Samting I Bin Rong Wetem Plen blong Mi

Wan naet taem we mi stap draevem plen blong mi long graon we i fulap long ol pasenja long rod blong hem, mi bin filim se samting i rong wetem stia blong plen. Blong konfemem ol filing blong mi long saed blong spirit, mi stopem plen ia mo tanem raon blong 360 digri. I no luk se wan samting i rong.

Mi bin tingting, “Bae mi tekof mo mekem ol pasenja i go long ples we oli wantem go long hem long stret taem, o bae mi tanem raon nomo i gobak long get?” Mi bin save se sapos mi gobak bae i mekem plen let blong wan longfala taem. Ol plen oli gat raet blong travel long wan wei nomo; Bae mi mas wet blong olgeta we oli kontrolem trafik long graon blong givim spes long mi blong travel long nara daereksen. Afta mifala i mas wet long man we i stap fiksim ol plen blong kam jekem plen ia. Spos plen i let, i save mekem problem long kampani blong plen mo ol pasenja we oli gat ol pipol blong mitim mo ol nara flaet blong tekem i go long narafala kantri. Mi stap tingting tu se olsem wanem dipatmen blong mentenens bae i tekem ripot blong mi se plen ia i bin gat wan problem, we i no gat pruf long hem be wan strong filing nomo.

Olsem kapten blong plen ia, mi bin risponsibol long laef blong mifala, mekem se mi plan blong folem filing blong mi ia mo gobak.

Taem mifala i kasem get, mi bin talem long man blong mekanik se mi filim wan samting i bin rong wetem plen be mi no bin save se wanem nao trabol. Hem i no bin biliv se i bin gat wan problem.

“Ating hem i from rod blong yu i wetwet,” hem i talem. “Ating yu bin glis long kolta.” Be hem i bin agri blong lukluk long ol pat blong stia long fored blong plen. Afta we hem i jekem, hem i bin askem mi blong karemaot ol pasenja blong hem i save ron mo testem plen.

Taem hem i kambak afta 30 minit, hem i bin wari. Long taem blong tes, hem i bin harem wan pat blong plen we i gohed blong mekem noes. Taem hem i yusum brek blong tanem raon blong kambak long get, hem i lusum kontrol long plen mo kolosap hem i kamaot long rod blong plen.

Wan gud jekap i soem se oli no bin fiksim gud ol brek long naet bifo. Sapos bae mi lan afta long flaet blong mifala, bae ol brek oli no wok, mo bae mi save lusum kontrol blong plen.

Mi bin kasem wan nara plen blong paelotem, mo mi bin go sef mo putum gud ol pasenja blong mi long ples blong olgeta, afta tri aoa.

Mi glad we mi bin lisin long smol voes blong Spirit. Mi save se Spirit bae i lidim yumi sapos yumi lukaotem blong Lod i givhan long yumi mo lisin long voes blong Spirit we i stap kam.