Madaginuton nga Pagpuyo Makaandam Kanato sa Umaabut

Ang mga Santos sa Ulahing mga Adlaw nagtuo sa pagkaandam ug pagpaningkamot sa kaugalingon. Kita nagtuo sa pagpangandam sa edukasyon alang sa pagpanarbaho, sa pagpangandam sa pinansyal nga paagi panahon sa kalisud, ug sa pagpangandam sa temporal nga paagi alang sa natural nga mga kalamidad o uban pang mga hagit. Ang pinaka-importante, kita nagtuo nga maandam sa espirituhanong paagi alang sa Ikaduhang Pag-anhi ni Jesukristo ug sa pagpuyo og balik uban sa atong Amahan sa Langit. Kining paagi sa pagpangandam gitawag og madaginuton nga pagpuyo.

Ang madaginuton nga pagpuyo nagpakita sa atong tinuod nga mahangturong kinaiya: kita “mobuhat alang sa [atong kaugalingon] ug nga dili pagaaghaton” (2 Nephi 2:26). Ang Ginoo gusto nga kita mahimong responsable ug dili magsalig (tan-awa sa D&P 78:14). Gusto Niya nga kita magpuyo nga madaginuton tungod kay gusto Niya nga kita mahimong: responsable, manggihatagon, maalamon, mabination. Kon kita mas mapaningkamuton sa kaugalingon, kita mas makatabang sa atong mga pamilya ug sa uban. Unsaon nato sa pagpakaon sa gigutom kon kita mismo gigutom? Unsaon nato sa pagpakigbahin og kahibalo kon kita mismo nagkulang sa kahibalo? Unsaon nato sa pagpalambo sa pagtuo sa uban kon kita mismo nagkulang og pagtuo?

Ang mga baruganan sa madaginuton nga pagpuyo naglakip sa mosunod:

• Pagpangandam. “Pangandam kamo alang niana nga moabut, kay ang Ginoo hapit na moabut” (D&P 1:12).

• Pagkugi. “Dili kamo magtinapulan” (D&P 42:42).

• “Pagtulun-an, gani pinaagi sa pagtuon ug usab pinaagi sa hugot nga pagtuo (D&P 88:118).

Kon ang mga miyembro sa Simbahan naghimo kutob sa ilang mahimo aron sa pagsangkap alang sa ilang kaugalingon apan dili gihapon makasangkap sa ilang nag-unang mga panginahanglan, sila kinahanglang moduol una ngadto sa ilang mga pamilya alang sa tabang. Kon kini kulang, ang Simbahan makatabang. Ang mga bishop ug mga presidente sa branch makagamit sa mga kapanguhaan gikan sa “balay tipiganan sa Ginoo” sa pagtabang sa mga miyembro (tan-awa sa D&P 82:18–19). Bisan unsang tabang gikan sa Simbahan nagtumong sa pagtabang sa mga miyembro sa pagtabang sa ilang kaugalingon ug sa pag-awhag nga motrabaho para sa ilang kinabuhi.

Kita makatrabaho aron mahimong mapaningkamuton sa kaugalingon sa mosunod nga mga dapit:

• Kalig-on sa Espiritwal: Salig sa Ginoo; pagsunod sa mga kasugoan; pag-ampo ug pagtuon sa kasulatan matag adlaw; pagserbisyo sa uban.

• Kapiskay sa Panglawas: Sundon ang Pulong sa Kaalam; mag-ehersisyo; igong panahon sa pagkatulog; pagpraktis nga manlimpyo sa palibut ug sa lawas.

• Edukasyon: Pagkat-on sa pagbasa ug pagsulat; pagbaton og mga kahanas para sa trabaho; pagtuon sa “labing maayo nga mga basahon” (D&P 88:118).

• Panarbaho: Trabaho aron makasangkap sa mga panginahanglan sa inyong kaugalingon ug sa inyong pamilya.

• Home storage: Pagtipig og limpyo nga mainom nga tubig ug hinay-hinay pagpundok og suplay sa pagkaon nga inyong regular nga kaunon ug mas dugay nga madaut nga suplay sa pagkaon, sama sa mga lugas ug lagutmon.

• Panalapi: Pagbayad sa ikapulo ug mga halad; likayi ang wala gikinahanglan nga mga utang; hinay-hinay pagtigom og kwarta.