Mensahe sa Unang Kapangulohan
Usa ka Yawe para sa Malipayong Pamilya
Gisugdan sa bantugang Russian nga tigsulat nga si Leo Tolstoy ang iyang nobela nga Anna Karenina niining mga pulonga: “Ang malipayong mga pamilya, tanan magkapareha; ang matag masulub-ong pamilya nagmasulub-on sumala sa ilang tagsa-tagsa nga kahimtang.”1 Dili gyud ko hingpit nga motuo ni Tolstoy nga ang malipayong mga pamilya, tanan magkapareha, nakadiskobre ko og usa ka butang nga komon kadaghan anaa kanila: sila adunay paagi sa pagpasaylo ug pagkalimot sa mga kahuyang sa uban ug sa pagtan-aw sa maayo.
Kadtong magul-anong mga pamilya, sa laing bahin, kanunay makakita og sayop, may kaligutgot, ug dili makalimot sa nangaging mga sala.
“Oo, apan …” magsugod ang kadtong magul-anon. “Oo, apan wala mo masayud kon giunsa ko niya pagpasakit,” moingon ang usa. “Oo, apan wala mo masayud kon unsa siya kamaldito,” sulti sa usa.
Tingali sakto ang duha; tingali puros pud sayop.
Adunay daghang lebel sa pagkasilo. Adunay daghang lebel sa pagkasakit sa buot. Apan sa akong namatikdan, kanunay kitang mangatarungan sa atong kasuko ug ipatagamtam diha sa atong konsensya pinaagi sa paghunahuna sa mga istorya kabahin sa motibo sa uban nga husgahan ang ilang mga binuhatan nga dili mapasaylo ug hinakog, sa samang higayon, ipahunahuna nga ang atong mga motibo lunsay ug putli.
Ang Iro sa Prinsipe
Adunay karaang istorya sa Welsh gikan sa ika-13 nga siglo kabahin sa usa ka prinsipe nga sa iyang pag-abut sa balay nakit-an ang iyang iro nga may dugo sa nawong niini. Ang tawo nagdali sa pagsulod sa balay, sa iyang kahadlok, nawala ang iyang gamayng bata ug ang kuna niini nabalintuwad. Sa kalagot gibunlot sa prinsipe ang iyang espada ug gipatay ang iyang iro. Pagkataud-taud, nadungog niya ang hilak sa iyang anak—ang gamayng bata buhi! Sa kilid sa gamayng bata naghigda ang patay nga lobo. Sa tinuoray, gipanalipdan sa iro ang gamayng bata sa prinsipe gikan sa mopatay og tawo nga lobo.
Bisan tuod kini nga istorya dramatik, kini nagpakita gayud og usa ka punto. Kini naghatag sa posibilidad nga ang istorya nga atong gihunahuna nganong ang uban molihok sa piho nga paagi dili sa kanunay tinuod—usahay wala gani ta masayud sa tinuod. Kita mobati nga gipangatarungan ang atong kasuko pinaagi sa pagpadayon sa atong kapait ug kasuko. Usahay kining mga kaligutgot molungtad og mga bulan o mga tuig. Usahay kini molungtad sa tibuok kinabuhi.
Usa ka Pamilya nga Wala Magkahiusa
Usa ka amahan dili makapasaylo sa iyang anak nga lalaki tungod sa pagtipas sa pamaagi nga gitudlo kaniya. Ang batang lalaki adunay mga higala nga wala magustohi sa amahan, ug siya nagbuhat og daghang mga butang nga sukwahi sa unsay ipabuhat kaniya sa iyang amahan. Kini ang hinungdan sa dili pagsinabtanay sa amahan ug anak, ug sa dihang nakahigayon ang batang lalaki, siya milayas ug wala na mouli. Panagsa na kaayo silang mag-istoryahanay.
Mibati ba ang amahan nga nahatagan og katarungan? Tingali.
Mibati ba ang anak nga nahatagan og katarungan? Tingali.
Ang ako lang nahibaloan nga kining pamilya wala magkahiusa ug magul-anon tungod kay ang amahan ni ang anak dili makapasaylo sa usag usa. Dili nila makalimtan ang pait nga mga panumduman sa usag usa. Mibati sila og kasuko imbis nga paghigugma ug pagpasaylo. Nawala kanila ang oportunidad nga moimpluwensya sa usag usa alang sa ikaayo sa kinabuhi. Ang ilang panagbulag sakit kaayo ug hilabihan nga sila nahimong piniriso sa espirituhanong paagi sa ilang kaugalingong emosyon.
Maayo gani, ang atong mahigugmaon ug maalamong Amahan sa Kahangturan nag-andam og paagi sa pagsumpay niining kal-ang sa tumang garbo. Ang mahinungdanon ug mahangturong Pag-ula mao ang dakong pagpakita sa pagpasaylo ug pakig-uli sa maayong buot. Ang katalagsaon niini dili nako matugkad, apan ako mopamatuod sa tibuok nakong kasingkasing ug kalag sa katinuod ug sa dakong gahum niini. Gihalad sa Manluluwas ang Iyang Kaugalingon aron tubson ang atong mga sala. Pinaagi Kaniya kita mapasaylo.
Walay Hingpit nga Pamilya
Kitang tanan makasasala. Kitang tanan masayop, lakip nimo ug nako. Kitang tanan nasakitan. Kitang tanan nakapasakit sa uban.
Pinaagi sa sakripisyo sa atong Manluluwas nga kita makaangkon og kahimayaan ug kinabuhing dayon. Sa atong pagdawat sa Iyang mga pamaagi ug pagbuntog sa atong garbo pinaagi sa pagpahumok sa atong mga kasingkasing, kita makahatag og balik sa maayong buot ug pagpasaylo sa atong pamilya ug sa atong personal nga kinabuhi. Ang Dios motabang kanato nga mas mapasayloon, mas andam nga molakaw sa ikaduha nga milya, nga unang mangayo og pasaylo bisan dili siya mao ang sad-an, ug sa pagkalimot sa nangaging kaligutgot. Salamat ngadto sa Dios, kinsa mihatag sa Iyang Pinalanggang Anak, ug ngadto sa Anak, kinsa mihatag sa Iyang kinabuhi alang kanato.
Atong mabati ang gugma sa Dios alang kanato matag adlaw. Dili ba kita mas mopakigbahin sa atong kaugalingon ngadto sa atong isigkatawo sama sa gitudlo sa nindot nga himno “Because I Have Been Given Much [Kay Gihatagan Ko og Daghan]”?2 Ang Ginoo andam nga mopasaylo kanato. Dili ba lang angay nga isalikway nato ang atong kahakog ug garbo ug mosugod sa pagpasaylo niadtong kita may kaligutgot—ilabi na diha sa atong kaugalingong pamilya?
Sa katapusan, ang kalipay wala magagikan sa pagkahingpit apan sa paggamit sa balaanong mga baruganan, bisan sa ginagmay nga paagi. Ang Unang Kapangulohan ug ang Korum sa Napulog Duha ka mga Apostoles mideklarar: “Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an sa Ginoong Jesukristo. Malampuson nga mga kaminyoon ug mga pamilya natukod ug napadayon diha sa mga baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat ug maayong makalingaw nga mga kalihokan.”3
Ang pagpasaylo nahimutang sa tunga-tunga gayud niining yanong mga kamatuoran, natukod diha sa plano sa kalipay sa atong Langitnong Amahan. Tungod kay ang pagpasaylo makasumpay sa mga baruganan, kini makasumpay sa mga tawo. Kini usa ka yawe, kini makaabli sa kinandaduhan nga mga pultahan, kini ang sinugdanan sa matinuorong dalan, ug kini mao ang usa sa atong paglaum alang sa malipayong pamilya.
Unta ang Dios motabang kanato nga mahimong mas mapasayloon sa atong pamilya, mas mapasayloon sa usag usa, ug tingali mas mapasayloon sa atong kaugalingon mismo. Nag-ampo ko nga kita makasinati sa pagpasaylo nga usa ka talagsaong paagi diin kadaghanan sa malipayong pamilya magkapareha.
Pagtudlo Niini nga Mensahe
“Samtang ikaw nag-andam sa kada leksyon, pangutan-a ang imong kaugalingon kon sa unsang paagi ang baruganan maingon og susama sa kasinatian sa mga miyembro sa pamilya sa ilang kaugalingong mga kinabuhi” (Pagtudlo, Walay Labaw Ka Mahinungdanon nga Tawag [1999], 171). Ikonsiderar sa pagdapit sa mga sakop sa pamilya sa pagpakigbahin sa ilang positibong mga kasinatian nga ilang nasinati o naobserbaran. Hisguti kini nga mga kasinatian, hatagi og gibug-aton ang mga panalangin sa pagpasaylo. Tapusa pinaagi sa pagpamatuod sa kaimportante sa pagpasaylo sa usag usa.
Paghulagway sa litrato pinaagi ni David Stoker