Savali a le Au Peresitene Sili
O Se Taula ua Faatulagaina ma le Mausali
E lei leva atu sa ou maua se avanoa e folau ai i se vaa tele i le talafatai ofoofogia o Alaska, ISA. A o saunia e le kapeteni le nonofo ai i le po i se faga tuufua mamao, sa iloiloina ma le faaeteete le nofoaga ma tulaga, e pei o le faasologa o le tai, le loloto o vai, ma le mamao mai faafitauli matautia. Ina ua faamalieina, sa ia faapauina le taula ina ia tumau saogalemu ma mausali le taulaina o le vaa, ma tuuina atu ai i le pasese se avanoa e maofa ai i le maoae o le matagofie o foafoaga a le Atua.
A o ou vaavaai atu i le apitaogalu, na amata ona ou iloaina o loo tafetafea lemu le vaa i sina savili itiiti lava ma le tafe masani o le vai. E ui i lea, na tumau le vaa ma le mausali ma le malosi i totonu o se li’o maumaututu e tusa ai ma le umi o le maea ma le malosi o le taula.
E lei teuina e le kapeteni le taula i luga o le vaa, e saunia ai e tuu ifo i lalo pe a lalata mai se afa. E leai, sa ia taulaina le vaa e avea o se auala saogalemu ma puipuia le vaa mai le agai atu i vai e le saogalemu po o le tafe atu i le matafaga a o saogalemu le pasese ma le auvaa.
A o ou mafaufau i lenei vaaiga, sa oo mai ia te au se lagona faapea, pe afai e le o se avanoa lenei mo se faataoto, ou te lei aveina muamua lava se vaalele.
Aisea Tatou te Manaomia ai Taula
O le faamoemoega o se taula o le faatumauina lea o le saogalemu ma le malupuipuia o se vaa i se nofoaga na manaomia po o le fesoasoani e pulea ai le vaa i le taimi o le leaga o le tau. Ae peitai, ina ia ausia nei faamoemoega taua, e le lava le na o le i ai o se taula. O le taula e tatau ona malosi, faatuatuaina, ma faaaoga tatau i le taimi ma le nofoaga sa’o.
E manaomia foi e tagata taitoatasi ma aiga ni taula.
E mafai ona oo mai le fili e pei o se matagi malosi e feula ese ai i tatou mai le ala sao ma taufaamatau mai e lafo i tatou agai i papa. Ae o nisi taimi tatou te i ai foi i se tulaga matautia pe a foliga mai o mea uma ua saogalemu—o le malu o le matagi ma le filemu o vai. O le mea moni, e mafai ona tatou i ai i le tulaga e sili ona matautia pe a tatou tafetafea ma o le gaoioi ua matuai laitiiti lava ua tatou tau le iloa ai.
O Le Talalelei o lo Tatou Taula Lea
O taula e tatau ona mausali, malosi, ma tausia lelei ina ia saunia pe a manaomia. Ma le isi foi, e tatau ona faapipii i se faavae e mafai ona tauaveina le mamafa o malosiaga a le fili.
O le mea moni, o le talalelei a Iesu Keriso o se taula faapena. Sa saunia e le Foafoa o le atulaulau mo se faamoemoega paia ma mamanuina e tuuina atu ai le saogalemu ma le taitaiga i Lana fanau.
O le a le talalelei, e ui i mea uma, e le gata i le fuafuaga a le Atua e togiola Ana fanau, ma toe aumai i latou i Lona afioaga?
O le iloaina o loo i le natura o mea uma le tafetafea, e tatau ona mausali le faatulagaina o a tatou taula i luga o le faavae o le upumoni o le talalelei. E le tatau ona tuutuu malie ifo i lalo i oneone o le faamaualuga po o le tau le papai i luga o o tatou talitonuga maumaututu.
O le masina lenei ua i ai lo tatou avanoa e faalogologo ai i auauna a le Atua i se konafesi aoao o le Ekalesia. O a latou upu, faatasi ma tusitusiga paia ma uunaiga a le Agaga, e maua ai se faavae mautu ma mausali o tulaga faatauaina e faavavau ma mataupu faavae lea e mafai ona tatou faapipii i ai o tatou taula ina ia mafai ai ona tatou tumau mausali ma le saogalemu i le lotolotoi o tauiviga ma luitau o le olaga.
Na aoao mai le perofeta anamua o Helamana, “O luga lava o le papa o lo tatou Togiola, o le Keriso lea, le Alo o le Atua, e ao ina oulua atinae ai lo ouluafaavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou” (Helamana 5:12).
O Le Taua o Taula e Faatulagaina ma le Mausali
E i ai se auala o le olaga e tofotofoina ai o tatou taula ma faaosoosoina i tatou e tafefea. E ui i lea, afai ua sa’o ona faatulaga lo tatou taula i le papa o lo tatou Togiola, o le a latou tumau—tusa lava po o le a le malosi o le matagi, le malosi o le galu, po o le maualuluga o galu.
O le mea moni, e lei fuafuaina se vaa ina ia nofo mau i se uafu ae nai lo lena ina ia sii le taula ma folau i ogasami o le olaga. Ae o se faataoto lena mo se isi taimi.
Mo le taimi nei, ou te maua le toafilemu i le iloaina o le taula o le talalelei ma le papa o lo tatou Togiola o le a tausia i tatou e tumau ma saogalemu.
O lea ituaiga o taula o le a taofia i tatou mai le tafetafea atu i se tulaga matautia ma le le manuia. O le a tatou maua ai le avanoa mamalu e olioli ai i le matagofie e le mafaatusalia o le fesuisuiai pea ma le matagofie o le vaaiga i le olaga.
O le olaga e matagofie ma e aoga le ola ai. O matagi, afa, ma peau masani e mafai ona faaosoosoina i tatou e tafetafea atu i tulaga matautia e iloa atu pe leai foi, ae o le savali o le talalelei ma lona mana paia o le a taofia i tatou i lo tatou ala e toe foi atu ai i le uafu saogalemu a lo tatou Tama Faalelagi.
O le mea lea, e le gata i lo tatou faalogo i lauga o le konafesi aoao ia Aperila ae faapea foi ona faaaoga a latou savali i le avea ai ma se taula faatulagaina ma le mausali i o tatou olaga i aso taitasi.
Tau ina ia faamanuia le Atua ma taitaia i tatou i lenei taumafaiga maoae ma taua!
Aoao Atu mai Lenei Savali
Mafaufau e talanoaina le taua o taula i le anotusi o le aiga o Liae a o folau atu i le laueleele folafolaina (tagai i le 1 Nifae 18). E mafai ona e faasino atu 1 Nifae 18:11–15, le taimi ua noatia ai Nifae, ua le toe galue le Liahona, ma tuleia le vaa e afā malolosi. O a taunuuga ua tatou feagai pe a le taulaina i tatou ma le saogalemu i le talalelei? E mafai foi ona e faasino atu 1 Nifae 18:21–22 ma talanoaina pe faapefea ona tatou mafai ona maua le saogalemu e ala i le liliu atu i le Faaola.