Mga Tubag diha sa Sunday School

Ako may kalagmitan nga mangita gayud og tukma kaayo nga tubag sa akong mga pangutana—sa pagpangayo sa Ginoo sa pagtabang kanako sa pagpangita niining usa ka butang nga makaayo sa tanan. Nakat-unan nako nga ang ingon nga paagi makapakomplekado sa mga butang.

Samtang nagtudlo ko sa klase sa Doktrina sa Ebanghelyo sa akong ward, determinado ko sa pagpangutana og lalum nga mga pangutana nga nagkinahanglan og pamalandong ug maayo kaayo, bag-o, makahuluganong mga tubag. Buot ipasabut, nga gusto nakong likayan ang pagsulti sa samang karaang “mga tubag diha sa Sunday School” nga itubag sa mga miyembro sa ward matag semana.

Samtang namalandong ko sa pagpangandam sa pagtudlo sa Bag-ong Tugon, nakamatikod ko sa paggamit sa pulong nga magapabilin, nga kadaghang nagbalik-balik. Sama pananglit, mabasa sa Juan 15:10, “Kon tumanon ninyo ang akong mga sugo, magapabilin kamo sa akong gugma; maingon nga gituman ko ang mga sugo sa akong Amahan, ug nagapabilin ako diha sa iyang gugma” (emphasis gidugang).

Sa Iyang Talagsaong Pag-ampo sa Pangamuyo, ang Manluluwas nag-ampo nga ang Iyang mga disipulo “ma-usa; maingon nga ikaw, Amahan, ania kanako, ug ako anaa kanimo, aron sila usab maania kanato” ug “ako anaa kanila, ug ikaw ania kanako, aron sila mamahingpit nga usa” (Juan 17:21, 23).

Daghan sa akong nasiksik mao nga unsaon nako nga mahiusa uban sa Ginoo, unsaon nako nga magapabilin sa Iyang gugma, ug unsaon, isip resulta, sa paglambo og dugang nga pailub—pailub nga gikinahanglan kaayo nako nga mausab ang akong mga kasinatian gikan sa makapakapoy ngadto sa makapadasig ug makapabalaan kanako.

Ang kataw-anan, samtang nagsiksik ko aron masabtan ang pulong nga magapabilin ug mga tubag alang sa lisud nga mga hagit nga akong giatubang matag adlaw, sa katapusan nagiyahan ko sa tukmang mga tubag diha sa Sunday School nga akong gilikayan. Nakaplagan nako ang mga tubag sa akong mga hagit pinaagi sa pagbasa sa mga kasulatan, pag-ampo matag adlaw, pagserbisyo sa akong pamilya ug sa uban, ug sa pag-adto sa templo ug pagtambong sa akong mga miting sa Dominggo. Nakat-unan nako nga kadtong yanong mga butang nakahimo og kalainan tali sa paglahutay ug paglahutay og maayo ug uban sa pailub.

Ang mga tubag diha sa Sunday School sa tinuoray mao ang pinakamaayo nga mga tubag.