Na Tuuina Mai ia te Au e le Folafolaga le Faamoemoe

E lei umi ona ma faaipoipo ma lo’u toalua, ae faamanuiaina i ma’ua i se atalii. Ina ua ou vaaia lana ataata ma tilotilo atu i ona mata, sa ou lagona le nofo aitalafu i le Tama Faalelagi. O lo ma atalii na foliga atoatoa mai ia te au. Na ma faafetai ma lo’u toalua i le Alii i aso taitasi mo se meaalofa taua tele.

O le aso 19 o Fepuari, 2009, na ou sauni ai e toe foi atu i le aoga mo lo’u tausaga faaiu o vasega. Ma te lei iloa ma lo’u toalua o le aso e sosoo ai o le a maua ai le ma tama pele i se fiva ma tuua ai lenei olaga faaletino.

O se aafiaga faigata tele mo au e tauaveina. Na o mai tagata o la matou uarota i lo ma fale e faamafanafanaina i maua i mau ma viiga ma tatalo faatasi ma i maua. Sa ou faamemelo i lo latou faamaisega agaalofa, ae na faaauau pea lo’u faanoanoa i lo’u atalii. Soo se taimi lava ou te mafaufau ai ia te ia, e amata ona mamafa o’u mata i loimata.

I le fa o aso talu ona mavae lona maliu, sa musuia au e suesue Aoaoga a Peresitene o le Ekalesia: Iosefa Samita. A o ou uuina le tusi, sa matala i o’u lima i le mataupu ua faaulutalaina “Saunoaga mo le Faamoemoe ma Faamafanafanaga i le Taimi o le Oti.” Sa amata ona ou faitau ma sa matua aafia lava i le faanoanoa matautia sa mafatia ai Iosefa ma Ema a o tau amata lo la aiga. Ina ua ou oo atu i le upusii mai se lauga na tuuina atu e le Perofeta i le falelauasiga o se teineitiiti e lua tausaga le matua, sa ou lagonaina e peiseai ua sasaa mai ni vai malulu i luga o lo’u ulu, ma faamalulu ai o’u mafaufauga na tumu i le faanoanoa.

Na ou valaau i lo’u toalua. Na ma faitau faatasi: “ou te … fesili ai i le fesili, aisea i fanau iti, o fanau e leai ni agasala, ua aveesea ai ma i tatou. … E aveeseina e le Alii le toatele e oo lava i le fanau iti, ina ia latou o ese ai mai … faanoanoaga ma leaga o lenei lalolagi; e mama tele i latou, matagofie tele, e soifua ae i le lalolagi; o le mea lea, afai e manatunatu i ai ma le sa’o, o le a leai se faavauvau ae o le a i ai le mafuaaga e fiafia ai ona o le a aveeseina mai i latou mai le leaga, ma o le a le toe umi ona tatou toe faatasi lea ma i latou.”

Na toe faaopoopo mai le Perofeta: “O le fesili e mafai ona fesiligia—‘Pe mafai ona maua fanau e tina i le faavavau?’ Ioe! Ioe! Tina, o le a maua a outou fanau; aua latou te maua le ola e faavavau, aua ua uma ona totogi la latou aitalafu.”¹

Talu ona ma faitau i na upu matagofie, ua faatumulia tatalo a lo matou aiga i le faafetai mo le folafolaga faapea o le Togiola a Iesu Keriso o le a ma toe faatasi ai ma lo ma atalii.

I le taimi nei ua toatolu si a ma fanau laiti aulelei, o nai tei o la ma atalii ua maliu. O loo ma aoaoina i latou i le talalelei moni ma le faavavau, lea o le a taialaina i latou e toe foi atu ai i lo latou Tama Faalelagi ma lo latou Faaola, o Iesu Keriso.

Ou te iloa e moni le savali a le Perofeta o Iosefa Samita i le olaga pe a mavae le oti. Ou te faafetai pea e faavavau mo le faamoemoe, filemu, olioli, ma le fiafia ua ia aumaia i lo matou aiga—i itu uma o le veli.