Wea Nao Mi Save Karem wan Magasin Olsem Ia?

Taem mi stap long wan trip wetem famle blong mi long Nevada, YSA, i go long Alaska, YSA, mi statem stori wetem wan longfala, naes, gud woman long narasaed laen blong jea.

Hem i bin askem mi wea nao mi stap go, mo mi bin talem long hem se mifala i stap go long Juno, Alaska, blong visitim boe blong mifala mo famle blong hem. Hem i bin talem long mi se hem i blong Las Vegas. Afta, wetem krae, hem i talem se hem i stap go long Juno blong visitim papa mo mama blong hasban blong hem blong gat wan memori seves blong hasban blong hem, we hem i bin maredem hem blong 20 yia. Hem i jes ded i no longtaem from hem i kasem kansa.

Mi bin luk i go kros long narasaed laen blong jea mo tingting long miwan se mi laki tumas blong save plan blong fasin blong sevem man mo blong kam wan man blong wok long tempol long Las Vegas Nevada Tempol. Mi stap tingting se wanem mi save mekem blong woman ia blong helpem hem i filim moa gud.

Wantaem nomo, i kam klia long mi, mi tingbaot wan kwot we i kam long Profet Josef Smit we mi bin givimaot long Rilif Sosaeti. Taem we hem i bin oganaesem Rilif Sosaeti, hem i bin stap luk se ol sista “bae i oli flae blong givhan long wan strenja; bae oli kapsaedem oel mo waen long ol soa hat blong olgeta we oli harem nogud; bae oli stopem ol wota blong ae blong ol pikinini we oli no gat papa mo mama, mo mekem hat blong wido i glad bakegen” (Teachings of Presidents of the Church: Joseph Smith [2007], 452).

Mi luk i go kros long narasaed jea wan moa taem. Mi luk wan strenja we i harem nogud, wan widow wetem wan soa hat. Mi tingbaot se mi bin ridim Julae 2011 Ensign eli long dei ia. I gat insaed sam stori we i save leftemap tingting we mi ting se i save givim sam strong tingting mo kamfot long hem.

Mi pulum strong paoa blong tingting blong mi i kam wanples, mi openem magasin long wan stori, mo askem hem blong ridim. Mi stap luklukgud hem, mo bin sapraes se hem i ridim gud—evri laen. Taem hem i finis, hem i ridim wan nara stori.

I klia we wan samting we hem i ridim i tajem hat blong hem. Hem i holem magasin ia i go fas long jes blong hem mo afta hem i waepem wota long ae blong hem.

“Wea nao mi save kasem wan magasin olsem ia?” hem i askem mi. Mi talem long hem se hem i save kipim. Afta hem i ridim sam moa.

Taem mifala i kasem Juno, hem i holem han blong mi, i luk stret i go long ae blong mi, mo talem, “Tangkyu.”

Mi bin lanem wan bigfala lesen long eksperiens ia. Yumi gat ol strenja raon long yumi wetem ol soa hat we oli nidim wan kaen toktok blong leftemap tingting, mo oli nidim blong save wanem we, yumi, olsem ol Lata-dei Sent, i save.