Ol Yang Jos Seves Misinari Oli Faenem Glad long Seves
Elda Ernesto Sarabia i bin werem wan blak misinari baj evri dei long misin blong hem. Be wok blong hem long misin i bin spesel moa long plante narawan—Elda Sarabia i bin givim seves olsem wan yang Jos seves misinari (YJSM) long Meksiko Hemosilo Misin Ofis.
“Mifala i luksave se bae i no waes blong sam yang man mo yang woman blong yumi blong eksperiensem sik long saed blong bodi mo tingting mo ol jalenj blong wan fultaem misin,” Elda M. Rasel Balad blong Kworom blong Olgeta Twelef Aposol i bin talem. Be hemia, hem i talem, i no minim se oli no save tekempat long ol blesing blong misinari wok (“One More,” Liahona, Mei 2005, 69).
Elda Rasel M. Nelson blong Kworom blong Olgeta Twelef Aposol i bin talem, “Wan misin i wan wok we man i glad blong mekem olsem wan seves i go long God mo ol man long wol” (“Ask the Missionaries! They Can Help You!” Liahona, Nov. 2012, 18), mo i gat plante wei blong givim seves ia.
Blong olgeta we oli talem olgeta se, wetem ona bae oli no nid blong go long wan fultaem misin, o blong olgeta we oli mas gobak hom eli, YJSM program i save givim wan misin eksperiens we i gat bigfala mining.
Ol Samting we I Nid blong Gat mo Mekem blong Givim Seves Ia
Ol YJSM oli mas fit long saed blong bodi, tingting, spirit mo long saed blong filing blong save mekem ol diuti blong koling blong olgeta we i go stret wetem olgeta.
Ol wok blong YJSM i save stap blong 6 kasem 24 manis, mo i save stap blong mekem wok blong sam dei nomo long wan wik i go kasem blong wok fultaem. I gat ol janis blong givim seves long komiuniti, mo tu, long hom. Ol mein wok blong YJSM i gat wok blong lukaotem famle histri, infomesen teknoloji, misin ofis asisten, help long ol stoa haos blong bisop, mo samfala moa bakegen.
Famle mo Prishud Sapot
Ol papa mo mama, ol prishud lida, mo ol Memba blong Jos oli save helpem ol YJSM blong rere blong go long misin.
Famle blong Sista Elisa Joe Yang i bin wan strong sapot long hem, taem oli draevem hem i go mo kambak long ol ofis blong Jos long Sidni, Ostrelia.
Elda Maekel Hilam, we i wok long Hong Kong Distribusen Senta, i bin talem, “Ol eli moning seminari tija mo ol Yang Man lida blong mi oli bin help mekem mi rere.”
Sakrifaes I Givim Ol Blesing
Sista Yang i bin sakrifaesem ol dei we hem i no wok long pat taem wok blong hem blong givim seves olsem wan Jos-Seves Misin. Hem i bin talem, “Mi filim kolosap moa long Papa blong mi long Heven, taem mi save se mi stap helpem Hem.”
Antap long ol blesing long saed blong spirit, blong wok long olsem wan Jos-seves misin, i givim ol yang misinari ol gud sosol mo profesonol janis. “Misin blong mi i soem mi se mi save wok long ol wok we mi no nidim spesel asisten,” Sista Yang i talem. (Hem i bin wok fastaem long ol wok we oli stap asistim hem nomo.)
Nomata i no evri yang adalt we oli laekem blong givim seves, oli save mekem, be i bin gat bigfala wok blong save tekem evri yang adalt we oli klin inaf. Ol yang man mo woman we oli laekem blong givim seves long wei ia, oli save toktok long ol bisop o branj presiden blong olgeta, we oli save faenem ol stret janis blong olgeta.
Rid moa long news.lds.org taem yu lukaotem “young church-service missionaries.”