Mauaina o le Faamoemoe i le Lumanai

I le aso 12 o Setema, 2001, na ma fesavaliai ma lo’u toalua i le fola o se falemai i Tucson, Arisona, ISA, e faaalu itula o le popole a o ma faatalitali mo le fanau mai o lo ma atalii. Mai le ma televise ma mai televise uma i le fale, sa faateia i matou i ni ata mai le aso talu ai i le Aai o Niu Ioka—ata o fale maualuluga e lua ia sa i ai se tasi taimi sa taulaina le tafailagi o lena aai, ua pauu atu i le gasu ma le efuefu. O ata, o faasalalauga mo le tele o itula, sa matou maua ai se lagona o le leai o se faamoemoe. Sa foliga mai o se taimi e sili ona leaga e mafai ai ona aumai se pepe i le lalolagi—se lalolagi e foliga mai sa sili ona pogisa ma taufaamatau.

O le taeao po na sosoo ai na fanau ai le ma atalii pepe. A o ou sapaia le ma tama laitiiti, sa ou mafaufau i mea matautia na tutupu i ni nai aso ua mavae atu, mea na tutupu na ou toe mafaufau ai i afi i le Yellowstone National Park i le 1988. Na faaleagaina e le afi toeitiiti 800,000 eka (323,750ha) o le togavao. O le faatafunaga o le paka na foliga mai ua atoatoa. O ata o talafou na faaalia mai ai na o le eleele paaa ma le asu mafiafia uliuli i le lagi. E leai se malosiaga o taumafaiga a tagata e mafai ona vave toe aumai ai mea na leiloloa. Sa foliga mai e oo lava i le toefaafouga lē faavaivai ma le malosi o le natura sa leai se avanoa mo le faataumaoi o le mana o le afi.

Ae o le tautotogo na sosoo ai sa tupu ai se vavega filemu—o tamai laau ma fugalaau sa amata ona tutupu ae mai le eleele paaa. Sa faifailemu lava, ona fuga mai le eleele le tele ma le tele o fugalaau ma laau. O le toe fanauina o le paka sa gese ma tumu i fuga ninii, ma tulagaese le mamalu, ma i le aluga o taimi, na maoae le taunuuga.

I le taimi o le fefe e foliga mai ua lofituina ai i tatou e pei o afi ua musaesae o Yellowstone, ina ua tau leai so tatou faatuatua ma le faamoemoe, e tatau ona tatou manatua o loo i ai se tasi o faavae filemu, ma le le mafaagaeetia o loo i lalo ifo o i tatou, e sili atu ona mamana nai lo soo se malosiaga leaga o le a tatou feagai. Ua faamalamalama mai e Helamana o lenei faavae o “le papa o lo tatou Togiola, o le Keriso, le Alo o le Atua.” Pe afai tatou te taulaina i tatou lava ia te Ia, ona “pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou” (Helamana 5:12).

Pe a feagai ai ma au matautia a le tiapolo ma faaosoosoga i le lalolagi, atonu tatou te manatu o le uunaiga laitiiti ma faatauvaa o le talalelei e faaleaogaina ma lofituina. Atonu tatou te lagonaina le masalosalo ma le faanoanoa pe a tatou faatali fua mo mea sese ia faasa’oina, tiga ina ia fofoina, ma fesili ia taliina. O na lava matagi e luluina i tatou, e ui i lea, e luluina fatu o le suiga ma le tuputupu ae, ma o le mana malosi o le talalelei e galue filemu i lalo o le eleele o le olaga faalelalolagi, e sauniaina le afe o ni fatu itiiti o le faamoemoe ma le olaga.