Dear Amiga

Hello gikan sa taga-Mexico! Nalipay kong nakadawat sa imong sulat ug nahibalo sa umaabut nimong birthday. Ingon og nahadlok ka og gamay mahitungod sa pagbiya sa Primary. Mahimo bang makasugilon ko nimo mahitungod sa pagkasakop nako sa Young Women?

Nahadlok sab kong mobiya sa Primary. Nabalaka ko og basin dili ko makakita og mga higala. Nahadlok kong mahimo nga pinakabata imbis mao ang usa sa pinakamagulang.

Apan ang tanan namaayo ra. Giinterbyu ko sa bishop sa wala pa ang akong birthday ug gisultihan ko nga ang kausaban usa ka maayo nga butang. Sa pagka-Dominggo, naulaw gihapon ko ug nagpabilin sa kwarto sa Primary. Maayo gani kay nakit-an ko sa usa ka lider sa Young Women. Miingon siya, “nahibalo kong makit-an ta ka dinhi! Dali, oras na sa klase.”

Gi-welcome ko ni Sister Diaz sa opening exercise, ug gihatagan ko niya og tulo ka basahon nga akong nagustohan: Alang sa Kalig-on sa mga Kabatan-onan, Personal nga Kauswagan sa Young Women, ug usa ka journal. Samtang akong gianinaw ang palibut sa kwarto, akong nakita nga nakaila ko sa ubang mga babaye nga gikan sa Primary. Ang ubang mga babaye wala nako mailhi apan mitimbaya kanako. Wala madugay akong gibati ang kalinaw imbis kahadlok.

Nagkamaayo ang mga butang pagkahuman niadto. Ang mga kalihokan sa mutual nahimong espesyal ngari kanako tungod kay nakatudlo kini kanako unsaon sa pagsunod sa ebanghelyo ug unsaon sa pagtabang sa akong pamilya ug mga higala. Ug ang pag-adto sa camp sa matag tuig makalingaw kaayo! Karon nga Laurel na ko, nanghinaot ko nga makahuman sa Personal nga Kauswagan. Mahinamon kaayo kong makasul-ob sa Young Women medallion aron mapahinumduman ko niini kon unsa ang akong paglambo nga mas maduol sa Langitnong Amahan sulod sa mga katuigan.

Busa ayaw kahadlok akong amiga. Bukhara ang imong mga pako ug lupad ngadto sa Young Women. Mosaad ko nga dili ka magmahay.

Naghigugma,

Maribel