nga ang Primary nangandam alang sa programa sa sakrament miting,” miingon si Tiyo Mário. “Miingon ang magtutudlo sa Primary kanako nga nangita siya og mga bolunter aron mohatag sa ilang pagpamatuod atol sa programa. Usa kana ka paagi nga ikaw makaapil sa simbahan,” mipasabut si Tiyo Mário.

“Tinuod?” milingkod si Paulo ug miatubang sa iyang tiyo. Naghunahuna siya. “Tingali makahatag sab ko sa akong pagpamatuod atol sa bunyag nila ni Nuno ug ni Miriam!”

“Nindot kana nga ideya!” miingon si Tiyo Mário. “Bisan og gamay pa kaayo ka aron mabunyagan, makaangkon gihapon ka og pagpamatuod.”

Miambak si Paulo sa iyang higdaanan ug daling mikanaog.

“Asa ka padulong, Paulo?” mitawag si Tiyo Mário.

“Magpraktis ko sa paghatag sa akong pagpamatuod ngadto sa mga misyonaryo!” Malipayong mitubag si Paulo. “Ipakigbahin ko kini samtang maghulat ko nga mabunyagan!”