Kinahanglan ba Kong Mopili sa Trabaho o Simbahan?

Ang akong asawa ug ako naminyo niadtong 1981 sa Templo sa Tokyo Japan. Ang among kinabuhi sa sinugdanan sa kaminyoon dili sayon. Mapasalamaton ko nga adunay trabaho, apan naglisud mi sa pagbayad sa tanan namong galastuhan. Kami nangamuyo sa Langitnong Amahan sa Iyang tabang ug gibuhat namo kutob sa among mahimo aron makabayad sa galastuhan ug sa ikapulo. Kami nasayud nga kon kami mosalig sa Ginoo, Siya mosangkap kanamo.

Usa ka semana ang akong asawa ug akong higala mipakita kanako sa samang gamayng clipping sa pamantalaan. Kini usa ka pahibalo alang sa full-time English teacher.

Gipadala nako ang akong résumé ngadto sa kompaniya ug gihangyo ko nga moadto para sa interbyu. Sa dayong pagtapos sa interbyu, ang tig-interbyu miingon, “Imong gisulat sa imong résumé nga ikaw nahilakip sa boluntaryong buhat isip misyonaryo sa Ang Simbahan ni Jesukristo sa mga Santos sa Ulahing mga Adlaw. Buot ipasabut nga magsimbahan ka ma-Dominggo, dili ba? Kon ikaw pahukmon nga mosimba o motrabaho sa Dominggo, asa ang imong pilion?”

Lisud kadto nga pangutana tungod kay nagkinahanglan ko og mas maayo nga trabaho. Apan human sa paghunahuna og maayo, mitubag ko, “Mosimba ko.”

Uban sa dili kaayo klaro nga pahiyum, ang tig-interbyu miingon, “Ah, mao ba.” Dayon iya kong gipapauli uban sa saad nga ang kompaniya magdesisyon niadtong gabhiona ug manawag ko aron mahibaloan ang resulta. Sa akong pagbiya sa kwarto, nagtuo ko nga mahagbong ko.

Nianang gabhiona sa dihang oras na para itawag, gidayal nako ang numero sa kompaniya nga gikulbaan pag-ayo.

“Unsa man ang resulta sa interbyu?” Nangutana ko sa sekretarya. “Nahagbong ko, dili ba?”

Nakuratan ko apan malipayon sa iyang tubag.

“Ganahan mi nga motrabaho ka uban kanamo,” siya miingon.

Mga usa ka bulan ang milabay nasayran nako nganong nadawat ko sa trabaho. Ang sekretarya mipasabut nga ang tig-interbyu nagpuyo tapad sa full-time nga mga misyonaryo sa Santos sa Ulahing mga Adlaw. Kanunay niyang gibantayan ang mga misyonaryo nga makugihong nag-drayb sa ilang mga bisikleta alang sa ilang buluhaton kada buntag.

“Siya nagtuo nga ikaw, miyembro sa sama nga simbahan, kugihan nga magtrabaho sama sa mga misyonaryo nga nagtrabaho alang sa ilang simbahan,” siya miingon. “Swerte ka!”

Sukad niadto ang among pamilya makapalit na unsa ang among gikinahanglan.

Kon maghunahuna ko niining kasinatian sa pagpili, madasig ug mahupay ko. Nasayud ko nga ang Dios mogamit sa ubang mga tawo sa pagpanalangin sa Iyang mga Anak. Dili nako mapahayag ang dako nakong pasalamat alang sa akong asawa ug higala alang sa ilang inspirasyon sa pagdala sa pahibalo sa mantalaan ngari kanako, alang niadtong makugihon nga mga misyonaryo ug sa ilang talagsaong mga ehemplo ug sa atong manggiloy-on, mahigugmaon, ug maamumahong Langitnong Amahan, kinsa adunay milagrosong mga gahum sa paghimo sa atong mga kasinatian alang sa atong kaayohan.