Asa Ko Nahisakop

Sa dihang dili pa ko miyembro sa Simbahan, ang akong kinabuhi masulub-on kaayo. Human magdiborsyo ang akong mga ginikanan sa dihang siyete anyos pa ko, napriso ang akong amahan. Ang akong inahan palahubog ug nawala ang tanang butang nga importante alang kaniya. Gipasagop ako sa usa ka pamilya.

Tungod niining mga butanga, nagtubo ko nga mas paspas kaysa akong mga kaedad. Ingon og dili gyud nako mabati nga ako nahisakop, ug sa kadugayan kanunay na akong nagrebelde. Sa dihang batan-on pa ko, nagsugod ko sa pagpanigarilyo ug sa pagbuhat sa ubang mga butang nga karon lang nako nasabtan nga supak sa Pulong sa Kaalam. Sigurado ko nga mapakyas gyud ko sa kinabuhi.

Usa ka butang ang makapalipay kanako mao ang pagtabang sa mga tawo—kon maglimpyo man sa kilid sa dalan o maminaw sa mga istorya sa ilang kinabuhi. Gusto gyud nakong ipahibalo sa mga tawo nga sila makasalig kanako. Usa ka tuig, nagbakasyon ko ug nakaila-ila og usa ka tigulang nga babaye, mihukom ko sa pagserbisyo pinaagi sa pagpaminaw kaniya. Siya usa ka Kristiyano ug misugod sa paghisgut kanako kabahin sa relihiyon.

Wala gyud ko motuo sa Dios. Usahay, maghunahuna ko nga tingali anaa Siya, gibasol nako Siya sa mga samok nga mga panghitabo nga akong nasinati. Apan sa dihang kining babaye mihulagway kabahin sa hugot nga pagtuo sa Dios, nainteresado ko. Sa wala pa ko mobiya, siya misulti og usa ka butang nga nakapainteres kanako: “Ang mga Mormon nagsunod sa mga sugo sa Dios.”

Wala pa gayud ko kadungog kabahin sa mga Mormon, busa miuli ko, nag-internet, ug nagsiksik. Nakakita ko sa Mormon.org ug mi-order og libreng kopya sa Basahon ni Mormon. Ang mga misyonaryo mideliver niini sulod lang sa pipila ka adlaw.

Dili pa ko sigurado kon magsugod na ba ko sa pagtuo sa Dios, apan ang mga misyonaryo mitabang kanako sa pagdiskobre nga dili lang ko mahimong motuo Kaniya apan mahimo usab kong masayud Kaniya. Sa dihang nagsugod ko sa pag-ampo ug pagtuon sa Basahon ni Mormon, nakaplagan nako ang akong kaugalingon diha sa maanindot nga panaw padulong sa kalipay. Mihunong ko sa pagpanigarilyo. Mihunong ko sa pagbasol sa Dios ug misugod sa pagpasalamat Kaniya sa maayong mga butang sa akong kinabuhi. Nasayran nako nga ang Iyang Anak miantus alang sa akong mga sala ug sa tanang kasakit nga akong nabati. Niadtong Oktubre 28, 2007, nabunyagan ko sa Iyang Simbahan.

Kon wala nako personal nga nasinati ang kausaban gikan sa pagkasagmuyo ngadto sa kalipay, dili ko makatuo nga kini posible. Karon ganahan kaayo ko sa calling sa Primary ug mapasalamaton sa oportunidad sa pagtabang sa pag-organisar og proyekto sa pagserbisyo sa usa ka young single adult conference sa Poland. Ang kanunay nga pagtabang sa uban pinaagi sa pagserbisyo sa Simbahan nakadugang sa kalipay nga akong nakaplagan sa ebanghelyo ni Jesukristo. Ang tanan nakong gibuhat karon, akong gibuhat nga may gugmang putli tungod ni Jesukristo. Nagtuo ko nga ang kinabuhi nindot kaayo ug bisan kon kita adunay mga hagit, kon kita magsunod sa Manluluwas, kita dili mawala.

Ang babaye nga akong naila-ila eksakto: ang pagbaton og hugot nga pagtuo sa Dios mahinungdanon kaayo. Kita dili makakaplag sa atong lugar dinhi sa kalibutan kon wala ta kaila Niya. Mapasalamaton ko nga sa katapusan ako adunay lugar kon asa ko nahisakop.