Stap Faenem Glad long Laef

Long wan taem mi bin stap ridim wan toktok blong jeneral konfrens we i kam long Elda Rijad G. Skot blong Kworom blong Olgeta Twelef Aposol. Nomata mi bin harem mo ridim toktok ia bifo, wan laen blong toktok i bin kasem ae blong mi mo i stap long maen blong mi.

Sam aoa afta, boe blong mi, we i bin stap long wan apatmen wetem ol fren blong hem, i bin kam mekem wan visit. Hem i bin go long wan fultaem misin mo i bin go long kolej blong sam semesta. Hem i no bin sua wanem rod long saed blong edukesen nao bae hem i tekem, mo wanem wok nao bae hem i skul from. From se hem i bin taed mo filim se skul, blong naoia, i blong westem taem mo mane nomo, nao hem i stopem ol stadi blong hem i stap mo stat blong wok fultaem.

Hem i bin talem long mi se wan long ol fren blong hem i givim tingting ia blong oli go long wan aelan long Bahamas o long Kareibien, kasem ol wok, mo pleiplei blong sam manis. Boe blong mi i bin glad tumas from tingting ia. Mi bin luksave olsem wanem olsem wan laef eksperiens we man i fri tumas blong mekem samting, i save pulum tingting blong wan yang man.

Long stret taem ia, toktok blong Elda Skot i kam long maen blong mi. Mi bin pikimap Ensign mo ridim pat ia long boe blong mi: “Yu yu stap ia long wol from wan tabu stamba tingting. I no blong kasem entetenmen o blong oltaem lukaotem hapines blong wol ia. Yu stap ia blong oli testem yu, blong pruvum yuwan se yu save kasem moa blesing we God i gat blong yu. Hemia i rili nidim fasin blong save wet longtaem.” (“Finding Joy in Life,” Ensign, Mei 1996, 25).

Boe blong mi i no talem wan toktok, i tekem wan magasin ia, i go, mo ridim fulwan toktok ia. Afta, hem i talem se bae hem i nomo go long aelan trip blong hem.

Long wan stret taem, hem i bin go long skul blong polis; wan rod we i lidim hem blong go mitim fiuja waef blong hem. Tufala i bin mared long Mesa Arisona Tempol, mo tedei tufala i gat tri naesfala pikinini. Long 2010, boe blong mi i finisim bajela digri blong hem, mo i tru se hem i “faenem glad long laef blong hem.”

Trip blong boe blong mi ia, ating bae i bin wan gud eksperiens; be long narasaed, i save kam wan samting we i denja long saed blong spirit. Evri taem mi luklukbak long eksperiens ia, Spirit i tajem hat blong mi.

Mi talem tangkyu from ol toktok blong ol profet, mo tangkyu from i bin kam long mi blong tingbaot wan toktok we i bin helpem mi blong givhan. Mi talem tangkyu se boe blong mi i bin lisin long wan mesenja blong Lod, mo i letem Spirit i wok long hem. Mi save se plante blesing mo fulap sore oli kam taem yumi lisin mo folem ol tijing blong Sevya mo ol wokman blong Hem.