Savali a Faiaoga Asiasi
O Le Misiona Paia a Iesu Keriso: Faaola ma le Togiola
Ia suesue ma le agaga tatalo i lenei mataupu ma saili ia iloa le mea e faasoa atu. E faapefea e le malamalama i le soifuaga ma le misiona a le Faaola ona faateleina ai lou faatuatua ia te Ia ma faamanuia ai isi e te tausia e ala i faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
O se tasi o suafa e sili ona taua ua faamatalaina o Iesu Keriso o le “Togiola,” na saunoa ai Elder D. Todd Christofferson o le Korama a Aposetolo e Toasefululua. “Togiola o lona uiga o le totogi o se tautinoga po o se aitalafu. Togiola e mafai foi ona faauigaina o le laveai pe faasaoloto e ala i le totogiina o le tau. Ua fautua mai e nei uiga taitasi ni vaega eseese o le togiola sili na faataunuuina e Iesu Keriso e ala i Lana Togiola, lea e aofia ai, i le faauigaga a le lomifefiloi, “ia laveai mai le agasala ma ona faasalaga, e ala i se taulaga na faia mo le tagata agasala.’”1
Na saunoa mai Linda K. Burton, le peresitene aoao o le Aualofa: “Tama Faalelagi … auina mai ai Lona Pele e toatasi ma atoatoa e puapuagatia mo a tatou agasala, o lo tatou lototiga, ma mea uma e foliga e le talafeagai i o tatou lava olaga taitoatasi.
“… Na fai mai ma loimata se tasi tamaitai o le na aafia i ni tausaga i tofotofoga ma faanoanoaga faapea, “Ua ou iloa nei ua pei lava a’u o se 20-tala-pepa tuai—ua maanuminumi, masaesae, palapala, matafi, ma mafugafuga. Ae … o au lava o se 20-tala pepa.’ Ua iloa e lenei fafine o ia … ua lava lona taua i le [Atua] e auina mai Lona Alo e togiola mo ia lava. E ao i uso uma i le Ekalesia ona iloa le mea ua iloa e lenei fafine.”2
Mai Tusitusiga Paia
Mai lo Tatou Talafaasolopito
O le Feagaiga Fou e aofia ai tala o tamaitai o e na faatinoina le faatuatua ia Iesu Keriso, aoao ma ola i Ana aoaoga, ma molimau e uiga i Lana galuega talai, vavega, ma le mamalu.
Na fetalai atu Iesu i le fafine i le vaieli:
“A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau.
“Ua fai mai le fafine ia te ia, Le Alii e, aumai ia te au lena vai, ina ia ou le toe fia inu. …
“Ua ou iloa o le a maliu mai [le Mesia], o le ua igoa ia Keriso: pe a maliu mai o ia, e faailoa mai mea uma ia te i matou.
“Ona fetalai atu lea o Iesu ia te ia, O au lenei, o le tautala atu ia te oe.”
Ona “tuu lea e le fafine o lana vai” ma tuuina atu le molimau ia te Ia i le aai. (Tagai i le Ioane 4:6–30.)