Sao pe Sese?

Saunia e David A. Edwards

Mekasini a le Ekalesia

O nisi taimi o le iloaina o le upumoni mai mea sese e faigata, ae ua tuuina mai e lo tatou Tama Faalelagi ia i tatou meaalofa mamana e fesoasoani ia i tatou e iloa ai le eseesega i le va o upumoni a le Atua ma pepelo a Satani.

Afai na e faia muamua se suega o ni fesili sao-pe-sese, e te iloa ai o nisi taimi e faigata ona vaaia se mea sese. E faapena foi, i fesili tetele o le faatuatua, talitonuga, ma le olaga i aso uma, e ui e taua tele le mafai ona e iloa le eseesega i le va o le mea e moni ma le mea e sese, e le masani ona faigofie.

Ae peitai, tatou te le manaomia le matatau e pei oni tagata e fai le suega ae le’i saunia. Ua faamanuiaina i tatou e lo tatou Tama Faalelagi i le tele o meaalofa e fesoasoani ia i tatou e iloa Ana upumoni ma pepelo a le fili.

O Ituaiga Eseese o Mea Sese

Muamua, ina ia faamaninoina se manatu, o se suega laitiiti lenei o le sao-pe-sese mo oe:

E lanu meamata le masina. sese
Fai mai Neil Armstrong, o le tagata o le vateatea o le Apollo 12 ua avea ma tagata muamua e savali i luga o le masina, faapea o le mea na tupu o se “laasaga maoae mo tagata.” sao sese
Polokalama o le Pulega o le Au Suesue i le Vateatea a Amerika (NASA) e lei mafai ona alu i Mars i le 1969, o lea sa latou o ai i le masina. sao sese
O matagi o le lalolagi, malosiaga faaeletise, ave o le la, ma isi faalavefau semanu e faafaigata ai le tulaueleele o tagata i le masina, faatasi ai ma ata na pueina na foliga mai ua suia ma o molimau patino na eseese nisi faamatalaga, o le mea lea masalo na faafoliga mai e le malo o le I.S. le mea atoa. sao sese

O le tali i fesili taitasi o le Sese, ma o nei fesili e fai ma sui o nisi ituaiga autu o mea sese e te ono fetaiai i ai.

O le fesili 1 o se pepelo faigofie, o se mea sese matilatila. O le fesili 2 e sao se vaega, lea e faatogafiti, talu ai e faasoa se tasi po o le sili atu o upumoni ma se mea sese (o le Apollo 11, ae le o le Apollo 12—maua oe!). O le fesili 3 o loo i ai se feteenaiga sese, po o se tulaga lea na o le lua filifiliga e tuuina mai ae le na o le pau na o filifiliga (e mafai lava ona filifili le NASA e le alu i se mea, mo se faataitaiga). O le fesili 4 o se finauga “talafeagai”, lea e faaaogaina ni faamaoniga se tele ina ia mafai ona taitai atu ai i se faaiuga ua faapitoa le faaseseina.

Pepelo o Ona Po Nei

Pe a oo atu i mea e aafia ai ou mafaufauga, talitonuga, filifiliga, ma amioga—o mea e i ai taunuuga malolosi e faavavau—e tauia le vaavaai mo ituaiga eseese o mea sese, talu mai o Satani, “o le tama o pepelo uma” (2 Nifae 9:9), o le a faaaogaina soo se auala e mafai ona ia faaseseina ai i tatou. O nisi nei o faataitaiga o auala ua ia faia ai i aso nei, faapea foi ma faataitaiga o auala e mafai ona tatou tali atu ai ma le upumoni.

Upu Lē Moni Faigofie

Manatu Sese:	O Fea e Taitai Atu I Ai (Pepelo Lapoa):	O Le Upumoni:
O ponokarafi po o ata leaga o se mea masani ma e le afaina ai se isi.	Alu i ai ma matamata i ponokarafi.	O ponokalafi e faafilogiaina ai la tatou vaaiga e uiga i tulaga feusuai, e mafai ona avea ma vaisu, matuai faatamaia ai i tatou faaleagaga, ma e mafai ona faatamaia ai mafutaga.

Afa Upumoni

Manatu Sese:	O Fea e Taitai Atu I Ai (Pepelo Lapoa):	O Le Upumoni:
O tagata taitoatasi e tulaga ese ma e mafai ona ola e pei ona ia filifili, o lea o le ala e te manatu ai ma faailoa atu oe lava ia o le mea e aupito sili lea ona taua i lou olaga.	E tatau lava ona tuu atu i le Atua po o le Ekalesia e tau mai ia te oe le auala e ola, o lea ia alu loa ma faia mea e te manao ai pe afai e te maua ai se lagona lelei.	O i tatou taitoatasi o se atalii tulaga ese o le Tama Faalelagi, o le e manao ia i tatou ina ia avea i tatou ma tagata sili, ma ia avea faapei o Ia. O le usiusitai i Ana poloaiga e fesoasoani ia i tatou e maua ai le olioli sili.

Feteenaiga Sese (Na o le Lua Filifiliga)

Manatu Sese:	O Fea e Taitai Atu I Ai (Pepelo Lapoa):	O Le Upumoni:
E talai e le Ekalesia le tetee atu i tifiga faapitoa o le olaga; o le mea lea, e le onosaia ma inoino i tagata—e le taliaina ma agaalofa.	Talu ai o le Ekalesia e le onosaia ma inosia, e tatau ona faitioina, tauemuina, ma tausalaina, lea e tatau ai ona e taofia le mafuta i ai.	O le le taliaina o tifiga a se isi tagata e le tutusa ma le inoino ma le le onosaia. E mafai ona tatou faaalia le alofa, faaaloalo, ma le agalelei i tagata uma—e aofia ai tagata e masani o latou olaga i le faasagatau i tulafono a le Atua—a o tumau faamaoni i le Atua ma Ana poloaiga.

Finauga “Talafeagai”

Manatu sese:	O Fea e Taitai Atu I Ai (Pepelo Lapoa):	O Le Upumoni:
O nisi mea i le Tusi a Mamona e teena e faamaoniga faasaienitisi i le taimi nei, ma o faamatalaga o le ala na faaliliu ai e le ogatusa, o lea, masalo na faatupu uma lava e Iosefa Samita pe na kopi mai i se mea.	E le moni le Tusi a Mamona ma o Iosefa Samita e le o se perofeta, o lea ia taofi le fegalegaleai ma le Ekalesia.	O le faasaienisi ua faamaonia mea e tele i le Tusi a Mamona, ma o “faamaoniga” e faasaga i ai e le moni. Ae o le faamaoniga aupito sili ona taua mo lena tusi o le molimau a le Agaga e ta’u ai ia te oe e moni ma o Iosefa Samita o se perofeta moni.

Pe faapefea ona Iloa le Upumoni

O fea la e maua mai ai se vaaiga e sili atu ona atoatoa o le upumoni? E faapefea ona mafai ona tatou vaai e ala atu i mea sese? O nisi nei o meaalofa mamana a le Tama Faalelagi ua tuuina mai ia i tatou e iloa ai le upumoni mai le mea sese.

O Le Malamalama o Keriso. “O le Malamalama o Keriso … ua uunaia ai ni tagata uma i le lalolagi atoa e iloa ai le upumoni mai mea sese, sao mai le sese. E uunaia lou mafaufau.”¹
O le Agaga Paia. “Le Agaga lea e tupu mai ai le upu moni… ma faailoa ia te outou mea e oo mai” (Ioane 16:13).
Tusitusiga Paia. “E faaaoga e le Atua tusitusiga paia e faasao ai mafaufauga sese, uputuu sese ma le agasala ma ona aafiaga matautia.”² O le Tusi a Mamona e sili ona taua i lenei tulaga, aua e “faailoa ai fili o Keriso. E ta’usese ai mataupu sese ma tuu ai i lalo finauga. (Tagai 2 Ni. 3:12.)”³
Perofeta o Aso Nei. “O le tiutetauave [o se perofeta] o le faailoa atu o le finagalo o le Atua ma Lona uiga moni i tagata. … O se perofeta e tausalaina le agasala ma valoia atu lona taunuuga.”⁴
Aoaoga. “O se Au Paia … saili i le aoaoina, e ala lava lea i le suesue ma le faatuatua foi. Aoaoga … ua mafai ai e se tasi e iloa le upumoni mai mea sese, ae maise lava e ala i le suesueina o tusitusiga paia. (Tagai MF&F 88:118.)”⁵

E ui lava atonu o taimi uma e le faigofie ona tali Sao pe Sese pe a feagai ma ni manatu eseese uma iina, o meaalofa ua tuuina mai e le Tama Faalelagi ia te oe e mafai ona e iloa ai le upumoni.