Unsaon nga Maluwas [Survive] sa Teritoryo sa Kaaway

Mamulong ko karon nga nakakita sa nangagi ug moandam kaninyo sa inyong kaugmaon.

Kamo nagtubo sa teritoryo sa kaaway. Kon kamo mahamtong sa espirituhanon nga paagi, kamo makasabut sa unsang paagi ang kaaway mihugaw sa inyong palibut. Siya anaa sa mga panimalay, kalingawan, media, pinulongan—tanang nagpalibut kaninyo. Sa kasagaran, ang iyang presensya dili mabantayan.

Ganahan kong mohisgut kaninyo og usa ka butang nga labing bililhon ug madanihon. Mabasa sa kasulatan, “Ang kaalam maoy labaw nga butang, busa batoni ang kaalam,” ug akong pun-an, “uban sa tanan [ninyo] nga pagatinguhaon [pagabuhaton!]” (Mga Proverbio 4:7). Wala koy panahon nga usikan ug kamo usab. Busa paminaw!

Sa diha nga mihukom ko nga mahimong magtutudlo, kini klaro sa akong hunahuna. Atol sa Ikaduhang Gubat sa Kalibutan, ako anaa pa lang sa mga 20 anyos ug usa ka piloto sa Air Force. Nadestino ko sa gamay nga isla sa Ie Shima. Kini nga isla, gamay, mingaw ingon og sama ka dako sa stamp, anaa nahimutang sa ibabaw nga bahin sa Okinawa.

Sa usa ka mingaw nga gabii sa ting-init, naglingkod ko sa may pang-pang nagtan-aw sa pagsalup sa adlaw. Namalandong ko kon unsa ang akong buhaton inig human sa gubat, kon maswertihan nga buhi pa. Unsa ang akong gusto nga mamahimo? Niadtong gabhiuna mihukom ko nga ganahan kong mahimong magtutudlo. Nang-rason ko nga ang mga magtutudlo kanunay nagkat-on. Ang pagkat-on usa ka nag-unang katuyoan sa kinabuhi.

Una kong nagtudlo og seminary niadtong 1949 sa Siyudad sa Brigham. Estudyante ko dinhi sa seminary niadtong high school pa ko.

Adunay tulo ka kurso sa sinugdanan nga gitudlo sa seminary: Daang Tugon, Bag-ong Tugon, ug Kasaysayan sa Simbahan. Pribelihiyo nako nga nadugangan og Basahon ni Mormon sa sayo sa buntag nga klase sa seminary. Miuli ko gikan sa gubat nga may pagpamatuod sa Basahon ni Mormon ug pagsabut kon sa unsang paagi ang gasa sa Espiritu Santo makadasig.

Sa inyong tibuok kinabuhi kamo natudloan kabahin sa gasa sa Espiritu Santo, apan limitado ra ang pagtudlo. Kamo makahimo ug, sa pagkatinuod, makapadayon sa pagdiskobre nga nag-inusara diha sa inyong kaugalingon kon sa unsang paagi ang Espiritu Santo mahimong impluwensya sa giya ug proteksyon.

Alang sa batan-ong mga lalaki ug batan-ong mga babaye, ang proseso susama ra. Ang pagdiskobre kon sa unsang paagi modasig ang Espiritu Santo sa inyong kinabuhi usa ka panaw sa tibuok kinabuhi. Kon inyo na kining madiskobrehan sa inyong kaugalingon, kamo makapuyo sa teritoryo sa kaaway ug dili mailad o madaut. Walay miyembro niining Simbahana—ug kana nagpasabut nga matag usa kaninyo—makahimo og seryosong sayop nga dili una pasidan-an sa mga pagdasig sa Espiritu Santo.

Usahay kon kamo nasayop, inigkahuman mosulti, “Kahibalo ko nga dili gyud unta to angay nakong buhaton. Dili maayo akong pamati,” o tingali, “Nasayud ko nga kinahanglan gyud to nakong buhaton. Wala lang koy kaisug sa pagbuhat niini!” Kadto nga mga impresyon mao ang Espiritu Santo nag-direkta kaninyo sa maayo o nagpasidaan kaninyo nga mopalayo sa kadaut.

Adunay pipila ka mga butang nga kinahanglan ninyong likayan kon ang linya sa komunikasyon magpabiling abli. Dili kamo mahimong mamakak o mangilad o mangawat o maghimo og imoral ug kadtong mga agianan magpabiling bukas. Ayaw og adto sa lugar diin ang palibut mopugong og espiritwal nga komunikasyon.

Kinahanglan kang magkat-on sa pagtinguha sa gahum ug direksyon nga anaa kaninyo, ug dayon sundon kana bisan unsa pa man ang mahitabo.

Una diha sa inyong lista sa “buluhaton,” ibutang ang pulong nga pag-ampo. Kasagaran, ang inyong mga pag-ampo hilum. Kamo makahunahuna og pag-ampo.

Kamo sa kanunay adunay direkta nga linya sa komunikasyon sa inyong Amahan sa Langit. Ayaw itugot nga ang kaaway mokombinser kaninyo nga walay naminaw sa pikas linya. Ang inyong pag-ampo kanunay nga gidungog. Kamo wala gayud mag-inusara!

Ampingi ang inyong lawas. Magmalimpyo kanunay. “Wala ba kamo masayud nga kamo templo sa Dios, ug nga ang Espiritu sa Dios nagapuyo diha sa sulod ninyo?” (1 Mga Taga-Corinto 3:16).

Basaha og maayo ang mga saad nga makita sa seksyon 89 sa Doktrina ug mga Pakigsaad. Ang Pulong sa Kaalam wala magsaad og hingpit nga maayong panglawas apan ang espiritu nga anaa niini malig-on.

Likayi ang mga patik ug susamang butang nga makapadaut sa inyong lawas. Ang inyong lawas gimugna diha sa panagway sa Dios.

Gusto ko nga prangkang mamulong karon kabahin sa laing butang.

Kita nasayud nga ang gender [pagkalalaki o pagkababaye] namugna na didto sa kalibutan sa wala pa dinhi sa yuta.¹ “Ang espiritu ug ang lawas mao ang kalag sa tawo” (D&P 88:15). Ang mga Kaigsoonan nabalaka pag-ayo kabahin niining gender, isip may kalabutan sa moralidad.

Pipila kaninyo mahimong mibati o giingnan nga kamo natawo nga may pagduha-duha sa inyong pagkatawo ug dili ra sad-an kon mosunod niadtong mga tintasyon. Pinaagi sa doktrina kita nasayud nga kon kana tinuod, gitangtang na kanato ang atong kabubut-on, ug kana dili mahitabo. Kamo sa kanunay may kapilian sa pagsunod sa mga pagdasig sa Espiritu Santo ug magpuyo nga lunsay sa moral nga paagi ug putli nga kinabuhi, usa nga puno sa hiyas.

Si Presidente Gordon B. Hinckley mipahibalo sa mosunod atol sa kinatibuk-ang komperensya: “Ang mga tawo nangutana sa atong posisyon kabahin niadtong gikonsiderar nila ang ilang kaugalingon … mga bayot ug tomboy. Ang akong tubag mao nga ato silang higugmaon isip anak nga mga lalaki ug mga babaye sa Dios. Tingali sila adunay piho nga mga kahilig nga mga gamhanan ug tingali malisud nga pugngan. Kadaghanan sa mga tawo adunay [mga tintasyon] sa usa ka matang o sa uban sa nagkalain-lain nga mga panahon. Kon sila dili mobuhat niini nga mga kahilig, niana sila makapadayon sa unahan sama sa uban nga mga miyembro sa Simbahan. Kon sila molapas sa balaod sa kaputli ug sa moral nga mga sumbanan sa Simbahan, sila ubos sa pagdisiplina sa Simbahan, sama usab sa uban.

“Kita buot nga motabang … sa paglig-on kanila, sa pag-abag kanila sa ilang mga problema ug sa pagtabang kanila sa ilang mga kalisud. Apan kita dili mahimo nga dili manumbaling kon sila motugyan ngadto sa imoral nga kalihokan, kon sila maningkamot sa pagtuboy ug pagpanalipod ug pagpuyo diha sa sitwasyon sa usa ka gitawag og managsama og sekso nga kaminyoon. Ang pagtugot niini makapagaan sa seryoso kaayo ug sagradong pundasyon sa gisugo sa Dios nga kaminyoon ug sa mga katuyoan niini, sa pag-amuma og mga pamilya.”²

Si Presidente Hinckley namulong alang sa Simbahan.

Ang unang gasa nga nadawat nila ni Adan ug Eva mao ang kabubut-on: “Ikaw mahimo nga makapili alang sa imong kaugalingon, kay kini gihatag nganha kanimo” (Moises 3:17).

Kamo aduna nianang sama nga kabubut-on. Gamita kini sa maalamong paagi sa paglikay sa bisan unsa nga hugaw nga pag-agni o tintasyon nga inyong mahunahunaan. Ayaw gyud pag-adto didto, ug kon anaa namo didto, gawas gayud. “Ilimud ang inyong mga kaugalingon sa tanan nga dili diosnon” (Moroni 10:32).

Ayaw hugaw-hugawi ang mga gahum sa paglalang og kinabuhi sa inyong kaugalingong lawas o ni bisan kinsa. Kana mao ang sumbanan sa Simbahan, ug kini dili mausab. Samtang kamo nagtubo, adunay tintasyon sa pagsulay sa imoral nga mga kalihokan. Ayaw kana buhata!

Ang mahinungdanon nga pulong mao ang disiplina—disiplina sa kaugalingon. Ang pulong nga disiplina naggikan sa pulong nga disipulo o sumusunod. Magmahimong sumusunod nga disipulo sa Manluluwas, ug kamo luwas ra.

Usa o duha kaninyo mahimong maghunahuna, “Sad-an nako niini o nianang seryoso nga sala. Ulahi na kaayo para kanako.” Dili pa gyud ulahi.

Kamo natudloan sa panimalay o sa seminary kabahin sa Pag-ula ni Jesukristo. Ang Pag-ula sama sa usa ka pa-pas [eraser]. Kini makapapas sa kahasol sa konsensya ug sa epekto sa bisan unsang butang nga nakapahasol sa inyong konsensya.

Ang kahasol sa konsensya usa ka sakit sa espiritwal. Ayaw pag-antus nianang dugay na nga sakit. Likayi kini. Hununga kini! Paghinulsol, ug, kon gikinahanglan, paghinulsol kadaghan hangtud—dili na ang kaaway—modumala kaninyo.

Ang kinabuhi maingon og sunod-sunod nga mga pagsulay ug kasaypanan. Dugangi og “paghinulsol kanunay” sa inyong lista sa mga buluhaton. Kini makahatag kaninyo og mahangturong kalinaw nga dili mapalit sa bisan unsang kalibutanong butang. Ang pagkasabut sa Pag-ula mahimong usa sa pinaka-importante nga kamatuoran nga inyong makat-unan sa inyong pagkabatan-on.

Kon kamo makig-uban sa ubang mga tawo kinsa mopaubos kaninyo kaysa mopatuboy, palayo kanila ug ilisi ang inyong mga kauban. Mahimong kamo mag-inusara ug magmingaw usahay. Ang importante nga pangutana mao nga, “Kon ikaw mag-inusara, anaa ba ka sa maayong mga kauban?”

Ang pag-undang sa naandang batasan nga nakabitik kaninyo mahimong lisud. Apan ang gahum anaa kaninyo. Ayaw pagpakawala sa paglaum. Si Propeta Joseph Smith mitudlo nga ang “tanang mga tawo kinsa adunay mga lawas adunay gahum niadtong wala.”³

Dili ingon nga ang kaaway personal nga makigkita kaninyo; dili niya ipakita ang iyang kaugalingon sa niining paagiha. Apan bisan kon siya personal nga moduol kaninyo aron sa pagsulay ug pagtintal kaninyo, kamo mas nakabintaha. Kamo makagamit sa inyong kabubut-on, ug iya ka na lang pasagdan.

Kamo dili ordinaryo. Kamo espesyal kaayo. Kamo talagsaon. Giunsa nako pagkasayud niana? Nasayud ko tungod kay kamo natawo sa panahon ug dapit diin ang ebanghelyo ni Jesukristo moabut sa inyong kinabuhi pinaagi sa mga pagtulun-an ug mga kalihokan sa inyong panimalay ug sa Ang Simbahan ni Jesukristo sa mga Santos sa Ulahing mga Adlaw. Kini, sama sa giingon Mismo sa Ginoo, “mao lamang ang tinuod ug buhi nga simbahan diha sa ibabaw sa tibuok yuta” (D&P 1:30).

Aduna pay daghang mga butang nga inyong madugang sa inyong listahan, apan kamo nasayud unsa ang angay ug dili angay nga buhaton sa inyong kinabuhi. Kamo nasayud sa eksakto ug sayop ug dili kinahanglan nga mandoan sa tanang mga butang.

Ayaw usik-usiki kining mga katuigan sa seminary. Pahimusli ang dagkong mga panalangin nga inyong makat-unan sa mga doktrina sa Simbahan ug sa mga pagtulun-an sa mga propeta. Kat-uni kanang bililhon kaayo. Kini mopanalangin kaninyo ug sa inyong kaliwatan sa mga henerasyon nga moabut.

Dili madugay kamo maminyo ug magkaanak, usa ka kaminyoon nga gi-sealed sa templo. Ang among pag-ampo mao nga inyong makaplagan ang inyong kaugalingon, sa husto nga panahon, luwas nga magpuyo sa usa ka family ward o branch.

Ayaw kahadlok sa umaabot. Padayon nga may paglaum ug hugot nga pagtuo. Hinumdumi ang langitnong gasa sa Espiritu Santo. Pagkat-on nga matudloan niini. Pagkat-on sa pagtinguha niini. Pagkat-on sa pagsunod niini. Pagkat-on sa pag-ampo kanunay sa pangalan ni Jesukristo (tan-awa sa 3 Nephi 18:19–20). Ang Espiritu sa Ginoo motabang kaninyo, ug kamo mapanalanginan.

Kami adunay dako ug lawum nga pagsalig kaninyo.

Mopamatuod ako kaninyo—usa ka pagpamatuod sa dihang batan-on pa ko. Ug dili kamo lahi sa uban kaysa kanako. Kamo adunay sama nga katungod niadto nga pagpamatuod ug pagsaksi sama sa uban. Moabut kini kaninyo kon inyo kining paningkamutan. Ihatag nako ang mga panalangin sa Ginoo diha kaninyo—mga panalangin nianang pagsaksi nga mahitabo sa inyong kinabuhi, sa paggiya kaninyo samtang kamo mag-ugmad og malipayong kaugmaon.