Blong Ol Yut Oli Kam Strong
Wanem I WanTru Fren?
Mining blong wan fren i jenis long wol tedei, long wan taem we yumi evriwan i konek tru teknoloji. Tedei, yumi save tingting se yumi gat plante “fren.” Hem i tru: yumi glad blong save kasem infomesen mo stap save oltaem wanem i stap hapen long ol laef blong plante we yumi save gud long olgeta, semmak wetem olgeta fren blong naoia mo bifo, mo tu, pipol we yumi no mitim stret we yumi singaotem olgeta ol fren blong yumi.
Long wol blong sosol media, toktok ia “fren” oltaem oli yusum blong tokbaot ol kontak bitim ol rilesensip.Yu save sendem wan mesej long “ol fren” blong yu, be hemia i no sem samting olsem we blong gat wan rilesensip wetem wan man fes tu fes.
Samtaem ol wari blong yumi i stap long tingting ia blong gat ol fren. Ating yumi mas lukluk long tingting ia blong stap wan fren.
I gat plante mining blong wanem i minim blong stap wan fren. Bae mi no save fogetem se mi harem Elda Robt D. Hels blong Kworom blong Olgeta Twelef Aposol i tokbaot wanem i minim blong stap wan fren mo paoa blong ol fren long ol laef blong yumi. Eksplenesen blong hem long mining ia i bin wan longtaem samting long laef blong mi. Hem i bin talem, “Ol fren oli ol pipol we oli mekem i isi blong laef folem gospel blong Jisas Kraes.”1 Folem tingting ia, blong stap wari long laef blong wan narafala man bifo yumi, hem i stamba tingting ia nao blong frensip. Hem i blong putum wan narafala man fastaem. Hem i blong stap ones tru, stap tru, mo stap klin long evri aksen. Ating toktok ia nao, komitmen, i talemaot stret ril mining blong frensip.
Taem gel blong mi Emi, i bin gat 15 yia, hem i bin mekem wan desisen abaot wanem kaen fren bae hem i lukaotem.Wan moning, mi bin luk kopi blong Buk blong Momon blong hem i open long Alma 48. Hem i bin makem ol ves we i stap tokbaot Kapten Moronae: “Mo Moronae i bin wan strong mo wan man we i gat paoa; hem i bin wan man we i gat save we i stret gud. … Yes mo hem i bin wan man we i bin stanap strong long fet long Kraes” (ol ves 11, 13). Long saed blong ol toktok ia, hem i bin raetem, “mi wantem deitem mo maretem wan man olsem Moronae.” Taem mi stap luk Emi wetem ol defren yang man we hem i gud fren wetem, mo afta, hem i deitem olgeta taem hem i kasem 16 yia, mi save luk se hemwan, hem i eksampol blong ol kwaliti ia, mo hem i helpem ol narafala man oli laef folem aedentiti blong olgeta olsem ol boe blong God, ol man we oli gat prishud, mo ol fiuja papa mo lida.
Ol tru fren oli lidim tingting blong olgeta we oli gud fren wetem, blong mekem se oli “go smol moa antap [mo] kam gud smol moa.”2 Yufala i save helpem yufala wanwan, speseli ol yang man, blong rere from, mo givim seves long misin wetem ona. Yufala i save helpem yufala wanwan blong stap klin long tingting. Ol stret mo gud eksampol blong yufala mo frensip i save givim wan filing we i no save finis, i no long ol laef blong olgeta we yu gud fren wetem olgeta nomo, be tu, blong ol jeneresen we oli stap kam.
Sevya i bin singaotem ol disaepol blong Hem, ol fren blong Hem. Hem i talem:
“Loa blong mi i olsem, se yufala i mas lavlavem yufala, olsem we mi mi lavem yufala.
“I no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.
“Mo sipos yufala i stap mekem ol samting we mi mi talem long yufala, yufala i fren blong mi.
“Mi mi no moa save singaot yufala, se ol man blong wok blong mi, from we man blong wok, hem i no save ol samting we masta blong hem i stap mekem. Naoia mi mi stap singaot yufala, ol fren blong mi, from we olgeta samting ya we mi mi harem long Papa blong mi, mi talemaot finis long yufala” (Jon 15:12–15; oli ademap italik).
Taem yu laef mo serem gospel blong Jisas Kraes, bae yu pulum ol pipol i go long yu we oli wantem blong kam ol fren blong yu—i no jes wan kontak tru long sosol media long intanet, be ol kaen fren we Sevya i stap olsem eksampol tru ol toktok blong Hem mo eksampol blong Hem. Taem yu traehad blong kam wan fren long ol narafala man mo letem laef blong yu i saen, eksampol blong yu bae i blesem ol laef blong plante we yu mekem fren wetem. Mi save se taem yu lukluk moa blong kam wan fren long ol narafala man, olsem we ol profet i eksplenem, mo ol eksampol insaed long ol skripja, bae yu hapi, mo bae yu kam wan gud eksampol long wol, mo wan dei bae yu kasem ol promes blesing we oli talem insaed ol skripja abaot tru frensip. Promes ia [long ol skripja] i talem long yumi se wanem we yumi mekem long laef long wol ia bae i semmak long nekis laef, be, i tu taem moa wetem ol blesing we i no save finis. (Luk long D&C 130:2).
Foto pikja © iStockphoto.com/Fonikum mo i kam long Les Nilson