Sultihi Kami Kabahin sa Inyong Simbahan

Sa usa ka biyahe aron sa pagbisita sa akong igsoong lalaki, naglingkod ko sa luyo nga bahin sa eroplano diin naglingkod ang mga flight attendant. Ang duha ka linya sa mga lingkuranan nag-atubang sa usag usa.

Gipaila-ila nako ang akong kaugalingon sa mga tawo nga nag-alirong kanako ug dayon mihisgut kanila nga ako moadto sa Brigham Young University. Usa ka lalaki sa akong atbang miingon nga ang iyang anak nga babaye adunay buotang higala nga bag-ohay lang nag-misyon. Ang iyang anak nga babaye nasayud og gamay kabahin sa Simbahan, apan siya walay nahibaloan. Ang flight attendant diha-diha dayon misulti nga dili siya ganahang magpamiyembro “niana nga simbahan” tungod kay gipakaubos niini ang mga babaye. Ang lalaki miingon nga nakadungog siya og susama niana—ang mga babaye nga Santos sa Ulahing mga Adlaw gikonsiderar nga mas ubos kaysa mga lalaki, nga sila dili makadawat og priesthood o makadumala og mga miting, ug mga lalaki ang nagdominar sa Simbahan.

Dayon, mitan-aw kanako, siya nangutana, “Unsa man ang imong gibati kabahin niana?” Silang pito nagtan-aw kanako ug nagpaabut.

Gikulbaan ko. Sa dihang bata pa ko nakasag-ulo ko sa mga Artikulo sa Hugot nga Pagtuo kausa, ug sa dihang tin-edyer ug young-adult nakapraktis ko sa pagpamatuod sa panan-awon ni Joseph Smith ug sa Basahon ni Mormon. Apan wala gyud koy ideya kon unsaon pagtubag ang pangutana sa lalaki. Nag-ampo ko sa hilum sa Langitnong Amahan sa paggiya kanako.

Dayon gisulti nako ang unang mga pulong nga akong nahunahunaan. “Wala lang gyud mo kahibalo sa Relief Society.” Ang ilang mga dagway nagpakita nga wala sila masayud.

“Ang priesthood naglihok uban sa mga babaye, silang tanan mga miyembro sa Relief Society,” gipasabut nako. “Kami adunay babaye nga presidente sa Relief Society kinsa nagdumala sa mga kalihokan sa mga babaye sa Simbahan sa tibuok kalibutan. Ang responsibilidad sa mga babaye mao ang pagdala og pagkamabination ug gugma nga putli ngadto sa kinabuhi sa mga miyembro ug ilabi na sa kinabuhi sa ilang mga pamilya.”

Sila naminaw pag-ayo kanako.

“Kita nagpuyo sa usa ka talagsaon nga panahon diin ang ubang mga babaye gusto nga sila molihok ug mohunahuna ug mahisama sa mga lalaki. Apan kami nagtuo nga gibahin sa Dios ang mga buluhaton. Gipaabut namo nga ang mga babaye mahimong mga lider sa mga babaye ug kauban nga mga lider sa ilang panimalay. Ang mga lalaki nagsalig pag-ayo kanamo og tambag niining mga dapita. Kini usa ka matarung nga balanse. Kini nakahimo sa mga organisasyon sa among Simbahan ug sa among panimalay nga malampuson. Ug kami sa tinuoray nagtuo nga diha sa Ginoo ang babaye dili gawas sa lalaki, ni ang lalaki dili gawas sa babaye (tan-awa sa 1 Mga Taga-Corinto 11:11). Kami nagtuo nga kami dili mahingpit kon wala ang usag usa. Kami dili motuo nga kita gilalang aron makigkompetensya sa usag usa apan sa pagtinabangay sa usag usa.”

Mibati ko nga gipanalanginan sa dihang nahuman ko. Nasayud ko nga ang mga pulong akong gisulti gikan sa Espiritu. Silang tanan ingon og natagbaw sa akong pagpasabut. Dayon ang lalaki miingon, “Sultihi pa mi og dugang kabahin sa inyong simbahan.”

Dayon, sulod sa duha ka oras, malipayon kaayo kong naghisgut kabahin sa Pagpahiuli, pagtubag sa mga pangutana, ug pagpamatuod sa ebanghelyo nga akong gimahal.